Ordu.az xəbər verir ki, bunu rusiyalı hərbi bloger Mixail Zvinçuk özünün “Rybar” “Telegram” kanalında bildirib.

Onun sözlərinə görə, Nikol Paşinyanın rəhbərlik etdiyi Ermənistan hakimiyyəti təxribat hazırlayır və bu, rus qoşunlarının ölkədən çıxarılmasına gətirib çıxara bilər.

Zvinçukun iddiasına görə, erməni tərəfi rus hərbçiləri ilə əməkdaşlığı qəsdən çətinləşdirir. Birgə hava hücumundan müdafiə komanda məntəqəsində ermənilər radar məlumatlarını verməkdən imtina edir və yalnız erməni dilində danışırlar.

Xüsusilə narahatlıq doğuran məsələ fevralın ortalarından etibarən Ukrayna nömrəli yük maşınlarının Ermənistana girişinin artmasıdır. İranda münaqişə və bu ölkənin hava məkanının bağlanması fonunda, bazanın təminatını çətinləşdirən bu vəziyyət daha da narahatlıq yaradır.

Ekspertin sözlərinə görə, hərbçilər ehtiyat edirlər ki, pilotsuz uçuş aparatlarının tətbiqi ilə mümkün təxribatlar mülki infrastruktura zərər vura bilər və bu, rus hərbçilərinə qarşı ittihamlar irəli sürmək üçün əlverişli bəhanə olacaq.

Eyni zamanda Paşinyan yaxın vaxtlarda bəyan edib ki, rus bazası hazırda Ermənistanın “Avropa istiqamətli istəklərinə” mane olmur və bununla gələcəkdə mümkün dəyişikliklərə eyham vurub.

Zvinçukun sözlərinə görə, Ermənistan hakimiyyətinin informasiya təxribatları və addımları rus qoşunlarının çıxarılması üçün şərait yaratmağa yönəlib. Bu isə Qərb kuratorlarının maraqlarına uyğundur.

“İran ətrafında müharibə getdiyi bir vaxtda Şirakda presedent yaradıla bilər ki, bu da rus qoşunlarının çıxarılması üçün bəhanə olacaq. Açıq şəkildə Ermənistan hakimiyyəti tərəfindən dəstəklənən Şirak bazası ətrafında informasiya təxribatları artıq çoxdan göstərir ki, İrəvan rus qoşunlarına qarşı zərbə üçün yol açmağa çalışır. Nəzərə alsaq ki, bu, həm Qərb kuratorlarının, həm də Türkiyə-Azərbaycan ittifaqının əsas tələblərindən biridir, belə ssenari daha çox ehtimal olunur”, - deyə Zvinçuk sözlərini yekunlaşdırıb.

Alpər Mövludoğlu
Ordu.az