Ordu.az xəbər verir ki, ABŞ-də yerləşən “Newsweek”də dərc olunan qiymətləndirmədə AUKUS ölkələrinin xüsusilə sualtı rabitə kabelləri və enerji xətlərinə yönəlmiş sabotaj təhdidlərinə qarşı yeni həllər üzərində fokuslandığı bildirilib.
Sinqapurda keçirilən görüşlərdə kritik sualtı infrastrukturun qorunmasının əsas mövzulardan biri olduğu qeyd edilib.
Böyük Britaniyadan 200 milyon dollarlıq sərmayə
Məlumata görə, Birləşmiş Krallıq insansız sualtı vasitələrin hazırlanması üçün təxminən 200 milyon dollarlıq sərmayə planlaşdırır. Hazırlanacaq sistemlərin ən geci bir il ərzində sınaq mərhələsinə başlaması hədəflənir.
Layihənin sualtı infrastrukturun qorunması, müşahidə fəaliyyətlərinin artırılması və zərurət yaranarsa hücum tapşırıqlarının icrasına yönəlmiş imkanlar qazandırması nəzərdə tutulur.
Bu təşəbbüsün Hind-Sakit okean regionunda artan gərginlik və Çinin genişlənən dəniz mövcudluğu ilə bağlı narahatlıqlar fonunda həyata keçirildiyi qiymətləndirilir.
AUKUS-un mərkəzində Çin dayanır
2021-ci ildə yaradılan AUKUS tərəfdaşlığı ABŞ, Birləşmiş Krallıq və Avstraliya arasında müdafiə əməkdaşlığını dərinləşdirməyi hədəfləyir.
İttifaqın əsas məqsədlərindən biri Çinin Hind-Sakit okean regionundakı təsirini balanslaşdırmaq kimi göstərilir. Xüsusilə inkişaf etmiş sualtı və avtonom sistem layihələrinin gözləniləndən yavaş irəliləməsi zaman-zaman tənqidlərə səbəb olub.
ASELSAN-ın KILIÇ və TUFAN sistemləri ön plana çıxır
Beynəlxalq aləmdəki bu inkişaflar ASELSAN-ın yerli və milli imkanlarla hazırladığı insansız dəniz sistemlərini yenidən gündəmə gətirib.
ASELSAN “SAHA Expo”da ilk dəfə KILIÇ 200 kamikadze avtonom sualtı platformasını və TUFAN kamikadze insansız suüstü platformasını təqdim etmişdi.
KILIÇ 200-ün önə çıxan xüsusiyyətləri arasında:
Təxminən 3,5 metr uzunluq
32 santimetr gövdə diametri
185 kilometr əsas mənzil
Əlavə batareya ilə 370 kilometrədək mənzil
Gizli sualtı əməliyyat qabiliyyəti
Dəniz təhdidlərini aşkarlama və məhv etmə bacarığı
Sürü əməliyyatına uyğun arxitektura yer alır.
DERİNGÖZ də tapşırıq spektrini genişləndirir
ASELSAN-ın hazırladığı digər insansız sualtı platforma olan DERİNGÖZ isə modul quruluşu ilə həm hərbi, həm də mülki tapşırıqlarda istifadə oluna bilir.
Platforma yüksək manevr qabiliyyəti, dəqiq naviqasiya sistemləri və müxtəlif faydalı yüklərin inteqrasiya oluna bildiyi çevik quruluşu ilə diqqət çəkir.
Sevinc Əliyeva
Ordu.az
