Ordu.az xəbər verir ki, Türkiyə müdafiə sənayesinin lider şirkəti SARSILMAZ yerli mühəndislik gücü ilə hazırladığı yeni nəsil müdafiə sistemlərini və inteqrasiya edilmiş istehsal qabiliyyətlərini Düzcedəki müəssisələrində mətbuat nümayəndələri ilə paylaşıb.
Təxminən 150 illik istehsal və mühəndislik təcrübəsinə malik olan SARSILMAZ bu gün silah, döyüş sursatı, robot platformalar, uzaqdan idarə olunan sistemlər, orta çaplı həllər, həssas istehsal qabiliyyətləri və inteqrasiya infrastrukturu ilə müdafiə sənayesinə bütüncül həllər təqdim edən texnologiya şirkəti mövqeyindədir.
Düzcedə 120 min kvadratmetr sahə üzərində qurulmuş inteqrasiya edilmiş istehsal müəssisəsi ilə Avropanın ən böyük silah istehsal mərkəzinə sahib olan SARSILMAZ 80-dən çox ölkəyə ixrac edir. Şirkət yüksək həssaslıqlı istehsal infrastrukturu, güclü Ar-Ge qabiliyyəti və qrup şirkətləri ilə yaratdığı ekosistem sayəsində müasir döyüş sahəsinin dəyişən ehtiyaclarına cavab verən həllər hazırlayır. SAHA EXPO 2026-dan əvvəl keçirilən mətbuat turunda SARSILMAZ-ın istehsal gücü, mühəndislik infrastrukturu, keyfiyyətə nəzarət prosesləri, Ar-Ge mərkəzləri və inteqrasiya qabiliyyətləri yerində araşdırılıb.
Akalın: “SAHA EXPO 2026-da inteqrasiya edilmiş müdafiə ekosistemi gücümüzü əks etdirəcəyik”
Mətbuat turundan sonra qiymətləndirmələr edən SARSILMAZ baş direktorunun müavini və “BEST Defence” İdarə Heyətinin üzvü Murat Akalın müasir döyüş sahəsində uğurun artıq tək məhsullardan deyil, bir-biri ilə uyğun şəkildə işləyən inteqrasiya edilmiş sistemlərdən keçdiyini vurğulayıb.
Akalın SARSILMAZ-ın qrup şirkətləri ilə birlikdə yaratdığı strukturun silah sistemləri, döyüş sursatı, uzaqdan idarə olunan sistemlər, robot platformalar və kritik alt komponentləri eyni mühəndislik yanaşması daxilində hazırlayan güclü model təqdim etdiyini bildirərək bunları deyib:
“Bugünkü müdafiə ehtiyacları yalnız yaxşı dizayn edilmiş tək bir məhsulla qarşılana biləcək nöqtəni geridə qoydu. Artıq sahədəki uğuru platforma, sensor, proqram təminatı, döyüş sursatı və silah sistemlərinin birlikdə işləyə bildiyi bütüncül strukturlar müəyyən edir. SARSILMAZ olaraq SAHA EXPO 2026-da tam olaraq bu yanaşmanı ortaya qoyacağıq. SARSILMAZ, “BEST Defence”, “LA2 Dynamics”, “TR Mekatronik”, BPS və ÜNİMETAL ilə birlikdə yalnız məhsullarımızı deyil, ucdan-uca həll istehsal edən müdafiə ekosistemi vizyonumuzu sərgiləyəcəyik”.
Akalın bu yanaşmanın SARSILMAZı klassik istehsalçı kimliyindən kənara çıxardığını ifadə edərək deyib: “İstifadəçilərin dəyişən ehtiyaclarını düzgün oxumaq, bu ehtiyaclara sürətli cavab vermək və müxtəlif sistemləri eyni arxitektura daxilində uyğunlaşdırmaq müdafiə sənayesində yeni dövrün ən kritik qabiliyyətləri arasında yer alır. SARSILMAZ olaraq bu qabiliyyəti sahəyə əks etdirən inteqrasiya edilmiş struktur təqdim edirik”.
Latif Aral Aliş: “Hədəfimiz türk mühəndisliyini qlobal miqyasda daha güclü mövqeyə daşımaqdır”
SARSILMAZ İdarə Heyətinin sədri Latif Aral Aliş isə şirkətin təxminən 150 ilə dayanan tarixi təcrübəsini bugünkü müdafiə texnologiyaları ilə birləşdirən güclü transformasiya içində olduğunu bildirib. Aliş SARSILMAZ-ın 1880-ci ildə Elazığda başlayan yolçuluğunun bu gün qlobal miqyasda rəqabət aparan mühəndislik və texnologiya gücünə çevrildiyini ifadə edərək bunları deyib:
“1880-ci ildə Elazığda başlayan yolçuluğumuz bu gün təxminən 150 ilə çatan köklü mühəndislik, istehsal və texnologiya təcrübəsinə çevrilmiş vəziyyətdədir. Bu prosesdə biz yalnız dəyişən ehtiyaclara uyğunlaşan şirkət olmadıq, bu ehtiyacları öncədən görən, texnologiya ilə cavab verən və müdafiə sənayesinin transformasiyasına töhfə verən struktur inşa etdik. Bu gün bir hərbi birliyin ehtiyaclarını ucdan uca qarşılaya biləcək məhsul müxtəlifliyinə sahib, dünyanın sayılı müdafiə sənayesi şirkətlərindən biri və eyni zamanda güclü texnologiya şirkəti mövqeyindəyik. SARSILMAZ tapançalardan avtomatik tapançalara, piyada tüfənglərindən ağır pulemyot və pulemyotlara, 20-25-30 mm çaplı toplara uzanan məhsul müxtəlifliyi ilə hərbi silah istehsalında beynəlxalq aktor mövqeyindədir”.
SARSILMAZ-ın özünü heç vaxt yalnız silah istehsalçısı kimi mövqeləndirmədiyini vurğulayan Aliş deyib: “SARSILMAZ olaraq özümüzü heç vaxt sadəcə istehsalçı kimi görmədik. Türkiyənin müdafiə sənayesindəki texnoloji transformasiyasında aktiv rol alan, mühəndislik yönümlü həllər hazırlayan və müdafiə ekosisteminə istiqamət verən texnologiya şirkəti kimi mövqeləndik. Bu gün gəldiyimiz nöqtədə bir ordunun müxtəlif ehtiyaclarına cavab verə biləcək inteqrasiya edilmiş struktur təqdim edirik. Sahib olduğumuz bilik təcrübəsini dəyişən təhdid qavrayışlarına və istifadəçi ehtiyaclarına görə daim yeniləyirik. Məhsul çeşidimizi genişləndirərkən eyni zamanda ixrac qabiliyyətimizi, istifadəçi etibarını və beynəlxalq təsirimizi də böyüdürük. Fokusunda müdafiə, genlərində texnologiya olan şirkət kimi hədəfimiz aydındır: türk mühəndisliyini qlobal miqyasda daha güclü mövqeyə daşımaq və ölkəmizin müdafiə sənayesindəki təsirini beynəlxalq arenada daha da irəli aparmaq”.
Ucdan-uca inteqrasiya edilmiş həll yanaşması sahədə göstərilib
Proqram çərçivəsində mətbuat nümayəndələri SARSILMAZ-ın Düzcedəki inteqrasiya edilmiş istehsal müəssisəsində Ar-Ge, istehsal, keyfiyyətə nəzarət və inteqrasiya proseslərini yerində araşdırmaq imkanı tapıblar. Səfər boyunca şirkətin “ucdan uca inteqrasiya edilmiş həll” yanaşması istehsal xəttindən son sistem arxitekturasına qədər müxtəlif mərhələləri ilə çatdırılıb.
Mətbuat turunda SAR9 SP “Special” tapançası, SAR “Drone Killer” tüfəngi, SAR 556 MT pulemyotu, SARBOT-un yeni versiyası, “BEST Defence” gizlənə bilən Uzaqdan İdarə Edilən Silah Sistemi və “TR Mekatronik”in 20 mm çaplı 6 lüləli topu SARSILMAZ-ın inteqrasiya edilmiş müdafiə arxitekturasının hissələri kimi tanıdılıb.
“LA2 Dynamics” tərəfindən hazırlanan SARBOT kəşfiyyat-müşahidə və yüksək riskli silahlı müdaxilə tapşırıqlarında insan həyatını riskə atmadan effektiv həll təqdim etmək üçün dizayn edilib. Türkiyənin ilk silahlı robotu kimi mövqelənən SARBOT-un 100% türk mühəndisliyi ilə hazırlanmış yeni versiyasının dünya premyerasının SAHA EXPO 2026-da edilməsi planlaşdırılır.
SARSILMAZ-TUSAŞ tərəfdaşlığı “TR Mekatronik” tərəfindən hazırlanan 6 lüləli 20 mm çaplı top sistemi dizayndan istehsala qədər tamamilə yerli imkanlarla və ixrac məhdudiyyəti yaratmayacaq komponentlərə üstünlük verilərək hazırlanır. 95%-dən yuxarı yerlilik səviyyəsinə sahib olan sistem “TR Mekatronik”in orta çaplı silah sistemləri sahəsində çatdığı mühəndislik səviyyəsinin güclü göstəricisi kimi SAHA EXPO 2026-da sərgilənəcək.
Gizlənə bilən qüllə
“BEST Defence” tərəfindən hazırlanan gizlənə bilən 7.62 mm çaplı Uzaqdan İdarə Edilən Silah Sistemi aşağı radara görünmə və sürətli reaksiya qabiliyyəti tələb edən tapşırıqlar üçün dizayn edilib. 5.56 mm çaplı inteqrasiyaya da imkan verən sistem mülki vasitələrə uyğun strukturu, sabit obyektlərdə aşağı provokasiya riski təmin edən konfiqurasiyası və ehtiyac anında sürətlə aktiv vəziyyətə gəlmə qabiliyyəti ilə SAHA EXPO 2026-da önə çıxan həllər arasında yer alacaq.
Günümüzün ən kritik təhdid başlıqlarından birinə çevrilən pilotsuz uçuş aparatlarına qarşı hazırlanmış SAR “Drone Killer” sistemi və radarlı platformalar da mətbuat turunda önə çıxan həllər arasında yer alıb. Gövdəsi, mexanizmi və uyğun aksesuarları ilə çətin sahə şəraitində yüksək dayanıqlıq və əməliyyat etibarlılığı təmin edəcək şəkildə hazırlanmış sistem məhvetmə ssenarisi üzərindən tanıdılıb.
Türkiyənin yüngül pulemyot ehtiyacına yerli mühəndisliklə həll təqdim etmək üçün hazırlanmış SAR 556 MT isə həm piyada istifadəsi, həm də platforma inteqrasiyasına uyğun strukturu ilə proqramda diqqət çəkən məhsullardan biri olub.
SAR9 SP “Special”
SAR9 SP “Special” Xüsusi Təyinatlı Qüvvələr Komandanlığının əməliyyat ehtiyacları istiqamətində və sahədən əldə edilən real istifadə rəyləri ilə hazırlanmış, SAR9 seriyasının ən qabaqcıl səviyyəli platforması kimi dizayn edilib. Güc, dəqiqlik, dayanıqlıq və əməliyyat çevikliyini eyni strukturda birləşdirən model Xüsusi Təyinatlı Qüvvələr standartında hazırlanmış yüksək performanslı həll kimi təqdim edilib.
SARSILMAZ SAHA EXPO 2026-da qrup şirkətləri ilə birlikdə sərgiləyəcəyi bu bütüncül struktur üzərindən Türkiyə müdafiə sənayesinin mühəndislik, istehsal və inteqrasiya qabiliyyətlərini beynəlxalq miqyasda görünən etməyi hədəfləyir.
Sevinc Əliyeva
Ordu.az
