Ordu.az xəbər verir ki, bunu “İşıqlı Ermənistan” partiyasının lideri Edmond Marukyan deyib.
“Bu söhbəti onlar, məsələn, Serj Sarkisyanla, xarici işlər naziri ilə, ATƏT-in Minsk qrupu çərçivəsində aparıblar, müxtəlif adlarla bu mövzu daim müzakirə olunub, amma erməni xalqına açıq şəkildə deyilməyib. Rusiya tərəfinin səhvi məhz bundadır ki, erməni xalqına deyilməyib: əziz xalq, sizi bu gözləyir, sizin hakimiyyət sizi aldadır. Bu barədə açıq danışılmayıb, əksinə, burada təbliğat aparılıb ki, biz Avrasiya İqtisadi Birliyinə ona görə qoşuluruq ki, nəticədə Qarabağı qoruyacağıq, bu isə açıq yalan idi. Parlamentdə biz Avrasiya İqtisadi Birliyinə qarşı çıxanda, yeddi deputat olaraq əleyhinə səs verəndə deyirdik ki, bunu təhlükəsizlik üçün edirlər.
Bu aldatma 2018-ci il inqilabına gətirib çıxardı, tank alanlar getdilər, vergi ödəmirdilər, amma tank alırdılar, beləliklə, həmin “balon” partladı, havaya uçdu və 2020-ci il müharibəsi baş verdi. Biz bu dağıdıcı nəticələrə gəlib çıxdıq.
Nikol Paşinyan indi deyir ki, müharibə olacaq. Biz isə deyirik ki, o seçilsə də müharibə olacaq, amma seçilməsə, müharibənin olmaması üçün şans var, lakin seçilərsə, mütləq müharibə olacaq, iqtisadi müharibə, adi müharibə, konvensional müharibə olacaq. O, bu barədə davamlı danışır, amma əsas məsələ nədir?”, - deyə Marukyan qeyd edib.
O bildirib ki, 2019-cu ildə Ermənistan sakinlərini aldadıblar, həqiqəti deməyiblər, 2020-ci ildə isə müharibə baş verib.
“Bu gün artıq qeyd olunur ki, bizi aldadıblar, davamlı şəkildə aldadıblar, müxtəlif mətnlər təqdim ediblər, 2025-ci ildə gəlib tribunadan dedilər ki, bəli, sülh planı olub, biz onu rədd etmişik və sizi müharibəyə aparmışıq. Bugünkü hakimiyyət budur və biz hamımız artıq reallığı bilirik.
İndi Rusiya bizi təhdid etmir, sadəcə həqiqəti deyir: siz qərar verin, 187 dollarlıq qaz istəyirsinizsə, bizimlə əməkdaşlığı bu cür davam etdirməlisiniz, əgər bizim düşmənimiz olmağa qərar vermisinizsə, qazın qiyməti 600 dollar olacaq. Yəni rusların o vaxtkı səhvinin nəticəsində bu gün xalqın böyük bir hissəsi Rusiyaya qarşı çıxır və bu Rusiyaya qarşı münasibəti Nikol Paşinyan kapitallaşdırmaq, səsə çevirmək, seçkilərdə bununla yenidən seçilmək istəyir. Bunun Avropaya, Qərbə, NATO-ya getməklə heç bir əlaqəsi yoxdur.
Amma bunun nəticəsində zərər çəkən biz oluruq, başa düşürsünüzmü? Biz hər hansı bir supergücə nifrət edən ölkəyə çevrildikdə, bu gün Ermənistan belə ölkəyə çevrilib və bu prosesi Paşinyan aparır. Sadə xalq olaraq zərəri biz çəkəcəyik.
İndi başa düşürsünüz ki, hakimiyyət elə etmək istəyir ki, qazın qiyməti 600 dollar olsun. İnsanlar anlamalıdır ki, təhdid, xəbərdarlıq və proqnozu bir-birindən ayıra bilsinlər, kimin kimi təhdid etdiyini başa düşsünlər”, - deyə erməni siyasi xadim bildirib.
Alpər Mövludoğlu
Ordu.az
