Ordu.az xəbər verir ki, son həftələrdə ABŞ Hərbi Hava Qüvvələri (HHQ) və DARPA tanklara və hətta F-16 döyüş təyyarəsinə nəzarəti Süni Zəkaya (SZ) vermək cəhdlərinin ən son nümunələrini paylaşıb.

Müdafiə sənayesində SZ-nin və avtonom sistemlərin artırılmasını müdafiə edənlər olsa da, bunu etməyənlər də var.

Bəzi siyasətçilər bu cür “hərbi robotlar”a qadağa qoyulmasına çağırırlar.

Avstriyanın xarici işlər naziri Aleksandr Şallenberq Vyanada keçirilən “Bəşəriyyət yol ayrıcında: avtonom silah sistemləri və tənzimləmə problemi” adlı konfransda etdiyi çıxışında hərbi SZ-nin yüksəlişini ilk atom bombasının ixtirasına bənzədib və “qatil robotları” qadağan etməyə çağırıb.

“Bunun bizim nəslimizin Oppenheymer anı olduğuna inanıram”, - deyə o qeyd edib.

O, SZ-nin barıtın ixtirasından sonra müharibədə yaşanan ən böyük inqilab olduğunu, lakin ondan daha təhlükəli olduğunu düşünür.

Şallenberq bildirib ki, hərbi SZ sistemlərində növbəti addım insanların qərar vermə mexanizmindən uzaqlaşdırılması olacaq.

Sevinc Əliyeva
Ordu.az