Ehtiyatda olan general bildirib ki, “cəbhədə bir neçə metrlik irəliləyişlər belə çox böyük itkilər bahasına başa gəlir”. Bundan əvvəl Britaniya kəşfiyyatının məlumatlarına əsaslanan ekspert hesablamalarına görə, Ukrayna ərazisinin bir kvadrat kilometrinin ələ keçirilməsi üçün Rusiya orta hesabla “200-dən çox ölü və təxminən iki dəfə artıq yaralı” verir.
Bu məsələyə toxunan Dövlət Dumasının deputatı qeyd edib ki, Ukrayna “milyonlarla pilotsuz uçuş aparatı istehsal edir” və “əsgər sığınacaqdan başını qaldıran və ya hərbi texnika hərəkətə başlayan kimi Ukraynanın FPV pilotsuz uçuş aparatının zərbəsi ilə üzləşir”. İyunun 3-nə keçən gecə Ukraynanın pilotsuz uçuş aparatları Sankt-Peterburqa və Leninqrad vilayətinə hücum edib. Rusiya rəsmi informasiya vasitələrinin yaydığı məlumata görə, “bir neçə obyektə ziyan dəyib”.
Ukrayna Prezidenti Volodimir Zelenski bildirib ki, zərbə “müharibəyə xidmət edən neft terminalına” endirilib. Ukrayna teleqram kanalları isə Kronştadtda yerləşən “hərbi infrastrukturun məhv edildiyini” iddia edib. Sankt-Peterburqa qarşı pilotsuz uçuş aparatı hücumu Ukrayna tərəfindən iqtisadi forumun açılışından bir neçə saat əvvəl həyata keçirilib. Həmin tədbir Rusiya Prezidenti Vladimir Putinin təşəbbüsü ilə təşkil olunub.
Beləliklə, Ukraynanın hücumu yalnız hərbi deyil, həm də siyasi məna daşıyır. Kiyev açıq şəkildə göstərir ki, Rusiya prezidentinin istənilən tədbirini pozmaq imkanına malikdir. Vladimir Putinin mətbuat katibi Dmitri Peskov TASS-a bildirib ki, Sankt-Peterburqa pilotsuz uçuş aparatı hücumuna cavabı Müdafiə Nazirliyi verməlidir.
İyunun 3-də Rusiya Kiyevə və Ukraynanın bir sıra digər şəhərlərinə raket zərbələri endirib. Nəticədə iyirmidən çox mülki şəxs həlak olub. Raket və pilotsuz uçuş aparatları ilə qarşılıqlı hücumların gücləndiyi bir vaxtda “The New York Times” qəzeti yazıb ki, ABŞ Prezidenti Donald Tramp Pekinə səfəri zamanı Çin lideri Si Cinpinə “Ukrayna müharibəsinin dayandırılmasına kömək etməyi təklif edib”.
Böyük ehtimalla, yaxın aylarda bu istiqamətdə ciddi irəliləyiş olmayacaq. Rusiya Dövlət Dumasına seçkilərə hazırlaşır və Vladimir Putinin atəşkəs təklifinə razılıq verməsi inandırıcı görünmür. Xüsusilə ona görə ki, Ukrayna da öz növbəsində Donetsk vilayətindən qoşunlarını tam çıxarmaqla bağlı Rusiya və ABŞ tərəfindən irəli sürüldüyü bildirilən tələbi rədd edib.
Rusiya mətbuatının məlumatına görə, hakim “Vahid Rusiya” partiyası “xüsusi hərbi əməliyyat” iştirakçısı olan 1400 nəfərdən Dövlət Dumasına deputatlığa namizəd olmaq üçün müraciət alıb. Ukrayna mənbələrinin məlumatına əsasən, yaxın günlərdə general Andrey Qurulyova deputat mandatından imtina etməsi təklif oluna bilər.
Rusiya Dövlət Dumasına seçkilərə “Hər şey cəbhə üçün, hər şey qələbə üçün” şüarı ilə gedəcək. Bir gün əvvəl Vladimir Putin açıqlayıb ki, o, “Böyük Vətən müharibəsi illərinin resepti ilə bişirilmiş çörəkdən dadıb”.
Asif Cəfərov
Ordu.az
