Ordu.az xəbər verir ki, ümumi dəyəri 842 milyon dollar olan paket Danimarka Hərbi Hava Qüvvələrinin F-35A qırıcıları üçün uzaqmənzilli dəqiq zərbə imkanlarının artırılmasına xidmət edəcək.
2026-cı il iyunun 5-də təsdiqlənən Xarici Hərbi Satış (FMS) paketi raketlərlə yanaşı, daşınma konteynerlərini, sınaq avadanlıqlarını, ehtiyat hissələrini, logistika dəstəyini, texniki sənədləri, proqram təminatını və mühəndislik xidmətlərini də əhatə edir.
F-35-lərə 1000 kilometri aşan zərbə imkanları veriləcək
AGM-158B JASSM-ER 925 kilometrdən artıq uçuş məsafəsi və aşağı radara görünmə xüsusiyyətinə malik konstruksiyası ilə müasir hava hücumundan müdafiə sistemlərinə qarşı hazırlanmış uzaqmənzilli qanadlı raket hesab olunur. Sistemin əsas üstünlüklərindən biri F-35A qırıcılarının güclü hava hücumundan müdafiə sistemləri ilə qorunan ərazilərə daxil olmadan strateji hədəfləri vurmasına imkan verməsidir.
Raket komanda mərkəzlərinə, hərbi hava bazalarına, radar obyektlərinə, hava hücumundan müdafiə sistemlərinə və logistika mərkəzlərinə qarşı istifadə oluna bilir.
Danimarkanın müdafiə strategiyası dəyişir
Satınalma qərarı Kopenhagenin son illərdə müdafiə planlaşdırılmasında qəbul etdiyi yeni yanaşmanın bir hissəsi kimi qiymətləndirilir. Rusiya-Ukrayna müharibəsindən sonra bir çox Avropa ölkəsi kimi Danimarka da yalnız müdafiə sistemlərinə sərmayə qoymağın kifayət etmədiyi qənaətinə gəlib.
Bu çərçivədə ölkə hava hücumundan müdafiə şəbəkələrini gücləndirməklə yanaşı, potensial təhdidləri mənbəyində məhv edə biləcək uzaqmənzilli zərbə imkanlarına da investisiya yatırır. Danimarka hökuməti 2025-ci il sentyabrın ayında orta və uzaqmənzilli hava hücumundan müdafiə sistemləri üçün təxminən 58 milyard Danimarka kronu ayırmışdı. JASSM-ER raketlərinin alınması da həmin strategiyanın tamamlayıcı hissələrindən biri hesab olunur.
Avropanın ən böyük JASSM-ER arsenalından biri formalaşacaq
Danimarkanın 200 raketlik sifarişi Avropadakı bir çox NATO ölkəsinin arsenalını geridə qoyur. Daha əvvəl İtaliya üçün 100, Niderland üçün 120, Polşa üçün isə ümumilikdə 110 JASSM/JASSM-ER raketinin satışına icazə verilmişdi. Danimarkanın planlaşdırılan ehtiyatı yalnız Finlandiyanın malik olduğu JASSM arsenalından geri qalacaq.
43 ədəd F-35A qırıcısının istismarını planlaşdıran Danimarka üçün 200 raketlik ehtiyat ölkənin uzunmüddətli və yüksək intensivlikli münaqişə ssenarilərinə hazırlaşdığını göstərir.
Sevinc Əliyeva
Ordu.az
