Ordu.az xəbər verir ki, təxminən 3,3 milyard avro dəyərində olan proqram Rumıniyanın NATO-ya qoşulmasından sonra həyata keçirdiyi ən böyük quru platformalarının modernləşdirilməsi layihələrindən biri hesab olunur.
Mayın 29-da elan edilən müqaviləyə əsasən, Rumıniya ordusunun inventarında olan sovet mənşəli MLI-84 və MLI-84M maşınları yeni nəsil “Lynx” KF41 platformaları ilə əvəz olunacaq.
Proqramın ilk mərhələsində 232 maşın tədarük ediləcək, ikinci mərhələdə isə daha 66 maşın ordunun inventarına daxil olacaq. Müqavilənin diqqətçəkən tərəflərindən biri genişmiqyaslı yerli istehsal və texnologiya transferi paketidir.
“Lynx” platformalarının istehsalı “Rheinmetall”ın Mediaş şəhərində yerləşən “Rheinmetall Automecanica” müəssisəsində həyata keçiriləcək. Bununla da Rumıniya Almaniya və Macarıstandan sonra “Lynx” istehsal edən üçüncü ölkəyə çevriləcək. Rəsmilər proqram çərçivəsində yerli sənayenin iştirak payının minimum 40 faiz təşkil edəcəyini bildiriblər. Həmçinin 200-dən çox Rumıniya şirkətinin tədarük zəncirinə daxil edilməsi planlaşdırılır.
Tədarük paketi yalnız standart piyada döyüş maşınlarını əhatə etmir. Rumıniya komanda-idarəetmə, minaatan daşıyıcısı və tibbi təxliyə tapşırıqları üçün nəzərdə tutulmuş müxtəlif “Lynx” variantlarını da inventarına daxil edəcək. Bu yanaşma mexanikləşdirilmiş bölmələrdə vahid logistika, təlim və texniki xidmət infrastrukturunun yaradılmasını hədəfləyir.
“Lynx” KF41 hazırda xidmətə qəbul edilən ən ağır piyada döyüş maşınlarından biri hesab olunur. Tapşırıq konfiqurasiyasından asılı olaraq təxminən 50 ton kütləyə çata bilən maşın üç nəfərlik ekipaj və səkkiz piyada daşıya bilir. Platforma 1140 at gücünə malik “Liebherr” dizel mühərriki və “Renk” avtomatik transmissiyası ilə təchiz olunur. Bu kombinasiya sayəsində maşın saatda təxminən 70 kilometr maksimal sürətə və 500 kilometr əməliyyat məsafəsinə malikdir.
Rumıniyanın “Lynx” platformalarında “Rheinmetall”ın “Lance 2.0” idarə olunan qülləsindən istifadə etməsi planlaşdırılır. Qüllədə proqramlaşdırılan sursatlardan istifadə edə bilən MK30-2/ABM tipli 30 mm-lik avtomatik top quraşdırılacaq. Sistem səngər arxasında yerləşən hədəflərə və şəhər mühitindəki obyektlərə qarşı hava partlayışlı sursatlardan istifadə edə bilir.
Maşınlara həmçinin “Spike” LR2 tank əleyhinə raketlərinin inteqrasiyası nəzərdə tutulur. Bu, “Lynx” platformalarına uzaq məsafədə zirehli hədəflərə qarşı effektiv döyüş qabiliyyəti qazandıracaq. “Rheinmetall” “Lynx” platforması üçün hazırlanan yeni pilotsuz uçuş aparatlarına qarşı mübarizə paketini də təqdim edib. Sistem APV 100 akustik sensorunu, “Echodyne Echoguard” radarlarını və proqramlaşdırılan sursatlardan istifadə edən 30 mm-lik topu vahid kompleksdə birləşdirir.
Bu sayədə FPV və kiçik pilotsuz uçuş aparatları qısa müddətdə aşkarlanaraq zərərsizləşdirilə bilir. Şirkət bildirir ki, bu həll xüsusilə Ukrayna müharibəsində geniş yayılmış aşağı xərcli pilotsuz uçuş aparatları təhdidlərinə qarşı hazırlanıb. “Lynx” KF41 modul zireh quruluşu sayəsində müxtəlif tapşırıqlara uyğun əlavə mühafizə paketləri ilə təchiz oluna bilir.
Platformada ikiqat döşəmə konstruksiyası, mina və əldəqayırma partlayıcı qurğulara qarşı müdafiə, eləcə də aktiv müdafiə sistemlərinin inteqrasiyası üçün uyğun infrastruktur mövcuddur. “Rheinmetall”ın “StrikeShield” aktiv müdafiə sisteminin gələcəkdə platformaya inteqrasiya olunması planlaşdırılır.
“Lynx” proqramı “Rheinmetall”ın Rumıniyada həyata keçirdiyi daha geniş müdafiə sənayesi investisiyalarının bir hissəsi hesab olunur. Şirkətin Rumıniya ilə imzaladığı ümumi dəyəri təxminən 5,7 milyard avro olan paketə “Skyranger” hava hücumundan müdafiə sistemləri, sursat istehsalı, açıq dəniz patrul gəmiləri və dalğıc dəstək gəmiləri də daxildir.
Tədarükün 2028-2030-cu illərdə həyata keçirilməsi planlaşdırılır. Proqramın həm Rumıniya ordusunun modernləşdirilməsinə, həm də ölkənin müdafiə sənayesi infrastrukturunun inkişafına mühüm töhfə verəcəyi gözlənilir.
Sevinc Əliyeva
Ordu.az
