Ordu.az xəbər verir ki, bu qərar əvvəlcədən nəzərdə tutulmuş qrafikdən üç il daha erkən təqaüd prosesinə işarə edir.
“The Korea Herald”ın məlumatına görə, Cənubi Koreya Hərbi Hava Qüvvələrinin komandanı general Son Sok-rak Seongnam Hava Bazasında keçirilən mətbuat konfransında bildirib ki, F-5 donanmasının xidmətdən çıxarılması prosesi sürətləndirilir.
Təxminən 60 illik xidmət başa çatır
ABŞ-nin “Northrop” şirkəti tərəfindən hazırlanan F-5 döyüş təyyarələri Cənubi Koreyanın ən uzun müddət xidmət göstərən döyüş platformalarından biri hesab olunur.
Cənubi Koreya ilk F-5A/B təyyarələrini 1965-ci ildə əldə edib, 1970-ci illərdə isə daha təkmil F-5E variantlarını inventarına daxil edib. Ölkə 1982-ci ildən etibarən F-5E və F-5F modellərini lisenziya əsasında istehsal etməyə başlayıb. Bu təyyarələr Cənubi Koreyada müvafiq olaraq KF-5E və KF-5F adlandırılıb.
Hazırda Cənubi Koreya Hərbi Hava Qüvvələrinin inventarında 48 ədəd KF-5E/F döyüş təyyarəsi mövcuddur. Bu platformalar “Suwon/K-13” Hava Bazasında yerləşən 101-ci, 105-ci və 201-ci qırıcı eskadrilyaları tərəfindən istifadə olunur.
İlk seriya istehsalı KF-21 uçuşlarını davam etdirir
F-5 parkının erkən xidmətdən çıxarılması qərarı “Korea Aerospace Industries” (KAI) tərəfindən hazırlanan 4,5-ci nəsil KF-21 “Boramae” döyüş təyyarəsinin əməliyyat xidmətinə qəbuluna yaxınlaşdığı dövrdə verilib. KAI şirkətinin baş direktoru Kim Conq-çul mart ayında təqdim edilən ilk seriya istehsalı KF-21 təyyarəsinin ilk uçuşunu uğurla həyata keçirdiyini və təhvil öncəsi sınaqların davam etdiyini bildirib.
Şirkət ilk seriya istehsalı təyyarənin 2026-cı ilin sentyabr ayının əvvəlində Cənubi Koreya Hərbi Hava Qüvvələrinə təhvil verilməsinin planlaşdırıldığını açıqlayıb.
13 min sınaq meyarı tamamlanıb
KAI tərəfindən paylaşılan məlumatlara görə, KF-21 proqramı çərçivəsində bu günədək 13 mindən çox sınaq meyarı uğurla yerinə yetirilib. Proqram ərzində təxminən 1600 sınaq uçuşu həyata keçirilib və heç bir qəza qeydə alınmayıb.
Şirkət həmçinin avtomatlaşdırılmış istehsal infrastrukturu sayəsində ildə 20-dən çox KF-21 istehsal etməyi hədəflədiyini bildirib. Kim Conq-çul qeyd edib ki, KF-21 üçün beynəlxalq bazarda da ciddi tələbat potensialı mövcuddur. Onun sözlərinə görə, İndoneziya, Malayziya, Filippin və Polşa daxil olmaqla müxtəlif ölkələrlə danışıqlar davam edir.
Şirkət ixrac bazarında 200-dən çox təyyarəlik potensial görür.
“Block-II” xərcləri artır
Digər tərəfdən proqramın ikinci mərhələsi olan “Block-II” prosesində xərclərin artması diqqət çəkir. “AeroTime”ın məlumatına görə, “Block-II” istehsal mərhələsinin dəyəri təxminən 12,5 milyard dollara yüksəlib.
Bu göstərici 2024-cü ildə açıqlanan 10,5 milyard dollarlıq ilkin qiymətləndirmədən təxminən 30 faiz çoxdur. Cənubi Koreya Müdafiə Təchizat Proqramları Administrasiyası (DAPA) xərclərin artmasının əsas səbəbləri kimi qlobal inflyasiyanı, Koreya vonunun dəyər itirməsini və beynəlxalq təchizat zəncirində yaşanan problemləri göstərib.
Təhvil qrafiki yenidən qiymətləndirilə bilər
2015-ci ildə başladılan KF-21 proqramı Cənubi Koreyanın köhnəlmiş F-4 “Phantom II” və F-5 döyüş təyyarələrinin əvəz olunması məqsədilə hazırlanır. İlk prototip 2021-ci ildə ictimaiyyətə təqdim olunmuşdu.
Proqramın ilk mərhələsi olan Block-I çərçivəsində 2028-ci ilə qədər “hava-hava” tapşırıqlarına yönəlmiş 40 ədəd KF-21 istehsal olunacaq. “Block-II” mərhələsində isə 2032-ci ilə qədər tam çoxməqsədli imkanlara malik əlavə 80 döyüş təyyarəsinin xidmətə qəbul edilməsi nəzərdə tutulur.
Sevinc Əliyeva
Ordu.az
