Ordu.az xəbər verir ki, Almaniyanın “Diehl Defence” şirkəti tərəfindən istehsal edilən sistem Estoniya Hava Hücumundan Müdafiə Qanadına təqdim olunub və ölkənin orta mənzilli hava hücumundan müdafiə imkanlarının əsasını təşkil edib.
“Ämari” aviabazasında qəbul edilən sistem sayəsində Estoniya Silahlı Qüvvələri mövcud qısa mənzilli hava hücumundan müdafiə sistemləri ilə müqayisədə daha uzaq məsafələrdə və daha yüksək hündürlüklərdə hava təhdidlərinə qarşı fəaliyyət göstərə biləcək.
Estoniya Hərbi Hava Qüvvələrinin komandanı briqada generalı Riivo Valge bildirib ki, bu təhvil ölkənin hava hücumundan müdafiə sisteminin formalaşdırılması baxımından mühüm mərhələdir.
Onun sözlərinə görə, sistemin operator hazırlığı və inteqrasiya prosesi müəyyən vaxt aparacaq, lakin buna baxmayaraq Estoniyanın hava hücumundan müdafiə imkanlarında ciddi irəliləyiş əldə olunacaq.
Valge vurğulayıb ki, sistemin ən mühüm üstünlüyü yüksək hündürlükdə hədəfləri məhv etmək qabiliyyətidir. O qeyd edib ki, IRIS-T SLM-in xidmətə qəbulundan sonra potensial rəqiblər uçuş planlarını və əməliyyat üsullarını yenidən nəzərdən keçirməli olacaqlar.
Ukraynada döyüş şəraitində özünü doğruldan sistem
IRIS-T SLM təyyarələrə, helikopterlərə və qanadlı raketlərə qarşı istifadə üçün hazırlanmış orta mənzilli hava hücumundan müdafiə sistemidir.
Sistem təxminən 40 kilometr mənzilə, 20 kilometr hündürlükdə hədəf məhv etmə imkanına, yüksək mobilliyə və qısa müddətdə yenidən yerləşdirilmə qabiliyyətinə malikdir.
Mobil quruluşu sayəsində sistem dəyişən təhlükə mühitinə sürətlə uyğunlaşa bilir və düşmənin hava vasitələrinin fəaliyyət imkanlarını əhəmiyyətli dərəcədə məhdudlaşdırır.
Estoniyanın müdafiə naziri Hanno Pevkur bildirib ki, Ukraynada effektivliyini sübut edən IRIS-T SLM ölkənin hava hücumundan müdafiə imkanlarını əhəmiyyətli dərəcədə gücləndirəcək.
Üç atəş bölməsi alınacaq
IRIS-T SLM tədarükü Estoniya və Latviyanın 2023-cü ildə “Diehl Defence” ilə imzaladığı birgə müqavilə çərçivəsində həyata keçirilir.
Estoniya Müdafiə İnvestisiyaları Mərkəzi ölkənin Silahlı Qüvvələri üçün ümumilikdə üç IRIS-T SLM atəş bölməsi sifariş edib. İlk sistem artıq təhvil verilib, qalan iki sistemin isə 2027-ci ildə çatdırılması planlaşdırılır.
Bir IRIS-T SLM kompleksi bir neçə raket buraxıcı qurğu, çoxməqsədli radar, taktiki idarəetmə mərkəzi, yenidən yükləmə maşınları, texniki xidmət və logistika vasitələrindən ibarətdir.
Bu quruluş sayəsində sistem həm müstəqil şəkildə fəaliyyət göstərə, həm də daha geniş hava hücumundan müdafiə şəbəkələrinə inteqrasiya oluna bilir.
Sevinc Əliyeva
Ordu.az
