“Israel Inside” nəşri “vəziyyətlə yaxşı tanış olan mənbələrə” istinadən bildirib ki, Zelenskinin Türkiyəyə işgüzar səfərinin əsas məqsədi “tərəflər arasında hərbi, texnoloji və müdafiə sənayesi sahələrində əməkdaşlıq haqqında sazişin siyasi əsaslarının möhkəmləndirilməsi” olub. Məlumata görə, Türkiyə və Ukraynanın müdafiə nazirlikləri “bir neçə aydır ki, sazişin mətni üzərində işləyir və onu yekun mərhələyə çatdırıblar”. Sənədin imzalanması isə “artıq Türkiyə və Ukrayna prezidentlərinin siyasi iradəsindən asılıdır”.

Güman etmək olar ki, İstanbul görüşündə belə bir “iradə nümayiş etdirilib”. Bunu ehtimal ki, “Anadolu”nun xəbərində Ərdoğanın Ukrayna ilə Fars körfəzi ərəb ölkələri arasında son vaxtlar əldə olunmuş razılaşmalardan məmnunluq ifadə etməsi barədə vurğunun yer alması göstərir. Qeyd etmək lazımdır ki, Türkiyə daha əvvəl Səudiyyə Ərəbistanı və Qətərlə hərbi əməkdaşlıq haqqında saziş imzalayıb.

TASS-ın məlumatına görə, Ərdoğanla telefon danışığı zamanı Putin həmsöhbətinin diqqətini Ukraynanın Qara dənizdə “gəmiçilik fəaliyyətinə mane olmasına” yönəldib və Kiyevin “Türk axını” qaz kəmərinə qarşı terror aktları hazırladığını iddia edib. Putin Ərdoğana bu planlara qarşı “mübarizədə səylərin koordinasiyasını” təklif edib.

Bir gün sonra isə, Türkiyə prezidentinin ofisinin sosial şəbəkə paylaşımından və mətbuat məlumatlarından aydın olur ki, Ərdoğan Zelenski ilə müdafiə, regional təhlükəsizlik və hərbi-texnoloji sahədə əməkdaşlıq perspektivlərini müzakirə edib. Aydındır ki, Türkiyə Qara dənizdəki vəziyyətlə bağlı Rusiyanın narahatlıqlarını bölüşmür və bu, eləcə də qlobal təhlükəsizlik məsələlərində müttəfiq kimi Ukraynanı seçir.

Bu kontekstdə Moskvadan Ermənistanın ünvanına səslənən “iradlar” daha dərin təhlil tələb edir. Görəsən, Rusiya Cənubi Qafqazı “qarışdırmaq” üçün kifayət qədər resurslara malikdirmi?

Asif Cəfərov
Ordu.az