Ordu.az xəbər verir ki, inkişaf fəaliyyətləri zamanı 2,5 kilometr mənzilə malik olan KARAOK seriyalı istehsala daxil edilən son konfiqurasiyada 4 kilometr mənzilə çatıb.

Artırılmış mənzil qabiliyyəti ilə birlikdə piyada bölmələrinin hədəflərə daha təhlükəsiz məsafədən nişanalma həyata keçirməsi hədəflənir. Portativ quruluşu ilə seçilən KARAOK çiyindən atıla bilən qısamənzilli tank əleyhinə raket sistemi kimi hazırlanıb.

Raket üzərində yerləşən infraqırmızı görüntüləyici başlıq sayəsində gecə və gündüz şəraitində fəaliyyət göstərə bilir. 125 mm çaplı sistemin raket və boru daxil olmaqla ümumi çəkisi 16 kiloqramdan azdır.

KARAOK birbaşa zərbə, yuxarıdan zərbə və yaxın məsafədən nişanalma rejimləri ilə müxtəlif hədəf profillərinə qarşı istifadə oluna bilir. Platformada zirehdələn tandem döyüş başlığı yerləşir.

ROKETSAN-ın ən yüngül tank əleyhinə həllərindən biri

KARAOK, OMTAS və UMTAS kimi daha ağır tank əleyhinə sistemlərlə müqayisədə piyada bölmələrinin fərdi istifadəsi üçün hazırlanmış daha yüngül həll kimi ön plana çıxır.

“Atdım-unutdum” istifadə konsepsiyasına malik sistem atışdan sonra operatorun sürətlə mövqe dəyişməsinə imkan yaradır. Yuxarıdan zərbə qabiliyyəti sayəsində isə müasir əsas döyüş tanklarının zəif zireh bölgələrini hədəfə ala bilir.

KARAOK ixracında ilk müştəri Malayziya olub

KARAOK yoxlama və qəbul proseslərinin tamamlanmasından sonra Türkiyə Silahlı Qüvvələrinin inventarına daxil edilmişdi. Sistem eyni zamanda ixrac uğuru ilə də diqqət çəkir.

Malayziya ROKETSAN istehsalı olan KARAOK tank əleyhinə raket sisteminin ilk ixrac müştərisi olub. Razılaşma çərçivəsində çiyindən atılan tank əleyhinə sistemlərin təhvilinin 2026-cı ildən etibarən başlaması planlaşdırılır.

Sevinc Əliyeva
Ordu.az