Gürcü müxalifət nümayəndələrinin qiymətləndirməsinə görə, Cənubi Qafqazda Rusiyanın “təsiri zəifləyir, ABŞ-nin marağı isə artır”. Onlar hesab edirlər ki, “yeni tranzit və infrastruktur layihələri Gürcüstan üçün təhlükəsizlik sahəsində imkan yaradır və ölkənin Qərbin strateji arxitekturasının mühüm hissəsinə çevrilməsinə şərait açır”.

Müxalif alyansın nümayəndələri əsas məqsəd kimi “azad və ədalətli seçkilərin keçirilməsini, siyasi məhbusların azad olunmasını, Qərb tərəfdaşları ilə münasibətlərin bərpasını və Gürcüstanın Avroatlantik inteqrasiya yoluna qaytarılmasını” müəyyən ediblər. Diqqətçəkən məqam ondan ibarətdir ki, Gürcüstanın “Müxalif Alyansı”nın üç nümayəndəsi bu prinsipial əhəmiyyət daşıyan bəyanatı Ermənistanda keçirilən parlament seçkilərindən iki gün sonra yayıb.

Gürcü müxalifəti son parlament seçkilərinin nəticələrini tanımır və yeni seçkilərin keçirilməsi uğrunda mübarizə aparır. Mayın sonunda ABŞ Dövlət Departamentinin nümayəndə heyəti Tbilisidə həm Baş nazir Kobaxidze, həm də müxalifət liderləri ilə danışıqlar aparıb. Vaşinqton Gürcüstanda növbədənkənar seçkilərin keçirilməsi şərtini irəli sürmür, lakin müxalifətin ölkənin siyasi həyatında sərbəst iştirakını vacib sayır.

Maraqlıdır ki, iyunun 9-da 2024-cü il oktyabrın 4-də, yəni “kütləvi iğtişaşlar işi” üzrə həbs edilmiş səkkiz nəfər məhkəmə qərarı ilə azadlığa buraxılıb. Rəsmi olaraq bildirilib ki, onlar “təqsirlərini etiraf edib və prokurorluqla razılığa gəliblər”. Ehtimal etmək olar ki, “qismən amnistiya” tətbiq olunub və Gürcüstan hakimiyyəti bu qərarı Dövlət Departamentinin nümayəndə heyəti ilə aparılan danışıqlar kontekstində qəbul edib.

Aqil Məmmədov
Ordu.az