Qeyd olunur ki, Ermənistan və Türkiyə arasında münasibətlərin normallaşması prosesinə və razılaşmaların həyata keçirilməsinə toxunulub. Bu, demək olar ki, bir həftə əvvəl Paşinyan-Ərdoğan telefon danışığında olduğu kimi, mahiyyətcə diplomatik standartdır. Həmin telefon danışığı ilə bağlı Türkiyə tərəfinin açıqlamalarında bildirilir ki, Ərdoğan Nikol Paşinyanı Türkiyəyə səfərə və Vardavar bayramını orada birgə qeyd etməyə dəvət edib.

Mirzoyanla Fidan bu səfərin mümkünlüyünü, hətta səfərin hazırlanması məntiqi çərçivəsində müzakirə ediblərmi? Geniş ictimaiyyətin diqqətini cəlb edən digər bir məqam isə Paşinyan-Ərdoğan telefon danışığından üç gün sonra rəsmi İrəvanın Fələstinin müstəqilliyinin tanındığını elan etməsi oldu və bunu ilk olaraq Ankara alqışladı. İsrail mənbələrinin Ermənistanın bu addımından sonra Təl-Əvivin Azərbaycanla yeni silahların tədarükü məsələsini müzakirə etdiyi barədə yaydığı məlumatı nəzərə alaraq, Mirzoyanla Fidanın telefon danışığında Fələstinin tanınması məsələsinə hansı yer və məzmun verilib?

Nəticə etibarilə Ermənistan Ankaranın Yaxın Şərqdəki mövqelərini gücləndirməyən, Türkiyənin Ermənistana qarşı siyasətində müəyyən fərqli mühit yaradan addım atıb. Digər tərəfdən, bu baxımdan Ankara hazırda Ermənistanın Rusiyadan uzaqlaşmasını diqqətlə izləyir. Bir neçə gün əvvəl Simonyan və Zaxarova arasında “debat” və buna Armen Qriqoryanın açıqlamalarının da qoşulması Ankaranı daha diqqətli davranmağa vadar edir.

Həmçinin Ankara Moskvanın diqqətini Asiya-Sakit okean regionuna və Qlobal Cənuba yönəltməsinə də diqqətli yanaşır. Bu kontekstdə Türkiyə ilə İrəvan arasında tez-tez baş verən bu telefon danışıqları Moskvaya qarşı demarş təəssüratı yaratsa da, bu, əslində birgə fəaliyyət kimi nəzərdən keçirilir. Türkiyə Prezidentinin Astanada Putinlə görüşü gözlənilir və bir çox məsələlərə məhz bu görüşdə aydınlıq gətiriləcək. Buna qədər baş verən təmaslar isə sözügedən görüşün alt mətnlərinin dəqiq işlənməsi üçündür.

Aqil Məmmədov
Ordu.az