Ordu.az xəbər verir ki, 65-dən çox ölkədən 132 min qeydiyyatdan keçmiş ziyarətçi, 1400-dən çox iştirakçı ilə IDEX və NAVDEX 2025 Beynəlxalq Müdafiə Sərgisi və Konfransı Birləşmiş Ərəb Əmirliklərinin paytaxtı Əbu-Dabidə keçirilir.
Məlumata görə, sərgi başlayandan yerli və xarici şirkətlər arasında ümumi dəyəri 9,77 milyard AED olan 18 müqavilə imzalanıb.
Türkiyə Müdafiə Sənayesi Komitəsinin rəhbərliyi, Müdafiə və Aviasiya Sənayesi İxracatçıları Birliyinin dəstəyi ilə IDEX və NAVDEX 2025 sərgilərində Türkiyənin 90 müdafiə sənayesi şirkəti iştirak edir.
Dünyanın müxtəlif ölkələrindən, xüsusilə də Körfəz ölkələrindən rəsmi nümayəndə heyətlərinin və müdafiə sənayesi istehsalçılarının iştirakı ilə keçirilən sərgidə yeni müdafiə texnologiyaları ziyarətçilərə təqdim olunur.
5 gün davam edəcək tədbirdə beynəlxalq konfranslar, yüksək səviyyəli dəyirmi masa görüşləri, İnnovasiya səyahəti və “IDEX Talks” kimi bir çox mühüm tədbirlərin keçirilməsi planlaşdırılır.
Sevinc Əliyeva
Ordu.az
