Ordu.az xəbər verir ki, bu barədə “The Wall Street Journal” məlumat yayıb.
“The Wall Street Journal”ın məlumatına görə, Yaxın Şərqdə davam edən hərbi əməliyyatlar nəticəsində Almaniya və İspaniyada aprel ayında inflyasiya yenidən tarixi maksimuma çatıb.
Qiymətlər gözləniləndən daha sürətli artır. Almaniyada istehlak səbəti ötən illə müqayisədə 2,9% bahalaşıb (martda bu göstərici 2,8% idi). “Destatis” dövlət agentliyinin məlumatına görə, bu, 2024-cü ilin əvvəlindən bəri ən yüksək inflyasiya göstəricisidir.
İspaniyada vəziyyət daha mürəkkəbdir: orada inflyasiya 3,5%-ə çatıb. Bu, son bir ildə qeydə alınmış ən yüksək səviyyədir.
İnflyasiyanın əsas səbəbi enerji daşıyıcılarıdır. Yanacaq və elektrik enerjisinin bahalaşması digər bütün malların qiymətlərinin artmasına səbəb olub. Almaniyada enerji xərcləri 10,1% artıb ki, bu da 2023-cü ilin enerji böhranından sonra almanların büdcəsinə ən ciddi zərbədir.
Analitiklərin fikrincə, səbəb Hörmüz boğazının bağlanmasıdır. “Brent” markalı neftin qiyməti artıq 110 dolları keçib, ABŞ ilə İran arasında danışıqların uğursuzluğu isə investorları daha da narahat edir.
Bank sektorunun mütəxəssisləri hadisələri diqqətlə izləyirlər, çünki məhz bu gün, aprelin 30-da “Avrostat” Avrozonanın ümumi göstəricilərini açıqlayacaq. Bu rəqəmlərdən yenidən maliyyələşdirmə faiz dərəcələri ilə bağlı qərar asılı olacaq, baxmayaraq ki, ekspertlər onların hələlik dəyişməz qalacağını proqnozlaşdırırlar.
Avropa Mərkəzi Bankının prezidenti Kristin Laqard kifayət qədər sərt mövqe nümayiş etdirib və bildirib ki, vəziyyətin tezliklə yüngülləşəcəyi ehtimalı azdır.
“Münaqişə başlamazdan əvvəlki vəziyyətə qayıtmaq üçün asan yol yoxdur. İnsanlar və şirkətlər artıq böyük inflyasiya şokunu arxada qoyublar və indi xərclərin hər hansı artımına daha kəskin reaksiya verə bilərlər. Bu yaddaş hələ çox təzədir”, - deyə Avropa Mərkəzi Bankının prezidenti qeyd edib.
Biznes mühitində optimizm azalır: iqtisadi gözləntilər indeksi 2020-ci ilin pandemiya səviyyəsinə enib. O vaxt iqtisadiyyatı lokdaunlar iflic edirdi, indi isə müharibə və bahalaşma.
Avropa Mərkəzi Bankı artıq ilkin hesablamaları aparıb.
Neft qiymətinin hər 14% artımı ümumi inflyasiyaya 0,5% əlavə edir.
2026-cı ildə inflyasiya orta hesabla 2,6% təşkil edəcək.
Bu, bankın müəyyən etdiyi 2% hədəfini xeyli üstələyir.
İqtisadçıların ən pis proqnozları kifayət qədər qaranlıqdır: əgər münaqişə uzansa, 2027-ci ildə inflyasiyanın pik həddi 4,8%-ə çata bilər. Bu isə milyonlarla avropalı üçün bahalı həyat və aşağı alıcılıq qabiliyyəti ilə uzunmüddətli dövr yarada bilər.
Sevinc Əliyeva
Ordu.az
