Ordu.az xəbər verir ki, Polşa Silahlanma Agentliyi PGZ və HSW konsorsiumu ilə əlavə 146 ədəd “Borsuk” zirehli döyüş maşınının alınması üçün təxminən 7,5 milyard zlotı (2,1 milyard dollar) dəyərində yeni müqavilə imzalayıb.
Yeni razılaşmadan sonra Polşanın təsdiqlənmiş “Borsuk” sifarişi 257 maşına çatıb. Təhvil prosesinin 2030-cu ilədək başa çatdırılması planlaşdırılır. Bu müqavilə 2025-ci ilin martında imzalanmış və 111 ədəd “Borsuk” maşınını əhatə edən ilk seriyalı istehsal müqaviləsindən sonra proqram çərçivəsində verilən ikinci böyük sifariş olub.
Mövcud 257 maşınlıq sifarişin dörd mexanikləşdirilmiş piyada taborunun təchiz edilməsinə, həmçinin təlim və ehtiyat məqsədli platformaların alınmasına imkan verəcəyi bildirilir. Polşanın 2023-cü ildə imzaladığı çərçivə sazişi isə müxtəlif variantlar da daxil olmaqla təxminən 1400 ədəd “Borsuk” bazalı platformanın alınmasını nəzərdə tutur.
“Porsuq” mənasını verən “Borsuk” Polşanın hazırladığı ilk yerli tırtıllı zirehli döyüş maşını hesab olunur. Platforma hazırda Polşa ordusunda istifadə edilən sovet dövründən qalmış BMP-1 zirehli döyüş maşınlarını əvəz etmək üçün hazırlanıb.
Təxminən 28 ton ağırlığa malik olan “Borsuk” üç nəfərlik ekipajdan əlavə altı piyadanı da daşıya bilir. 720 at gücündə dizel mühərriki sayəsində quruda saatda 65 kilometr sürət yığan platforma su reaktiv mühərrikləri vasitəsilə amfibiya imkanını da qoruyur.
“Borsuk”un ən diqqətçəkən xüsusiyyətlərindən biri HSW və “WB Group” tərəfindən birgə hazırlanmış ZSSW-30 insansız qüllə sistemidir. Sistemdə 30 mm çaplı “Mk44S Bushmaster II” avtomatik topu ilə yanaşı iki ədəd “Spike-LR” tank əleyhinə raket yerləşdirilib. Platforma həmçinin gündüz və termal müşahidə sistemləri sayəsində 24 saat fəaliyyət göstərə bilən sensor avadanlıqları ilə təchiz olunub.
İnsansız qüllə konstruksiyası sayəsində ekipaj daha yaxşı qorunan bölmədə yerləşir və platformanın ümumi sağqalma imkanlarının artırılması hədəflənir. “Borsuk” proqramı Rusiya-Ukrayna müharibəsindən sonra Polşanın sürətləndirdiyi genişmiqyaslı müdafiə modernləşdirməsinin əsas elementlərindən biri hesab olunur.
Varşava son illərdə Cənubi Koreyadan K2 “Black Panther” əsas döyüş tankları və K9 “Thunder” haubitsaları, ABŞ-dən HIMARS reaktiv yaylım atəşi sistemləri və F-35 “Lightning II” döyüş təyyarələri alıb, eyni zamanda quru qoşunlarının şəxsi heyət sayını artırıb.
Bu çərçivədə “Borsuk” mexanikləşdirilmiş bölmələrin müasir tanklar və artilleriya sistemləri ilə birlikdə fəaliyyət göstərməsinə imkan verəcək əsas platformalardan biri hesab edilir.
HSW müəssisələrində seriyalı istehsalın 2025-ci ildən etibarən iki növbəli sistemlə həyata keçirildiyi bildirilir. Zavodun illik təxminən 100 maşın istehsal gücünə çatdırılması planlaşdırılır.
İlk 15 ədəd “Borsuk” platforması 2025-ci il dekabrda Polşanın 15-ci Mexanikləşdirilmiş Briqadasına təhvil verilmişdi. Yeni müqavilə ilə istehsal fəaliyyətinin 2030-cu ilədək yüksək templə davam etdirilməsi gözlənilir.
Sevinc Əliyeva
Ordu.az
