Ordu.az xəbər verir ki, sınaq çərçivəsində aparatın üzərinə quraşdırılmış ötürücü sabit qanadlı pilotsuz uçuş aparatının alt hissəsində yerləşdirilən antena massivinə naqilsiz şəkildə enerji ötürüb.
Sistem sayəsində pilotsuz uçuş aparatı 15 metr hündürlükdə 3,1 saata qədər havada qala bilib.
Bu işin quru qüvvələrinin əməliyyat mənzilini artıraraq daha uzunmüddətli kəşfiyyat, zərbə və radioelektron mübarizə tapşırıqlarının icrasına töhfə verməsi hədəflənir.
Texnoloji məhdudiyyətlər və gələcək potensial
Sözügedən texnologiya daha uzun havada qalma müddəti ilə yanaşı, pilotsuz uçuş aparatı üzərində batareya ehtiyacını azaldaraq daha böyük faydalı yüklərin daşınmasına da imkan yarada bilər.
Lakin əldə olunan müsbət nəticələrə baxmayaraq, mikrodalğa ilə enerji ötürmə sistemləri ciddi məhdudiyyətlərlə üz-üzədir. Mövcud sistemin səmərəliliyi cəmi 3-5 faiz səviyyəsində qalır, ötürülən enerjinin böyük hissəsi itirilir.
“South China Morning Post”a danışan çinli hərbi analitik bildirib: “Bu iş daha çox gələcək imkanları araşdırmağa yönəlib. Konsepsiya ümidverici olsa da, səmərəlilik və etibarlılıq əməliyyat istifadəsinə uyğun səviyyədən hələ də uzaqdır”.
Tədqiqatçılar həmçinin ötürücü ilə pilotsuz uçuş aparatı arasında dəqiq hizalamanın qorunması məsələsində də çətinlik yaşayıblar. Bu problemin həlli üçün GPS məlumatları, dinamik izləmə sistemləri və uçuş nəzarət mexanizmləri inteqrasiya edilərək enerji şüasının hədəfdə qalması təmin olunub.
Bu yanaşma sayəsində platformalar hərəkətdə olarkən və ətraf mühit şəraiti dəyişərkən belə enerji ötürülməsinin sabit şəkildə davam etdirilə bildiyi bildirilib.
Tədqiqatın nəticələri “Xidian” Universitetindən bir qrup tərəfindən resenziyalı “Aeronautical Science & Technology” jurnalında dərc olunub.
Sevinc Əliyeva
Ordu.az
