Ordu.az xəbər verir ki, bunu Moskva Dövlət Beynəlxalq Münasibətlər İnstitutunun Beynəlxalq Araşdırmalar İnstitutunun “Postsovet dövlətlərinin yeni rolu” proqramının rəhbəri, dosent Sergey Markedonov postsovet ölkələrinin problemlərinə həsr olunmuş videokonfrans zamanı bildirib.
Ermənistanın baş naziri Nikol Paşinyanın Moskvaya səfərini və Rusiya prezidenti ilə baş tutan rezonans doğuran dialoqu şərh edən politoloq qeyd edib ki, Paşinyanla Vladimir Putin arasında belə sərt, lakin korrekt söhbətlər əvvəllər də olub. O xatırladıb ki, hələ ilk görüşlərdən birində Paşinyan Putinə dost seçimində diqqətli olmağı tövsiyə etmişdi (söhbət Ermənistanın ikinci prezidenti Robert Köçəryandan gedirdi), bundan sonra Yuri Xaçaturov hadisəsi və Qarabağ məsələsində fikir ayrılıqları yaranmışdı.
Ekspertin fikrincə, münasibətlərin transformasiyası dünən başlamayıb və müxtəlif aktorların fəallaşması ilə bağlıdır.
Politoloq vurğulayıb ki, hər hansı addım atarkən “imkanlar pəncərəsi”ni nəzərə almaq lazımdır. Onun fikrincə, 2022-ci ildə Rusiya Ukrayna cəbhəsində çətin vəziyyətə düşəndə və Ermənistan sərhədində Cermuk hadisələri baş verəndə, Ermənistan rəhbərliyində bir çoxları, o cümlədən baş nazirin özü belə, Rusiyanın onları tərk etdiyini düşünmüşdü. Bu yanaşma Fransada da fəal şəkildə dəstəklənmişdi.
Markedonovun sözlərinə görə, Ermənistanın Aİ-yə üzvlüyü barədə çox danışılır, lakin sual yaranır ki, onu orada gözləyirlərmi? O xatırladıb ki, hətta iqtisadiyyatını və hüquqi sistemini Avropa standartlarına ən çox uyğunlaşdıran Gürcüstanla belə danışıqlar dondurulub. Moldova və Ukrayna isə hətta namizəd statusu belə əldə etməyib. Bu kontekstdə o, Nil Uşakovun Ermənistanın Aİ-yə üzvlüyü üçün ən azı 10-12 il lazım olacağı ilə bağlı fikrini xatırladıb. “Amma yaşamaq lazımdır”, - deyə ekspert qeyd edib və əlavə edib ki, Ermənistan müxalifətinin narahatlıqları Rusiya və Avrasiya İqtisadi Birliyi ilə münasibətlərin mümkün pozulması qorxusu ilə bağlıdır.
Eyni zamanda, politoloq Moskvanın İrəvana hörmətli münasibət göstərməsinin vacibliyini vurğulayıb və bildirib ki, Rusiya Ermənistanla maraqlıdır. Onun sözlərinə görə, Ermənistan Rusiya üçün həm İranla əlaqələr, həm də “Avrasiya İqtisadi Birliyi+” formatı baxımından böyük əhəmiyyət daşıyır. “Əmin deyiləm ki, Aİ və ABŞ-nin Rusiyanı və İranı sıxışdırmaqdan başqa məqsədləri var”, - deyə Markedonov bildirib və əlavə edib ki, ABŞ üçün Cənubi Qafqaz regionu yalnız Rusiya, İran və Çin kontekstində qiymətləndirilir.
Münasibətlərin perspektivlərindən danışan politoloq qeyd edib ki, onlar artıq 2012 və ya 2020-ci illərdə olduğu kimi olmayacaq, lakin “fərqli” düşmənçilik demək deyil və dəyişikliklər düşmənçiliyə gətirib çıxarmamalıdır. O vurğulayıb ki, Aİ missiyası Rusiyada sanksiyalar səbəbindən mənfi qarşılanır, Kanadanın iştirakı isə prosesə “kvazi-NATO” xarakteri verir. “Məsələ diversifikasiya deyil. “Sülh kəsişməsi” (Zəngəzur dəhlizi-red.) layihəsi ilə bağlı Rusiyada bildirildi ki, mövcud imkanları birləşdirək, lakin bizə qapını göstərirlər. İş yerləri də yaradan Ermənistan AES əvəzinə heç yerdə, hətta ABŞ-də belə sınaqdan keçirilməmiş layihələr təklif olunur. Əgər bizi qeyri-ədalətli rəqabətlə sıxışdırmaq istəyirlərsə, niyə buna heyran qalmalıyıq”, - deyə Markedonov bildirib.
Onun fikrincə, münasibətlərdə daha yaxşı olar ki, diqqət qeyri-ictimai formatlara yönəldilsin ki, ehtiyatsız və emosional bəyanatların manipulyasiyasından qaçmaq mümkün olsun.
Yaxınlaşan seçkilərə toxunan Sergey Markedonov vurğulayıb ki, Rusiyanın Ermənistanda namizədi elə Ermənistanın özüdür. “Ermənistan xalqı lazım bildiyi şəxsi seçəcək”, - deyə politoloq bildirib.
Alpər Mövludoğlu
Ordu.az
