Ordu.az xəbər verir ki, ümumilikdə 12 ədədlik sifariş sazişi Peru ilə istehsalçı “Lockheed Martin” arasında imzalanıb.

“Lockheed Martin”in açıqlamasında qeyd olunub ki, bu alış Perunun milli suverenliyini gücləndirəcək, regional təhlükəsizliyə töhfə verəcək və ABŞ ilə uzunmüddətli strateji tərəfdaşlığını möhkəmləndirəcək.

Müqavilədə 12 ədəd dəqiq sifarişlə yanaşı, daha 12 ədəd dəqiq sifarişə çevrilə bilən opsion da mövcuddur. Təyyarələrin təhvilinin 2029-cu ilin sonunda başlaması planlaşdırılır.

İstehsalda olan ən qabaqcıl F-16 versiyası

F-16 “Block 70” hazırda istehsalda olan ən yeni və ən qabiliyyətli F-16 modeli kimi önə çıxır. Uzun xidmət müddəti, aşağı ömürboyu əməliyyat xərci və güclü qlobal dəstək şəbəkəsi ilə diqqət çəkən təyyarə qabaqcıl radar, sensor və silah sistemləri ilə pilotlara yüksək situasiya məlumatlılığı və mühafizə təmin edir.

“Lockheed Martin Integrated Fighter Group”un vitse-prezidenti Mayk Şumeyker bildirib: “Perunun F-16 seçimi təyyarənin bənzərsiz əməliyyat göstəricilərini və döyüş tarixçəsini bir daha sübut edir. Ən qabaqcıl F-16 “Block 70”in Perunun milli suverenliyinin qorunmasında və iki ölkə arasındakı tərəfdaşlığın güclənməsində mühüm rol oynayacağından qürur duyuruq”.

Təyyarələr “Lockheed Martin”in Cənubi Karolina ştatının Qrinvill müəssisələrində istehsal olunacaq. Peru F-16 operatoru olan 30-cu ölkə olacaq. Hazırda dünyada 29 ölkədə 2800-dən çox F-16 aktiv xidmətdədir. Bu alış Peru Hərbi Hava Qüvvələrinin döyüş təyyarəsi parkının yenilənməsində böyük addım hesab olunur.

Bu müqavilə ABŞ-Peru müdafiə sənayesi əməkdaşlığını da gücləndirərək iqtisadi və sənaye imkanları yaradacaq. İlk təyyarələrin qarşıdakı illərdə təhvil verilməsi gözlənilir.

Sevinc Əliyeva
Ordu.az