Ordu.az xəbər verir ki, Arizona ştatındakı “Yuma” sınaq poliqonunda keçirilən sınaq zamanı üçüncü qrup sinfinə aid kamikadze tipli pilotsuz uçuş aparatı JAGM raketi ilə məhv edilib.
Şirkətin məlumatına görə, sınaq zamanı “Fortem” R-40 radarları hədəfi aşkarlayaraq izləməyə başlayıb. Daha sonra Sanctum C-UAS döyüş idarəetmə sistemi qarşıdurma prosesini idarə edib və GRIZZLY buraxılış qurğusundan atılan JAGM (Joint Air-to-Ground Missile) raketi hədəfi uğurla vurub.
“Lockheed Martin” bildirib ki, həyata keçirilən sınaq aşkarlama, izləmə, qərar qəbuletmə və məhvetmə mərhələlərini əhatə edən tam antidron zəncirinin uğurla işlədiyini nümayiş etdirib. Şirkət həmçinin vurğulayıb ki, sistem inteqrasiyası və canlı atış sınaqları 45 gündən az müddətdə tamamlanıb. Bu isə həllin qısa müddətdə əməliyyat istifadəsinə uyğunlaşdırıla bildiyini göstərir.
GRIZZLY radarlar, döyüş idarəetmə sistemləri və raket həlləri ilə inteqrasiya oluna bilən konteyner tipli mobil buraxılış sistemi kimi hazırlanıb. Sistem geniş infrastruktur tələbi olmadan quru bazalarına və ya dəniz platformalarına yerləşdirilə bilir.
Şirkətin məlumatına görə, GRIZZLY paylanmış əməliyyat konsepsiyalarına uyğun şəkildə hazırlanıb və kiçik logistik yük hesabına sürətli yerləşdirmə imkanı təqdim edir.
Sistem simsiz rabitə infrastrukturu vasitəsilə radarlar və komanda-idarəetmə elementləri ilə qısa müddətdə əlaqə yarada bilir. Bildirilir ki, aşağı qiymətli kommersiya sensorlarından istifadə edə bilən sistem səkkiz raket daşımaq qabiliyyətinə malikdir.
Alətsiz yenidən doldurma xüsusiyyəti sayəsində texniki xidmət və istismar xərcləri azaldılır, eyni zamanda yüksək atəş gücü qorunub saxlanılır. “Sanctum” C-UAS həlli radarları, komanda-idarəetmə şəbəkəsini, buraxılış qurğularını və müxtəlif önləmə vasitələrini vahid arxitekturada birləşdirir. “Lockheed Martin” sistemin birinci qrupdan dördüncü qrupa qədər müxtəlif siniflərə aid pilotsuz uçuş aparatlarına qarşı istifadə oluna biləcəyini açıqlayıb.
Şirkətin qiymətləndirməsinə görə, bu həll qabaqcıl əməliyyat bazalarının, kritik obyektlərin, hərbi birliklərin və dəniz platformalarının mühafizəsində istifadə edilə bilər. Sınaqda istifadə olunan JAGM raketi yarıaktiv lazer və millimetr diapazonlu radar yönəltməsini birləşdirən iki rejimli axtarış başlığı ilə təchiz olunub. Bu xüsusiyyət müxtəlif təhdidlərə qarşı təbəqəli müdafiə imkanları yaradır.
“Lockheed Martin”in Qabaqcıl Proqramlar üzrə vitse-prezidenti Rendi Krayts bildirib ki, sınaq müxtəlif proqramlar arasında qurulan əməkdaşlıq sayəsində qısa müddətdə həyata keçirilib. Onun sözlərinə görə, bu sınaq modul quruluşa malik və münasib qiymətli nöqtə müdafiə həllinin sürətlə genişləndirilə və müxtəlif əməliyyat mühitlərində istifadə oluna biləcəyini nümayiş etdirib.
Sevinc Əliyeva
Ordu.az
