Böyük Britaniyanın müdafiə nazirinin qiymətləndirməsinə görə, Rusiya “Yaxın Şərqdəki gərginlikdən istifadə etməyə və Britaniyanın rabitə xətlərinə və sualtı digər infrastruktura zərər vurmağa çalışıb”. Böyük Britaniyanın müdafiə naziri Rusiyanı beynəlxalq sularda “təxribat fəaliyyəti” həyata keçirməkdə ittiham edib. Bu bəyanat Xarici kəşfiyyat xidmətinin yaydığı məlumatdan bir gün keçməmiş səsləndirilib.
Moskva isə, məlum olduğu kimi, Fransa və Böyük Britaniyanı, eləcə də Avropa İttifaqına üzv ölkələri, xüsusilə Almaniyanı “nüvə texnologiyaları və “çirkli uran” təqdim etməkdə” ittiham edib. Bir sıra ekspertlər hesab edir ki, Rusiya bu addımlarla “Kalininqradın blokadası məsələsini aktuallaşdırır, eyni zamanda Baltikyanı ölkələri təhdid edir”.
Bəzi məlumatlara görə, Kreml aprelin 9-da tamam olan Kyoniksberqin (Kalininqradın) azad edilməsinin 81-ci ildönümünü təntənəli şəkildə qeyd etməyi planlaşdırıb, lakin son anda hərbi parad ləğv edilib. Son iki ayda Ukraynanın pilotsuz uçuş aparatları dəfələrlə Leninqrad vilayətini və Baltik dənizindəki limanları hədəfə alıb.
Beləliklə, Rusiya və Avropa İttifaqı açıq şəkildə hərbi rəqiblər kimi görünür, qarşılıqlı ritorika daha da kəskinləşir. Bütün səylərə baxmayaraq, Fransa Prezidenti Emmanuel Makrona Vladimir Putinlə görüşmək mümkün olmayıb. Bu fonda təxminən bir ay sonra keçiriləcək Ermənistan-Avropa İttifaqı sammiti prinsipial əhəmiyyət kəsb edir. Brüssel və İrəvan hansı konkret razılaşmalara gələcək?
Aqil Məmmədov
Ordu.az
