Ordu.az xəbər verir ki, bunu erməni siyasi xadim Robert Marqaryan öz paylaşımında bildirib.
O qeyd edib ki, bir neçə gün fasilədən sonra bəzi dairələr MPG MMC-nin direktoru Aram Navasardyanın mətbuat konfransından çıxarılmış hissəni xüsusi həvəslə tirajlayıblar.
Marqaryanın sözlərinə görə, həmin hissədə “Hayastan” blokunun bu anda cəmi 5,5 faiz səsə malik olduğu iddia olunub.
“Hazırda ən azı üç arqument gətirə bilərəm ki, niyə həmin məlumatlar və ümumiyyətlə “Qallup”un Ermənistandakı tərəfdaşının sosioloji sorğularının nəticələri etibarlı deyil və hətta müəyyən mənada çəkilib. Onlara həftəsonu canlı yayımımda ətraflı toxunacağam. İndi isə elə həmin sorğunun nəticələrindən bir maraqlı faktı təqdim etmək istəyirəm”, - deyə o bildirib.
Marqaryan vurğulayıb ki, sorğuda yalnız siyasi qüvvələrlə bağlı deyil, həm də hansı siyasətçinin fəaliyyətinin bəyənildiyi ilə bağlı sual da yer alıb.
Onun sözlərinə görə, bu hissə ictimaiyyətə təqdim edilməyib, çünki orada Robert Köçəryanın göstəricisi 5,5 deyil, 13,1 faiz olub.
“Baxmayaraq ki, mənim qənaətimcə, bu da dəqiq rəqəm deyil, amma gəlin məhz bu göstərici üzərində dayanaq.
“Qallup”un Ermənistandakı tərəfdaşının sorğusuna cavab olaraq xalq Erməni Apostol Kilsəsi və erməni ordusundan sonra ardıcıllıqla Qaqik Tsarukyanın (34,2 faiz), Samvel Karapetyanın (27,3 faiz), Nikol Paşinyanın (27,1 faiz) və prezident Robert Köçəryanın (13,1 faiz) fəaliyyətini bəyəndiyini bildirib”, - deyə Marqaryan qeyd edib.
Marqaryan bildirib ki, siyasi fiqurların ilk dördlüyünü iki əsas qrupa bölmək olar.
“Birinci qrupa Qaqik Tsarukyan və Samvel Karapetyan daxildir. Cəmiyyətdə onlar daha çox əvvəlcə xeyriyyəçi və iş adamı, sonra isə siyasətçi kimi tanınırlar. Bu mənada onların topladığı yüksək faizin böyük hissəsi siyasi deyil, ictimai fəaliyyətlərinə aiddir. Elə buna görə də parlament seçkiləri ilə bağlı sorğuda onların faizləri birmənalı olaraq aşağı düşür, Qaqik Tsarukyanın 34,2 faizi 7,9 faizə, Samvel Karapetyanın 27,3 faizi isə 13,4 faizə çevrilir.
İkinci qrupa isə prezident Robert Köçəryan və Nikol Paşinyan daxildir ki, onların fəaliyyəti sırf siyasi xarakter daşıyır və təbii ki, topladıqları faizlər də yalnız buna aiddir. Elə buna görə də Nikol Paşinyanın 27,1 faizi çox cüzi azalaraq 24,3 faizə düşür. Eyni məntiqlə prezident Robert Köçəryanın topladığı 13,1 faiz də dəyişməz qalmalıdır. Çünki respondentlər təbii olaraq Köçəryanın siyasi fəaliyyətini bəyəniblər, o isə son dövrdə yalnız bir aydın addım atıb: seçkilərdə iştirak etmək, “Hayastan” blokuna rəhbərlik etmək və ölkəni idarə etməyə iddiasını təqdim etmək”, - deyə o bildirib.
Marqaryan qeyd edib ki, bu dəfə də həmin dairələrə ötürülən informasiya “köhnəlib və artıq qoxuyur”.
O, mövzuya həftəsonu daha ətraflı toxunacağını qeyd edib.
Alpər Mövludoğlu
Ordu.az
