Ordu.az xəbər verir ki, şirkət sistemin hazırlanmasını cəmi doqquz ay ərzində tamamlayaraq 2026-cı il ərzində seriyalı istehsala hazır vəziyyətə gətirməyi planlaşdırır.
“Meteor” “hava-hava” raketi, “Brimstone” tank əleyhinə raketi və SCALP/“Storm Shadow” qanadlı raketlərinin istehsalçısı olan MBDA bildirib ki, CROSSBOW OWE(H) adlandırılan yeni nəsil sursatın 2025-ci il dekabrın və 2026-cı il fevralın aylarında keçirilən sınaq atışları uğurla nəticələnib.
Şirkətin açıqlamasında qeyd olunub ki, sistemin layihələndirilməsindən ilk döyüş atışına qədər olan müddət cəmi doqquz ay təşkil edib. Bildirilib ki, bu layihə ənənəvi müdafiə sənayesi proqramlarından fərqli olaraq hər hansı müştəri müqaviləsi gözlənilmədən şirkətin öz vəsaiti hesabına həyata keçirilib.
CROSSBOW OWE(H) quru platformalarından buraxılmaq üçün hazırlanmış və yüksək əhəmiyyətli hədəflərə dəqiq zərbə endirmək qabiliyyətinə malik dərin zərbə qanadlı raketi kimi təqdim olunur.
Sistem komanda-idarəetmə mərkəzləri, logistika obyektləri, sursat anbarları və kritik hərbi infrastruktur kimi cəbhə xəttinin arxasında yerləşən hədəfləri məhv etmək üçün nəzərdə tutulub. Son illərdə, xüsusilə Ukrayna müharibəsinin ortaya çıxardığı əməliyyat tələbləri Avropa ölkələrində uzaqmənzilli və yüksək dəqiqlikli quru əsaslı zərbə sistemlərinə marağı artırıb.
MBDA bildirib ki, CROSSBOW Böyük Britaniya və Avropanın müxtəlif şirkətləri ilə əməkdaşlıq çərçivəsində hazırlanıb. Modul arxitekturaya malik sistemdə həm hərbi, həm də kommersiya məqsədli hazır alt sistemlərdən istifadə olunub.
Şirkətin məlumatına görə, CROSSBOW istifadəçi tələblərindən asılı olaraq mənzil, sağqalma qabiliyyəti, məhvetmə gücü, naviqasiya sistemləri və platforma inteqrasiyası sahələrində təkmilləşdirilə bilər. Bu yanaşmanın həm xərcləri azaltması, həm də müxtəlif müştəri tələblərinə daha operativ cavab verməsi nəzərdə tutulur.
MBDA CROSSBOW-u münasib xərc hesabına kütləvi təsir imkanları yaradan konsepsiyanın tərkib hissəsi kimi qiymətləndirir. Şirkət milyonlarla dollar dəyərində olan bahalı qanadlı raketlərlə müqayisədə daha aşağı xərc tələb edən, lakin effektiv həll təqdim etməyi hədəfləyir.
Bu çərçivədə MBDA 2026-cı ildə ümumi istehsal gücünü 2025-ci illə müqayisədə 40 faiz artırmağı planlaşdırdığını açıqlayıb. Şirkət CROSSBOW-un da bu genişlənmə strategiyasının əsas elementlərindən biri olacağını vurğulayıb.
İlk sınaq atışlarını uğurla tamamlayan CROSSBOW-un Avropa ölkələrinin artan uzaqmənzilli dəqiq zərbə ehtiyaclarına cavab verəcəyi və MBDA-nın dərin zərbə imkanlarını genişləndirəcəyi gözlənilir.
Sevinc Əliyeva
Ordu.az
