Ordu.az xəbər verir ki, bu barədə ABŞ Dövlət Departamentinin sözçüsü bildirib.
“TRIPP ABŞ-nin prioritetlərindən biri olaraq qalır, çünki bu layihə Cənubi Qafqazda və ondan kənarda sülh və rifahın təşviq edilməsi potensialına malikdir. Tramp administrasiyası TRIPP layihəsinin həyata keçirilməsinə sadiqliyini davam etdirir”, - deyə sözçü qeyd edib.
ABŞ Dövlət Departamentinin sözçüsü bildirib ki, layihə Azərbaycanın əsas hissəsi ilə Naxçıvanı birləşdirəcək çoxmodal nəqliyyat qovşağının yaradılmasını nəzərdə tutur və eyni zamanda Ermənistanın suverenliyi, ərazi bütövlüyü və yurisdiksiyasına hörmət edilməsini təmin edir, həmçinin Ermənistan üçün qarşılıqlı faydalar yaradır.
“TRIPP regionda beynəlxalq və daxili əlaqələrin maneəsiz inkişafını təmin edəcək, iqtisadi artım və rifahın yüksəlməsi üçün imkanları genişləndirəcək”, - deyə sözçü bildirib.
Onun sözlərinə görə, Azərbaycan Naxçıvanla əlaqə əldə edəcək, Ermənistan isə regional əlaqələrin yaxşılaşmasından faydalanacaq və bu, Cənubi Qafqazın iqtisadi potensialını açacaq, eyni zamanda Ermənistanın suverenliyi, ərazi bütövlüyü və yurisdiksiyası qorunacaq.
ABŞ Dövlət Departamentinin sözçüsü əlavə edib ki, Ermənistan ABŞ və qarşılıqlı razılaşdırılmış üçüncü tərəflərlə birlikdə TRIPP təşəbbüsünün həyata keçirilməsi istiqamətində əməkdaşlıq edir.
“TRIPP və əlaqəli razılaşmaların həyata keçirilməsinə dəstək məqsədilə ABŞ 145 milyon dollar məbləğində ilkin öhdəlik götürüb və bu, regional sabitlik və iqtisadi artım üçün imkanlar yaradacaq. Bu vəsaitlər Ermənistanın ticarət, infrastruktur və sərhəd təhlükəsizliyi sahələrində investisiyalara yönəldiləcək və regionda əlaqəliliyi artıracaq”, - deyə sözçü vurğulayıb.
Sözçü həmçinin qeyd edib ki, 2026-cı il yanvarın 13-də ABŞ və Ermənistan TRIPP layihəsinin həyata keçirilməsi çərçivəsinin açıqlanması ilə bağlı birgə bəyanat verib.
“Bu sənəd TRIPP layihəsinin həyata keçirilməsi üçün aydın yol xəritəsi təqdim edir. 2025-ci il avqustun 8-də təsdiqlənmiş prinsipləri əks etdirərək, o, suverenlik, yurisdiksiya, ərazi bütövlüyü və qarşılıqlılıq prinsiplərinin ümumi uğur üçün əhəmiyyətini vurğulayır.
ABŞ prezidenti Donald Trampın qeyd etdiyi kimi, TRIPP “dünyanın iqtisadi baxımdan ən mühüm məkanlarından bəzilərindən keçəcək” və “Xəzər dənizinin digər tərəfində ticarət fəaliyyətini təşviq edəcək, Mərkəzi Asiya ölkələrinə kömək edəcək”.
TRIPP layihəsinin əsas məqsədləri Ermənistan və Azərbaycanın rifahını və təhlükəsizliyini gücləndirmək, ABŞ üçün ticarət imkanlarını genişləndirmək, regional ticarət və əlaqələri inkişaf etdirmək, həmçinin Mərkəzi Asiya və Xəzər regionundan Avropaya yeni tranzit əlaqələri yaratmaqdır”, - deyə sözçü bildirib.
Alpər Mövludoğlu
Ordu.az
