Ordu.az xəbər verir ki, hadisə barədə “Exilenova+” “Telegram” kanalı məlumat yayıb.

Yerli sakinlər sosial şəbəkələrdə pilotsuz uçuş aparatlarının şəhər üzərində uçduğunu və obyektdə yanğın baş verdiyini göstərən foto və videolar paylaşıblar.

Söhbət Rusiyanın ən iri neft emalı zavodlarından biri olan, ildə 13 milyon tondan çox neft emal edən “Lukoil-Permnefteorgsintez” müəssisəsindən gedir.

Müəssisə yüksək keyfiyyətli benzin, dizel yanacağı, aviasiya kerosini və sürtkü materialları da daxil olmaqla geniş çeşiddə məhsullar istehsal edir. Zavod həmçinin müşayiətedici neft qazını emal edir.

Bu neft emalı zavodu region üçün əsas sənaye obyektlərindən biridir və ölkədə ən qabaqcıl texnoloji müəssisələrdən sayılır, həm daxili bazara, həm də ixrac istiqamətlərinə yanacaq tədarük edir.

Hadisə yerindən yayılan görüntülər göstərir ki, Ukraynanın pilotsuz uçuş aparatları zavodun neft emalı qurğularından birini hədəf alıb.

Regionun qubernatoru Perm diyarında “sənaye obyektlərindən birinə” hücum edildiyini təsdiqləyib, lakin obyektin adını açıqlamayıb.

Bir gün əvvəl Ukrayna Təhlükəsizlik Xidmətinin pilotsuz uçuş aparatlarının zərbə endirdiyi Perm neft nasos stansiyasında yanacaq çənləri hələ də yanır.

Bu stansiya regionda Rusiyanın əsas boru kəməri şəbəkəsi vasitəsilə neftin nasoslanması, saxlanması və paylanmasına cavabdehdir.



Sevinc Əliyeva
Ordu.az