Britaniya Ordusu təxminən 45 mil məsafədəki hədəfləri vura bilən ən müasir artilleriya silahını nəzərdən keçirir.
Böyük Britaniya yaxın zamanda Almaniya ilə “Rheinmetall” şirkətinin RCH 155 artilleriya sisteminin tədarükü üçün müqavilə imzalayıb.
RCH 155 topu haqqında
Dəyəri 70 milyon dollar (52 milyon funt-sterlinq) olan müqavilə RCH 155 ən müasir hərbi artilleriya sisteminin bir Erkən İmkan Nümayişçisi (ECD) platforması üçündür. Almaniya belə platformalardan iki ədəd alacaq.
Britaniya ordusu RCH 155-i mobil atəş platforması tələbatı üçün uzunmüddətli həll kimi nəzərdən keçirir. Silah Böyük Britaniyada istehsal olunan “Boxer” zirehli maşının üzərinə quraşdırılacaq. Mövcud sınaq məlumatlarına görə, RCH 155 dəqiqədə səkkiz mərmi ata bilir, mövqeyini dəyişmədən istənilən istiqamətdə hədəfləri vura bilir və yanacaq doldurmadan təxminən 435 mil məsafə qət edə bilir. Artilleriya sisteminin idarə olunması üçün cəmi iki heyət üzvü tələb olunur.
RCH 155-in bəlkə də ən ümidverici xüsusiyyətlərindən biri hərəkət zamanı atəş aça bilməsidir. Atəş açmazdan əvvəl dayanıb mövqe tutmalı olan ənənəvi özüyeriyən artilleriya sistemlərindən fərqli olaraq, RCH 155 hərəkətdə olarkən atəş aça bilir. Bu isə onun effektivliyini artırmaqla yanaşı, düşmənin əks-artilleriya atəşindən yayınmaq şansını da yüksəldir.
Müqavilənin bir hissəsi kimi, hər iki ölkə atəş sınağı məlumatlarını və obyektlərini bölüşəcək ki, həm Britaniya ordusu, həm də “Bundeswehr” eyni silah sistemini əldə etsin.
“Bu birgə satınalma 2024-cü ilin oktyabrında imzalanmış “Trinity House” sazişi çərçivəsində Böyük Britaniya ilə Almaniya arasında müdafiə sahəsində əməkdaşlığın dərinləşdiyini nümayiş etdirir. Bu, hər iki ölkəni hərbi əməkdaşlığa öhdəlik götürməyə çağıran tarixi müdafiə sazişidir”, - deyə Britaniya hökuməti Almaniya ilə razılaşma barədə bildirib.
Britaniya ordusunun artilleriyaya diqqət yetirməsi məqsədəuyğundur. Ukraynadakı münaqişə göstərdi ki, Fransa imperatoru Napoleon Bonapartın (Bonapart özü də yüksəlməzdən əvvəl artilleriya zabiti olmuşdu) bu silah növünə “döyüşün kralı” adını verməsindən 200 ildən çox vaxt keçməsinə baxmayaraq, artilleriya hələ də həlledici rol oynayır. Təxminən dörd il ərzində həm Ukrayna, həm də Rusiya qüvvələri rəqibi tükəndirmək, ərazini nəzarətdə saxlamaq, möhkəmləndirilmiş mövqeləri dağıtmaq və düşmən atəşini susdurmaq üçün artilleriya atəşinə arxalanıblar.
“Britaniya ordusu tezliklə hərəkətdə atəş aça bilən yeni artilleriya sisteminə sahib olacaq. Bu, Ukraynadan çıxarılan dərslərə əsaslanır və ordumuza 70 kilometr məsafədəki hədəfləri vurmağa, cavab atəşindən sürətlə uzaqlaşaraq yenidən atəş açmağa imkan verəcək”, - deyə müdafiə hazırlığı və sənaye naziri Lyuk Pollard hökumətin mətbuat açıqlamasında bildirib.
Pollard, həmçinin qeyd edib: “Ukraynadakı müharibə sürətli atəş açmaq və hərəkət etmək bacarığının vacibliyini nümayiş etdirdi. Məhz bu dərslər satınalma qərarlarımızı formalaşdırır və Strateji Müdafiə İcmalını həyata keçirməyimizə kömək edir”.
Britaniya ordusu artilleriyasını Ukraynaya verdi, indi isə daha çoxuna ehtiyac duyur
Britaniya ordusunun özüyeriyən artilleriya sisteminə təcili ehtiyacı var. London özünün bütün AS90 155 millimetrlik özüyeriyən haubitsalarını Ukraynaya təhvil verib. RCH 155 istismara verilənədək keçid həlli kimi London İsveçdən 14 ədəd “Archer” 155 millimetrlik özüyeriyən artilleriya sistemi alıb.
Bundan əlavə, Britaniya ordusu M270 Yaylım Atəşli Reaktiv Sistemindən (MLRS) istifadə edir. Tırtıllı raket artilleriya sistemi olan M270 MLRS və onun təkərli analoqu olan M142 Yüksək Hərəkətlilikli Raket Artilleriya Sistemi (HIMARS) Ukraynada son dərəcə effektiv olduğunu sübut edib.
Dəyanət Ağalarlı
Ordu.az
