Ordu.az xəbər verir ki, yeni sifarişlə birlikdə NATO üzvü olan Rumıniyanın C-27J parkındakı təyyarələrin sayı doqquza çatacaq.
Sifariş Rumıniya Daxili İşlər Nazirliyi tərəfindən verilib və Avropa İttifaqının “Avropa üçün Təhlükəsizlik Fəaliyyəti” (SAFE) birgə hərbi müdafiə tədarükü çərçivəsində həyata keçirilib. Yeni platformalar Rumıniya Baş Aviasiya Müfəttişliyi tərəfindən istismar olunacaq.
Təyyarələrin ölkə daxilində fövqəladə hallar xidmətləri, təbii fəlakətlərə reaksiya və mülki müdafiə tapşırıqlarında istifadə olunması, həmçinin Avropadakı regional əməkdaşlıq fəaliyyətlərinə dəstək verməsi nəzərdə tutulur. Təyyarələrin 2029-cu ildə təhvil verilməsi planlaşdırılır.
“Leonardo” şirkəti bildirib ki, Rumıniya üçün istehsal olunacaq təyyarələr yeni nəsil C-27J konfiqurasiyasına malik olacaq. Bununla yanaşı, onlar Rumıniyanın silahlanmasında olan və bu günə qədər 30 min saatdan çox uçuş həyata keçirmiş mövcud C-27J platformaları ilə tam uyğunluğu qoruyacaq.
Yeni təyyarələr qabaqcıl avionik sistemlər, müasir rabitə həlləri və səmərəliliyi artıran aerodinamik təkmilləşdirmələrlə təchiz ediləcək. Platformalarda həmçinin dəyişdirilə bilən “roll-on/roll-off” missiya modulları quraşdırılacaq. Bu modullar sayəsində təyyarələr standart uzaqmənzilli nəqliyyat tapşırıqları ilə yanaşı, bioloji təhlükəli materialların daşınması və yanğınsöndürmə kimi xüsusi missiyalarda da istifadə edilə biləcək.
Məlumata görə, bu sifariş Rumıniyanın Ukraynadakı müharibənin yaratdığı təhlükəsizlik riskləri fonunda milli dayanıqlığını və müttəfiq müşahidə imkanlarını gücləndirmək səylərinin bir hissəsidir.
Rumıniyanın müdafiə naziri Radu Mirutsa Belçikada keçirilən NATO-nun Qabiliyyətlərin Formalaşdırılması Konfransında çıxışı zamanı Qalats bölgəsində qeydə alınan pilotsuz uçuş aparatı pozuntusundan sonra alyansın şərq cinahına dəstəyin artırılmasına çağırış edib.
“Rumıniya öz müdafiəsinə sərmayə qoyur, lakin zaman heç kimin xeyrinə işləmir. Bu imkanlar təhvil verilənə qədər müttəfiqlərin dəstəyinə ehtiyacımız var”, - deyə Mirutsa bildirib.
Sevinc Əliyeva
Ordu.az
