Ordu.az xəbər verir ki, bu barədə Ermənistanın keçmiş xarici işlər naziri Vardan Oskanyan özünün “Facebook” səhifəsində yazıb.

“Ölkənin bütün ərazisində səkkiz il ərzində yığılan milli sarsıntılar, itkilər, müxtəlif növ uğursuzluqlar və gələcəyin qeyri-müəyyənliyi nəticəsində yorğunluq, məyusluq və narazılıq hiss olunur.

Eyni zamanda, bu seçkilər artıq formalaşmış bir sıra ciddi və etibarlı müxalif siyasi ittifaqların mövcud olduğu yeni siyasi mühitdə keçirilir. Bu ittifaqlar proqramları, təcrübələri və idarəetmə qabiliyyətləri ilə seçilirlər. Ayrı-ayrılıqda və ya birlikdə onlar parlamentdə aydın çoxluğu təmin edə bilərlər.

Hər halda, bu reallıq şəraitində müxalifətin və erməni cəmiyyətinin məqsədi yalnız Paşinyanın sadə çoxluq əldə etməsinə mane olmaq yox, həm də onun partiyasının parlamentə daxil olmaq üçün minimal həddi belə keçməməsini təmin etmək olmalıdır”, - deyə Oskanyan qeyd edib.

Oskanyan bildirib ki, nəhayət, bu seçkilər erməni cəmiyyətinin real əhval-ruhiyyəsini aydın siyasi nəticəyə çevirməkdən ibarətdir.

“Şərtlər mövcuddur: narazı seçici kütləsi, məyus, ümidsiz və alçaldılmış cəmiyyət, etibarlı və perspektivli sülh və inkişaf proqramları, həmçinin mövcud gedişatın qəbuledilməz olduğu barədə ümumi anlayış.

Əgər kollektiv müxalifət və seçicilər aydınlıq və məqsədyönlülüklə hərəkət etsələr, nəticə yalnız hakimiyyət dəyişikliyi yox, həm də köklü və tam siyasi yenidənqurma ola bilər.

Doğrudan da, yalnız hakimiyyəti dəyişmək yox, həm də artıq ölkənin ən ağır və alçaldıcı dövrü sayılan bir mərhələni birdəfəlik bağlamaq və yaddaşdan silmək, ləyaqət, məsuliyyət, bacarıq və milli bərpa üzərində qurulmuş yeni mərhələ açmaq üçün böyük imkan var”, - deyə o vurğulayıb.

Alpər Mövludoğlu
Ordu.az