Ordu.az xəbər verir ki, bu çərçivədə “Oshkosh Defense” şirkətinə ümumi dəyəri 92 milyon dollar olan iki ayrı müqavilə verilib.
ABŞ Dəniz Piyadaları Sistemləri Komandanlığının məlumatına görə, “Oshkosh Defense” NMESIS sisteminin quru komponentini təşkil edən “ROGUE-Fires” (Remotely Operated Ground Unit for Expeditionary Fires) platformalarının tədarükü üçün 70,6 milyon dollarlıq müqavilə əldə edib.
2028-ci il sentyabrınadək davam etməsi planlaşdırılan işlərin böyük hissəsi ABŞ-nin Viskonsin ştatının Oşkoş şəhərində həyata keçiriləcək.
Həmin gün şirkətə tədqiqat, inkişaf etdirmə, sınaq və qiymətləndirmə fəaliyyətlərini əhatə edən daha 21,4 milyon dollarlıq ikinci müqavilə də təqdim olunub.
Bu müqavilənin “ROGUE-Fires” sisteminə yeni imkanların qazandırılması məqsədilə aparılan inkişaf etdirmə və sınaq işlərini əhatə etdiyi bildirilib. Beləliklə, iki müqavilənin ümumi dəyəri 92 milyon dollara çatıb.
“ROGUE-Fires” “Oshkosh”un JLTV (Joint Light Tactical Vehicle) platforması əsasında hazırlanmış insansız raket daşıyıcı sistemi kimi diqqət çəkir.
Platformada sürücü və ya ekipaj kabinəsi yoxdur. Onun əvəzinə sensorlar, kameralar və dörd hüceyrəli raket buraxma qurğusu quraşdırılıb. Sistem uzaqdan idarə oluna və ya idarə olunan maşının rəhbərlik etdiyi “leader-follower” rejimində fəaliyyət göstərə bilir.
Bu xüsusiyyət sayəsində sistem şəxsi heyətin yerləşməsinin riskli olduğu ərazilərə göndərilə və atışdan sonra sürətlə mövqeyini dəyişə bilir. “ROGUE-Fires” platforması Norveçin “Kongsberg Defence & Aerospace” şirkəti tərəfindən hazırlanmış NSM (Naval Strike Missile) gəmi əleyhinə raketindən istifadə edir.
Dəniz səthinə yaxın uçuş profilinə malik NSM radarlar tərəfindən aşkarlanmasını çətinləşdirən xüsusiyyətləri ilə seçilir. Raket 125 kiloqramlıq yarımzirehdələn döyüş başlığı daşıyır və son mərhələdə görüntüləyici infraqırmızı tuşlama sistemindən istifadə edir.
Rəsmi məlumatlara görə, NSM 185 kilometrdən artıq mənzilə malikdir və daha uzaqmənzilli yeni variantlar üzərində də işlər davam etdirilir. NMESIS proqramı ABŞ Dəniz Piyadaları Korpusunun “Force Design 2030” transformasiya planının ən mühüm layihələrindən biri hesab olunur.
Proqram çərçivəsində kiçik dəniz piyadası bölmələrinin Yaponiyadan Filippinədək uzanan ada zəncirində yerləşdirilməsi və mühüm dəniz keçid nöqtələrinə nəzarət etməsi nəzərdə tutulur.
İnsansız buraxma qurğularının tətbiqi sayəsində sistemlərin yüksək riskli ərazilərdə fəaliyyət göstərə bilməsi və şəxsi heyətin daha təhlükəsiz məsafələrdə yerləşdirilməsi məqsəd qoyulub.
Sevinc Əliyeva
Ordu.az
