Ordu.az xəbər verir ki, “Airbus Defence and Space” şirkəti Fransa Müdafiə Təchizat Agentliyi adından çıxış edən OCCAR təşkilatı ilə Paralel Missiya Sistemi proqramının hazırlanmasına dair müqavilə imzalayıb.
Layihə çərçivəsində Fransa Hərbi Hava Qüvvələrinin A400M təyyarələri kəşfiyyat, müşahidə və hədəf aşkarlama, komanda-idarəetmə və birgə əməliyyatların koordinasiyası imkanları ilə təchiz ediləcək.
Proqram çərçivəsində təyyarələrə yeni missiya kompüteri inteqrasiya olunacaq. Həmçinin yük bölməsinə ehtiyac olduqda quraşdırılıb çıxarıla bilən idarəetmə konsolları yerləşdiriləcək.
Bu imkanlar sayəsində A400M müxtəlif sensorlardan daxil olan məlumatları emal edə, taktiki situasiya məlumatlılığı təmin edə və əməliyyatların koordinasiyasını həyata keçirə biləcək.
Layihə çərçivəsində elektro-optik sensorların inteqrasiyası da nəzərdə tutulur. Bununla da A400M yalnız nəqliyyat təyyarəsi deyil, həm də kəşfiyyat və müşahidə platforması kimi istifadə ediləcək.
Modernizasiya proqramının ən diqqətçəkən xüsusiyyətlərindən biri insansız sistemlərlə inteqrasiya imkanlarıdır. “Airbus”ın məlumatına görə, sistem əlavə sensorların, rabitə sistemlərinin və missiya avadanlıqlarının inteqrasiyasına şərait yaradacaq.
Bundan əlavə, təyyarənin yük bölməsindən buraxılan pilotsuz uçuş aparatlarının, sursatların və raketlərin idarə olunması da mümkün olacaq.
“Airbus” şirkətinin Fransa üzrə A400M proqram direktoru Antonio Suares Ameyva bildirib ki, Paralel Missiya Sistemi gələcəkdə A400M platformasının insansız sistemlərlə tam inteqrasiya olunmuş əməkdaşlıq əsaslı döyüş platformasına çevrilməsi istiqamətində ilk addımdır.
Modernizasiyanın yekun məqsədi A400M-ni birgə əməliyyatlarda iştirak edən bütün qüvvələr arasında koordinasiya mərkəzinə çevirməkdir. Bu çərçivədə təyyarə heyəti quru qoşunları, “Tiger” hücum helikopterləri, H225M “Caracal” ümumi təyinatlı helikopterləri və döyüş təyyarələrinin iştirak etdiyi əməliyyatları vahid platformadan koordinasiya edə biləcək.
Fransa ilkin mərhələdə 20 A400M təyyarəsini bu imkanlarla təchiz etməyi planlaşdırır. İlk sistemlərin 2027-ci ildə inteqrasiyası, uçuş sınaqlarının isə 2028-ci ildə başlanması nəzərdə tutulur. Sertifikatlaşdırma prosesinin 2029-cu ildən əvvəl başa çatdırılması planlaşdırılır.
“Airbus” şirkəti Paralel Missiya Sistemi proqramı ilə yanaşı, A400M üçün digər yeni konsepsiyalar üzərində də işləyir. Bunlara uzaqmənzilli radioelektron mübarizə imkanları, havada pilotsuz uçuş aparatı və raket daşıyan “ana gəmi” konsepsiyası, faydalı yük tutumunun 40 tona çatdırılması və yanğınsöndürmə missiyaları daxildir.
Şirkət həmçinin A400M platformasının radioelektron mübarizə tapşırıqlarında istifadəsi istiqamətində işləri davam etdirir. Hazırlanan konsepsiyaya əsasən, təyyarə uzaqdan idarə olunan daşıyıcı sistemlər və radioelektron mübarizə vasitələri ilə birlikdə dost qüvvələr üçün qoruyucu elektron mühafizə zonası yarada biləcək.
Bu proqramlar A400M platformasının yalnız strateji və taktiki nəqliyyat təyyarəsi kimi deyil, gələcəyin şəbəkə əsaslı əməliyyat mühitində çoxməqsədli platforma kimi fəaliyyət göstərməsinə imkan yaradacaq.
Sevinc Əliyeva
Ordu.az
