Ordu.az xəbər verir ki, Türkiyənin və Avropanın ən böyük müdafiə, aviasiya və kosmik sənaye klasteri olan “SAHA İstanbul” tərəfindən təşkil edilən SAHA 2026 Beynəlxalq Müdafiə, Aviasiya və Kosmik Sənaye Sərgisi 2026-cı il mayın 5-dən 9-dək İstanbul Sərgi Mərkəzində keçiriləcək.
2011-ci ildən etibarən müdafiə sənayesində orijinal sistem və alt sistem dizaynları ilə diqqət çəkən “Barko Elektronik” şirkəti yerli istehsal baxışını əks etdirən SAGUN məhsul ailəsini ilk dəfə təqdim edəcək.
Sözügedən məhsullar müxtəlif “dillərə” malik hərbi sistemlərin bir-biri ilə əlaqə qurmasını və ən çətin şəraitdə belə bu əlaqənin kəsilməməsini təmin edir. Funksional baxımdan bu bloklar təyyarə, pilotsuz uçuş aparatı və zirehli texnika kimi platformların “sinir sistemi” komponentləri kimi fəaliyyət göstərir.
Hərbi standartlara uyğun hazırlanmış SAGUN MIL-STD-1553 USB çeviricisi, SAGUN “Ethernet” RS485/RS422 çeviricisi və SAGUN LMU buraxılış qurğusu idarəetmə bloku platformlar arasında məlumat ötürülməsinin etibarlılığını təmin etməyə yönəlib.
SAGUN seriyası ən çətin mühit şəraitində fasiləsiz məlumat axını və sistem idarəetməsi təmin etmək üçün hazırlanıb. Məhsullar elektromaqnit çirklənməsinin yüksək olduğu müasir döyüş meydanlarında etibarlı şəkildə fəaliyyət göstərəcək.
SAGUN MIL-STD-1553 USB çeviricisi avionic sınaqların yeni yardımçısı kimi ön plana çıxır. Aviasiya və müdafiə sistemləri üçün əvəzolunmaz olan MIL-STD-1553 məlumat magistralı bu cihaz vasitəsilə daha əlçatan və daşınan hala gətirilib. İki kanallı quruluşu sayəsində cihaz eyni vaxtda iki müstəqil 1553 məlumat magistralını izləyə bilir, idarəetmə, monitorinq və terminal emulyasiyası funksiyalarını yerinə yetirir. Kompakt quruluşu sayəsində yalnız laboratoriyalarda deyil, uçuş xətlərində və sahə testlərində mühəndislərə yüksək çeviklik verir. Sürücüsüz quraşdırma üstünlüyü əməliyyat sürətini artırır.
SAGUN “Ethernet” RS485/RS422 çeviricisi isə ən çətin mühit şəraitində belə fasiləsiz rabitəni təmin etmək məqsədi ilə hazırlanıb və mexaniki dayanıqlığı ilə seçilir. MIL-STD-810 standartlarına uyğun olan bu blok sızdırmazlıq, zərbə və şokdan qorunma xüsusiyyətlərinə malikdir və passiv soyutma dizaynı sayəsində hərəkətli hissələrə malik deyil. Serial Terminal Server rejimində işləyərək məhdud sahəyə malik platformlarda təhlükəsiz və effektiv rabitə qatını formalaşdırır.
SAGUN LMU buraxılış qurğusu idarəetmə bloku isə buraxılış sistemlərində tam nəzarəti təmin edir. Müasir raket və reaktiv sistemlərin bütün idarəetmə ehtiyaclarını bir mərkəzdə toplayır. Deterministik məlumat idarəetməsi təqdim edən bu blok ehtiyat enerji girişi və yüksək cərəyan qoruması ilə kritik anlarda sistemin fasiləsizliyini təmin edir. Onun çevik arxitekturası müxtəlif buraxılış qurğusu konfiqurasiyalarına sürətli inteqrasiyaya imkan yaradır.
“Barko Elektronik” rəsmiləri SAGUN məhsul ailəsinin yalnız çeviricilər deyil, həm də Türkiyənin müdafiə sənayesində sistem arxitekturası səviyyəsində xarici asılılığı azaldan strateji komponentlər olduğunu vurğulayıb.
Sevinc Əliyeva
Ordu.az
