Ordu.az xəbər verir ki, saziş Albaniyanın dövlət şirkəti “Kayo” ilə İtaliyanın dövlət şirkəti “Fincantieri” arasında paytaxt Tiranada imzalanıb.

İmzalanma mərasimində Albaniyanın baş naziri Edi Rama, müdafiə naziri Ermal Nufi, “Fincantieri”nin baş icraçı direktoru Pierroberto Folgiero və digər rəsmilər iştirak ediblər.

Rama burada etdiyi çıxışda sazişi “ölkənin təhlükəsizliyi və iqtisadiyyatının gələcəyi üçün mühüm an” kimi xarakterizə edib.

Bu təşəbbüsün İtaliya-Albaniya əməkdaşlığı ilə gəmiqayırma zavodu sektorunda mükəmməllik, ölkəyə yenilik və qabaqcıl texnologiya gətirəcəyini vurğulayan Rama deyib: “Bu saziş bu dəyişikliyi müşayiət edəcək yeni, xüsusi və bənzərsiz bir şey üçün qəti iradə və baxış məqsədi daşıyır”.

Nufi də bu əməkdaşlığın ölkəyə saysız-hesabsız strateji dəyər qazandırdığına diqqət çəkərək deyib: “Bu əməkdaşlıqdan əldə edilən strateji dəyərlər olduqca çoxdur. Albaniya kiçik və orta ölçülü gəmilər üçün “Fincantieri”nin yeni Avropa bazasına çevrilir. “Fincantieri” Albaniyadakı istehsal gücünü genişləndirir və “Kayo” beynəlxalq arxitekturaya malik etibarlı sənaye tərəfdaşı kimi mövqelənir”.

Albaniya hökumətinə görə, layihə ölkənin cənubundakı Vlora şəhərinin Paşalimanı bölgəsində yeni gəmiqayırma zavodunun qurulmasını nəzərdə tutur və burada təxminən 400 nəfərin işlə təmin olunacağı gözlənilir.

İnvestisiyanın dəyərinin 1,2 milyard avroya qədər çatması planlaşdırılır.

“Kayo” müdafiə və təhlükəsizlik sektorunda fəaliyyət göstərən, Albaniya Silahlı Qüvvələrinə və beynəlxalq bazarlara məhsul və xidmət təqdim edən dövlət şirkəti kimi ön plana çıxır.

Sevinc Əliyeva
Ordu.az