Ordu.az xəbər verir ki, bu barədə xarici KİV-lər məlumat yayıb.
“Telegram” kanalındakı paylaşımda bildirilir ki, təcavüzkar dövlətin bütün federal dairələrində 18-60 yaş arası əcnəbi kişilərin sayını müəyyən etmək üçün yoxlamalar aparılıb.
“Yoxlamalar Rusiya Silahlı Qüvvələri Baş Qərargahının Baş Təşkilati-Səfərbərlik İdarəsi ilə Rusiya Daxili İşlər Nazirliyinin xarici vətəndaşların vətəndaşlıq və qeydiyyat xidməti tərəfindən aparılıb. Hərbi komissarlıqlara konkret səfərbərlik hədəfləri verilib: hər regionda əcnəbilərin ümumi sayının 0,5 faizindən 3,5 faizinədək hissəsini Ukraynaya qarşı cinayətkar müharibəyə cəlb etmək. Cəlbetmə 97 müqaviləli xidmət seçim məntəqəsi vasitəsilə aparılır”, - deyə Müdafiə Kəşfiyyatı bildirib.
Qeyd olunur ki, belə məntəqələrin ən çoxu Mərkəzi Hərbi Dairədə fəaliyyət göstərir (30). Moskva və Cənub dairələrinin hər birində 21, Şərq dairəsində 14, ən az isə Leninqrad dairəsində 11 məntəqə var.
“Ümumilikdə, 2026-cı il üçün Rusiya Müdafiə Nazirliyi işğalçı orduya ən azı 18 500 xarici vətəndaş cəlb etməyi planlaşdırır. Rusiyanın hərbi qurumu əsas marağı Mərkəzi Asiya dövlətlərinin vətəndaşlarına yönəldib: Qazaxıstan, Qırğızıstan, Özbəkistan və Tacikistan. Eyni zamanda iş Rusiyadan kənarda da aparılır. Prioritet istiqamətlər arasında Banqladeş, Çad, Sudan, Burundi və Afrika ilə Asiyanın digər ən kasıb ölkələri var”, - Müdafiə Kəşfiyyatı bildirib.
Rəsmi cəlbetmə məntəqələri ilə yanaşı, Rusiya regionlarında cəlbetmə Rusiya xüsusi xidmət orqanlarının, o cümlədən QRU-nun nəzarəti altında yaradılmış psevdo-özəl hərbi strukturlar tərəfindən aparılır: “Redut”, “Convoy”, “Wagner-2”, “Potok”, “Russian Combat Brotherhood”, “Fakel”, “Patriot”, “Plamya”, “Sokol” və “Veterans”.
Əcnəbiləri cəlb etmək sxemlərinə pul, imtiyazlar və Rusiya vətəndaşlığı vədlərindən əlavə, təzyiq və məcburetmə də daxildir. Rusiya öz ərazisində olan xarici vətəndaşların hüquqi həssaslığından istifadə edir. Bura turist və ya tələbə vizalarının müddətinin bitməsi, vizanı uzatmaq və ya müəyyən edilmiş müddətlərdə qalmanı leqallaşdırmaq imkanının olmaması, Rusiya miqrasiya qanunvericiliyinin pozulmasına görə inzibati saxlanmalar daxildir.
“Çox vaxt Rusiya rejimi tərəfindən qəsdən yaradılan belə şəraitdə əcnəbilərə müharibədə iştirak formasında sözdə ‘alternativ’ təklif olunur. Əslində isə hər şey uzunmüddətli həbs (bəzi hallarda 8 ilədək müddətlər qeyd olunub) ilə Rusiyanın silahlı birləşmələrində xidmət müqaviləsi imzalamaq arasında seçimə gətirilir”, - deyə bəyanatda qeyd olunur.
Ukrayna Müdafiə Kəşfiyyatı xarici vətəndaşları Rusiyaya səfər etməkdən və təcavüzkar dövlətin ərazisində hər hansı iş görməkdən çəkindirir.
“Rusiyaya səfər “intihar” hücum bölməsinə düşmək və nəticədə Ukrayna torpağında çürümək üçün real şansdır”, - deyə Müdafiə Kəşfiyyatı bildirib.
Sevinc Əliyeva
Ordu.az
