Ordu.az xəbər verir ki, bunu İranın Ermənistandakı fövqəladə və səlahiyyətli səfiri Xəlil Şirqolami “NEWS.am”a müsahibəsində bildirib.
İranlı diplomat qeyd edib ki, elə ilk gündən bəzi vasitəçilər tərəfindən İran İslam Respublikasına qarşı bu təcavüzə son qoymaq məqsədilə xoşməramlı təşəbbüslər irəli sürülüb.
Onun sözlərinə görə, İranın fundamental mövqeyi ondan ibarətdir ki, təkcə atəşkəs yetərli deyil, ölkəsinə qarşı münaqişə tam dayandırılmalıdır.
“12 günlük müharibə zamanı biz artıq belə bir atəşkəsi sınaqdan keçirmişik və o, kifayət qədər kövrək idi. Özünüz də gördünüz ki, altı ay sonra ABŞ və İsrail rejimi yenidən ölkəmizə hücum etdi. Bu, İran İslam Respublikasına qarşı ağır seçim və ağır təcavüz idi. Buna görə də ölkəmizin əsas mövqeyi ondan ibarətdir ki, bu təcavüzün bir daha təkrarlanmayacağına dair real zəmanətlər olmalıdır. Bundan əlavə, münaqişədə istənilən fasilə Livanı da əhatə etməlidir. Buna görə ABŞ sionist rejimə anlatmalıdır ki, əgər düşmənçilik və münaqişə dayandırılmalıdırsa, o zaman İsrailin sionist rejiminin də öhdəlikləri olmalıdır. Təəssüf ki, bu gün biz Beyrutun cənubunda Livan xalqına qarşı dəhşətli zərbələrin şahidi oluruq və çox sayda insan həlak olur. Buna görə də münaqişənin başa çatmasının hər hansı imkanı yalnız bütün tərəflərin öhdəlik götürəcəyi halda mümkündür”, - deyə Şirqolami bildirib.
Səfir müharibə dövründə Ermənistanın mövqeyini də müsbət qiymətləndirib. O bildirib ki, İran tərəfi müxtəlif sahələr üzrə erməni rəsmilərlə daimi əlaqədə olub və Ermənistan hökuməti humanitar yardım baxımından kifayət qədər faydalı rol oynayıb.
“Biz daim erməni rəsmilərlə müxtəlif sahələr üzrə təmasda olmuşuq və Ermənistan hökuməti humanitar yardım baxımından kifayət qədər faydalı olub. Xüsusilə İrana qayıtmalı olan vətəndaşların, yaxud Ermənistan ərazisi ilə başqa ölkələrə getmək istəyən şəxslərin daşınması məsələsində yardım göstərilib. Biz həmçinin dərman və ərzaq da daxil olmaqla humanitar yardım yükləri aldıq və bu yardımlar yalnız Ermənistan hökumətindən deyil, həm də erməni özəl şirkətlərindən və Ermənistan vətəndaşlarından gəldi”, - deyə iranlı diplomat vurğulayıb.
Yaralıların müalicəsi üçün Ermənistandan həkim göndərilməsi ehtimalına toxunan Şirqolami qeyd edib ki, İranın bu sahədə kifayət qədər imkanları var: “Əslində səhiyyə sahəsində İran yüksəkixtisaslı mütəxəssislərə - həkimlərə, tibb bacılarına, eləcə də inkişaf etmiş səhiyyə sisteminə malikdir və İranın “Qırmızı Aypara” Cəmiyyəti fəal və dinamik işləyir. Bu sahədə minlərlə könüllü də dəstəyə hazır olduqlarını bildiriblər. Buna görə də bu məsələdə heç bir problem və ya çətinlik yoxdur. Əlbəttə, biz Ermənistandan, eləcə də bir çox digər dost xalqlardan aldığımız bütün həmrəylik təzahürlərini yüksək qiymətləndiririk. Ölkəmizə qarşı hərbi əməliyyatlar dövründə göstərilən bu dəstəyi qiymətləndirməyə davam edirik və hamı ilə əlaqədəyik”.
Şirqolami həmçinin ABŞ və İsrailin zərbələri nəticəsində İranda ermənilərin də zərər çəkdiyini qeyd edib.
Onun sözlərinə görə, bəzi ermənilər evsiz qalıb, erməni yaşayış məntəqələri, mədəni obyektlər və hətta kilsələr müəyyən dərəcədə zədələnib.
“ABŞ və İsrailin zərbələri nəticəsində təəssüf ki, evsiz qalan erməni vətəndaşlar var. Bundan əlavə, təkcə yaşayış evləri deyil, həm də mədəni obyektlər və hətta kilsələr təcavüzkarların zərbələri nəticəsində müəyyən dərəcədə zərər görüb. Və bəli, qeyd etdiyiniz kimi, İsfahan şəhərində təəssüf ki, bir iranlı erməni həlak oldu. İranın erməni icması da tarix boyu olduğu kimi, həmrəyliyini və vətənin müdafiəsinə sadiqliyini nümayiş etdirdi”, - deyə diplomat əlavə edib.
İran-Ermənistan strateji tərəfdaşlığına dair danışıqlara toxunan səfir bildirib ki, müharibə səbəbindən bu proses dayansa da, yaxın vaxtlarda yenidən gündəmə qayıdacaq.
“Bu, İran üçün ən mürəkkəb və ən ağır vəziyyət idi. Buna görə əsas prioritet özünümüdafiə, torpağımızın, ərazimizin və ləyaqətimizin təcavüzkarlara qarşı müdafiəsi idi. Bununla belə, təkcə Ermənistanla deyil, bir çox digər tərəfdaş və dostlarla da 2026-cı il üçün çoxsaylı gündəlik məsələlərimiz var idi və biz bu mövzular üzrə danışıqlara yenidən başlayacağıq. Ermənistanla da, qeyd etdiyiniz kimi, mühüm proqramlarımız var və münaqişə başa çatdıqdan sonra tezliklə bütün bu gündəlik məsələlərin yenidən müzakirəsinə və planlaşdırılmasına qayıdacağıq”, - deyə Şirqolami vurğulayıb.
Alpər Mövludoğlu
Ordu.az
