Ordu.az xəbər verir ki, bu barədə xarici KİV-lər məlumat yayıb.
İsrail Müdafiə Nazirliyinin məlumatına görə, Slovakiya Hərbi Hava Qüvvələri 2024-cü ildə imzalanmış 560 milyon avroluq (656 milyon dollar) müqavilə çərçivəsində İsrail istehsalı BARAK MX hava hücumundan müdafiə sistemini təhvil alıb.
Nazirlik bildirib ki, təhvilvermə planlaşdırılandan əvvəl tamamlanıb və bu sistem Slovakiyanın pilotsuz uçuş aparatları, qırıcı təyyarələr, qanadlı raketlər və ballistik raketlər də daxil olmaqla bir sıra müasir təhdidlərə qarşı hava məkanını müdafiə imkanlarını gücləndirəcək.
Sistemin təhvil verilməsi ilə yanaşı, Slovakiya Silahlı Qüvvələri ilə İsrail Müdafiə Nazirliyi arasında sazişə hazırlıq və əməliyyat təcrübəsinin ötürülməsi də daxildir.
Slovakiyanın baş nazir müavini və müdafiə naziri Robert Kalinyak bildirib: “Sistem hazırda döyüş növbətçiliyinə gətirilir və yaxın həftələrdə tam əməliyyat hazırlığına çatacağı gözlənilir. Bu prosesə Slovakiya hərbçilərinin davam edən hazırlığı və xarici mütəxəssislərin gəlişi də daxildir. Sistemin əlavə komponentləri artıq gəlir və il boyu gəlməkdə davam edəcək”.
“Israel Aerospace Industries” şirkəti tərəfindən hazırlanmış BARAK MX müxtəlif təyinatlı radarları və fərqli məsafələrdə təhdidlərə qarşı nəzərdə tutulmuş tutucu raket ailəsini birləşdirir.
Sistem 35 km, 70 km və 150 km məsafədə hədəf vurma imkanına malik üç növ tutucu raketlə təchiz olunub. Müxtəlif təyinatlı radarlar isə hava hədəflərinin aşkarlanması, təsnifatı və izlənməsini təmin edir.
BARAK MX açıq arxitekturalı, modullu quruluşa malikdir və quru, dəniz və mobil variantlarda yerləşdirilə bilər. İsrail Müdafiə Nazirliyi bildirib ki, bu sistem NATO-nun kollektiv təhlükəsizlik arxitekturasını gücləndirəcək.
Nazirliyin baş direktoru, ehtiyatda olan general-mayor Amir Baram deyib: “BARAK MX sisteminin Slovakiyaya çatdırılması iki ölkə arasındakı strateji münasibətlərin dərinliyinin göstəricisidir. Bu imkanların Avropada NATO standartlarına tam uyğun şəkildə inteqrasiyası İsrail müdafiə sənayesinin əməliyyat üstünlüyünü nümayiş etdirir və gələcək sazişlərin irəlilədilməsinə dəstək verəcək.”
2021-ci ildə İsrail və Slovakiya arasında 175 milyon dollarlıq (148 milyon avro) müqavilə imzalanmışdı. Həmin müqaviləyə əsasən İsrail Slovakiya Hərbi Hava Qüvvələrinə “Israel Aerospace Industries” istehsalı olan 17 qabaqcıl ELTA radar sistemi tədarük etməli idi.
Sevinc Əliyeva
Ordu.az
