Venesuela, İran və Qrenlandiyadakı vəziyyətlər beynəlxalq ictimaiyyətin diqqətini cəlb edib. Lakin Ukraynada döyüşlər fasiləsiz tempdə davam edir, çünki hər iki tərəf müharibənin reallıqlarına uyğunlaşır və üstünlük qazanmaq yolları axtarır.
Rusiyanın hücumu azalaraq davam edir
Rusiya ordusu hələ də döyüş meydanında strateji və operativ üstünlüyü saxlayır. Kreml Ukraynanın şəhər mərkəzlərinə və kritik infrastrukturuna uzaqmənzilli atəş zərbələrinə arxalanaraq Ukrayna hökumətinə təzyiqi artırmağa və Rusiyanın şərtləri ilə sülh razılaşması əldə etməyə çalışır. Bundan əlavə, Rusiya qüvvələri daha çox ərazi ələ keçirmək üçün quruda ciddi təzyiq göstərir.
Döyüş meydanında təşəbbüsü əlində saxlamasına baxmayaraq, Rusiya qüvvələri Kremlin məqsədlərinə çatmağa yaxın deyil. Ukrayna ordusu demək olar ki, hər addımda onların planlarını pozur. Həqiqətən də, canlı qüvvə və sursat çatışmazlığına baxmayaraq, ukraynalılar rus hərbçilərini məhv etmək üçün yeni konsepsiyalar irəli sürürlər.
Ukraynanın PUA öldürmə zonaları rusların irəliləyişini dayandırıb
Ukrayna ordusu ərazini Rusiya qüvvələrinə verməmək üçün biristiqamətli hücum pilotsuz uçuş sistemlərindən istifadə edir. Məsələn, ölkənin şərqində yerləşən Kupyansk şəhəri yaxınlığında Ukrayna qüvvələri PUA öldürmə zonası yaradıb və bu zona Rusiya bölmələrinin təxminən 90 faizini Ukraynanın möhkəmləndirilmiş mövqelərinə çatmamış məhv edib.
“Ukrayna qüvvələrinin Kupyansk yaxınlığında taktiki öldürmə zonası yaratdığı bildirilir. Bu zona cəbhə xəttindən 20-25 kilometr məsafədə Rusiya qüvvələrinin nəqliyyat vasitələrindən istifadə etməsini, eləcə də cəbhə xəttinə bir kilometr qalmış piyada qüvvələrinin hərəkətini faktiki olaraq mümkünsüz edir. Ukrayna bu qabiliyyəti bütün əməliyyat teatrı üzrə genişləndirməli və dərinləşdirməlidir”, - deyə Müharibənin Tədqiqi İnstitutu münaqişə ilə bağlı son operativ icmalında qiymətləndirib.
Hər iki tərəf rəqibi tükəndirmək üçün kamikadze PUA-larından, yəni “gəzən sursat”lardan istifadə edir.
PUA öldürmə zonaları işləyir, lakin bahalıdır
“Müharibənin Tədqiqi İnstitutu hesab edir ki, əgər Ukrayna qüvvələri Kupyanskda əldə edilən nəticələri bütün əməliyyat teatrı üzrə və daha böyük operativ dərinlikdə təkrarlaya bilsələr, Rusiya qüvvələrinin irəliləyişini dayandıra və Ukraynanın əks-hücumlarına şərait yarada bilərlər. Bu halda Ukrayna qüvvələri Rusiya piyadalarının cəbhə xəttinin daha dərin hissələrində manevr etməsinin qarşısını ala bilər”, - deyə institut qeyd edib.
Lakin PUA öldürmə zonası konsepsiyasının belə genişmiqyaslı tətbiqi on minlərlə “gəzən sursat” və onları idarə etmək üçün kifayət qədər təlim keçmiş operator tələb edəcək. Ukrayna ordusu Qərb tərəfdaşlarından əhəmiyyətli təhlükəsizlik yardımı alır. Xüsusilə Böyük Britaniya Ukrayna qüvvələrinin “gəzən sursat”lar ilə təchiz edilməsində öncül rol oynayıb. Bununla belə, Ukrayna ordusuna hər ay on minlərlə kamkadze PUA-sının fasiləsiz tədarükü lazım olacaq.
Əgər ukraynalılar PUA öldürmə zonası konsepsiyasını döyüş meydanının daha geniş hissələrinə yaymağı bacarsalar, Rusiyanın irəliləmək qabiliyyətinə ciddi zərbə vura bilərlər. Rusiya hərbçilərini daşıyan taktiki nəqliyyat vasitələrinin məsafədən məhv edilməsi, rus piyada bölmələrini Ukrayna mövqelərinə daha uzun məsafəni piyada qət etməyə məcbur edəcək və bu da onları dolaşan döyüş sursatları və artilleriya atəşi qarşısında daha həssas edəcək.
Demək olar ki, dörd illik amansız döyüşlərdən sonra ukraynalılar vətənlərini Rusiya təcavüzündən qorumaq üçün yeni üsullara sərmayə qoymaq bacarıqları ilə təəccübləndirməyə davam edirlər.
Sevinc Əliyeva
Ordu.az
