Türkiyə mətbuatında nəşr edilən yanğının binanın damında baş verdiyi və daha sonra mərtəbələrə keçməsi ilə bağlı ilkin xəbərlər təsdiqini tapmayıb. Daha etibarlı məlumata görə, yanğın otelin restoranında başlayıb. Türkiyənin mədəniyyət və turizm naziri Mehmet Nuri Ersoy oteldə yanğın təhlükəsizliyi sertifikatının olduğunu açıqlayıb. Bolu bələdiyyə başçısı Tanju Özcan bu açıqlamanı təkzib edib.
Yanvarın 21-də Türkiyənin daxili işlər naziri Əli Yerlikaya Boluya səfər edib. O, vəziyyətlə yerindəcə tanış olaraq və ilkin nəticəni nəzərə alaraq, ölkənin və onun 85 milyon vətəndaşının ürəyini parçalamış cinayətkarların cəzasız qalmayacağını bildirib. Türkiyə mətbuatı yanğının səbəblərini araşdırmaq üçün cinayət işi açıldığını, bir neçə nəfərin həbs edildiyini yazır.
Onların sayı və kimliyi ilə bağlı məlumatlar ziddiyyətlidir. “Turkgazetesi”nin məlumatına görə, “Grand Kartal” otelinin sahibi də daxil olmaqla, 9 nəfər saxlanılıb. Təbii fəlakətdən sağ çıxan bir neçə nəfər otel otaqlarında yanğın həyəcan siqnalının səslənmədiyini deyib. Daxili İşlər Nazirliyindəki bir mənbə bildirib ki, mehmanxana kompleksi nəqliyyat vasitələri üçün yalnız ön tərəfdən yaxınlaşmaq imkanına malikdir.
Onun qiymətləndirməsinə görə, yanğınsöndürən avtomobillər binanın əks tərəfinə də yaxınlaşa bilsəydi, insan itkiləri müqayisə olunmayacaq dərəcədə az olardı. Türkiyə mətbuatının nəşrlərindən belə anlaşılır ki, Bolu bələdiyyə başçısı müxalif Cümhuriyyət Xalq Partiyasını təmsil edir. Belə bir təəssürat var ki, o, “Grand Kartal” otelinin və dağ-xizək kurortunun sahibləri ilə sövdələşməyə daxil olmaqda və təhlükəsizlik tədbirləri görməməkdə ittiham olunur. Bolu bələdiyyə başçısı da öz növbəsində Mədəniyyət və Turizm Nazirliyini günahlandırır.
Yanğının səbəbləri ilə bağlı aparılan araşdırmalar çərçivəsində həbs olunanlara qarşı hansı ittihamlar irəli sürüləcək? Daxili işlər naziri artıq onların cəzalandırılacağını açıqlayıb. İstintaq hansı fərziyyə ilə başlayıb? Söhbət xidməti səhlənkarlıqdan, yoxsa hansısa qəsdlikdən gedir? Fəlakətdən sağ çıxanların bəziləri uzun müddət kömək gözlədiklərini bildiriblər. Çoxları otelin çarpayılarını bir-birinə bağlayaraq, ikinci və üçüncü mərtəbələrdən qaçıblar.
Ölənlərdən yalnız 41-nin cəsədi yaxınlarına təhvil verilib, digərlərindən, mətbuatın qeyd etdiyi kimi, “yalnız kül qalıb”. Türkiyədə gərginlik o həddə çatıb ki, prezident Ərdoğan ötən il yerli özünüidarəetmə orqanlarının rəhbərlərinə açıq mətnlə müraciət edib: “Ya işləyin, ya da gedin”. Yanğın xəbərinin yayılmasından sonra iqtidaryönlü KİV-lər Cümhuriyyət Xalq Partiyasının lideri Özgür Özəli partiyadaxili tədbiri ləğv etmədiyi üçün sərt şəkildə tənqid edib.
Özəl qarşı çıxaraq bildirib ki, o, 6 saat ərzində aidiyyatı orqanlarla əlaqə saxlayıb, onu hadisənin neytallaşdırıldığına, xəsarət alanların olmadığına əmin ediblər. Türkiyə prezidenti bu yaxınlarda bir şüar elan edib: terror aradan qaldırılmalıdır. İstintaq orqanlarının “Grand Kartal” otelində baş verən yanğını terror aktı kimi qiymətləndirəcəyi istisna edilmir.
Asif Cəfərov
Ordu.az
