Ordu.az xəbər verir ki, Türkiyənin və Avropanın ən böyük müdafiə, aviasiya və kosmik sənaye klasteri olan “SAHA İstanbul” tərəfindən təşkil edilən SAHA 2026 Beynəlxalq Müdafiə, Aviasiya və Kosmik Sənaye Sərgisi 2026-cı il mayın 5-dən 9-dək İstanbul Sərgi Mərkəzində keçiriləcək.
“Anadolu” agentliyinin “Texnologiyanın ürəyi SAHA-da döyünəcək” adlı materiallar silsiləsinin onuncu xəbərində insansız dəniz platformalarının əməliyyat imkanlarını artıracaq rabitə həllinə yer verilib.
Müdafiə sənayesi üçün antena və rabitə sistemləri hazırlayan və istehsal edən “NETA Elektronik” hava, quru və dəniz platformaları üçün yüksək texnologiyalı həllər təqdim edir.
NETA şirkəti dəniz platformaları üçün hazırladığı yeni həlli SAHA 2026-da təqdim edəcək.
Açıq dənizdə fasiləsiz və etibarlı rabitə ehtiyacı getdikcə daha kritik əhəmiyyət kəsb edir. Çətin dəniz şəraiti və hərəkətdə olan platformalar klassik rabitə həllərini yetərsiz edərkən, NETA bu ehtiyaca “Deniz SOTM” antenası ilə cavab verir.
“Deniz SOTM” gəmi və dəniz vasitələri üçün xüsusi olaraq hazırlanıb və hərəkət zamanı peyk əlaqəsini fasiləsiz saxlayan yeni nəsil peyk rabitə həlli kimi fəaliyyət göstərəcək.
Qabaqcıl izləmə qabiliyyəti sayəsində antena peyki daimi izləyərək əlaqənin kəsilməsinin qarşısını alır.
“Deniz SOTM” inkişaf edən pilotsuz dəniz vasitələri ekosisteminə uyğun şəkildə müxtəlif ölçü və konfiqurasiyalarda hazırlanıb. Bu isə yeni nəsil insansız dəniz platformalarında yüksək performanslı və fasiləsiz peyk rabitəsini mümkün edir.
Hərbi dəniz platformalarından kommersiya gəmilərinə, açıq dəniz enerji obyektlərindən şəxsi yaxtalara qədər geniş istifadə sahəsinə malik olan “Deniz SOTM” ilə bütün ssenarilərdə fasiləsiz və etibarlı rabitənin təmin olunması məqsəd qoyulub.
“Deniz SOTM” istifadəçilərə yüksək məlumat ötürmə qabiliyyəti, çətin dəniz şəraitinə davamlı dizayn, stabil və davamlı əlaqə, kritik tapşırıqlar üçün etibarlı rabitə infrastrukturu kimi mühüm üstünlüklər təqdim edir.
Sevinc Əliyeva
Ordu.az
