Ordu.az xəbər verir ki, bu barədə “Tasnim” agentliyi məlumat yayıb.

Parlamentin virtual iclasında çıxış edən Qalibaf bildirib ki, ölkədə son hadisələr, raket və dəniz əməliyyatlarından tutmuş kütləvi ictimai aksiyalara qədər bütün proseslər İranın ali rəhbəri Müctəba Xameneyinin rəhbərliyinin nəticəsidir.

O, ali rəhbərin deputatlara ünvanladığı son müraciəti yüksək qiymətləndirərək onu “fəaliyyət üçün rəhbər sənəd və gələcəyə aparan yol xəritəsi” adlandırıb.

Qalibaf qeyd edib ki, parlament həmin müraciətdə yer alan göstərişləri ardıcıl şəkildə həyata keçirməyi planlaşdırır.

Parlament sədri xüsusilə milli birliyin qorunması çağırışına diqqət yetirilməsinin vacibliyini vurğulayıb. Onun sözlərinə görə, rəqiblər cəmiyyətdə parçalanma və daxili sabitsizlik yaratmağa çalışırlar.

“Bu gün İran böyük və tarixi müharibə şəraitində düşmənlərini geri çəkilməyə məcbur edir”, - deyə o bildirib.

Qalibafın fikrincə, qələbənin əsasını cəmiyyətin birliyi və həmrəyliyi təşkil edir.

O vurğulayıb ki, rəqiblərin uğursuzluqları təkcə İran Silahlı Qüvvələrinin hərbi gücü və yüksək döyüş hazırlığının deyil, həm də xalqın dözümlülüyü və birliyinin nəticəsidir.

“Məhz bu amillərin vəhdəti uğurun açarına çevrilib və onu qorumaq lazımdır”, - deyə Qalibaf qeyd edib.

Eyni zamanda o xəbərdarlıq edib ki, qarşıdurmanın yeni mərhələsində rəqiblər hərbi uğursuzluqları iqtisadi təzyiq və informasiya kampaniyaları ilə kompensasiya etməyə çalışırlar. Bu fəaliyyətlər daxili fikir ayrılığı yaratmağa və ictimai həmrəyliyi zəiflətməyə yönəlib.

İran parlamentinin sədri hərbi sahəni, ictimai səfərbərliyi, diplomatiyanı və dövlət institutlarının fəaliyyətini vahid mübarizənin dörd qarşılıqlı əlaqəli cəbhəsi adlandırıb.

Onun sözlərinə görə, döyüş meydanında İranın raket potensialı sayəsində əldə olunan uğurlar əhalinin dəstəyi hesabına mümkün olub.

Qalibaf bildirib ki, diplomatiyanın vəzifəsi bu nailiyyətləri siyasi və hüquqi nəticələrə çevirmək, dövlət qurumlarının vəzifəsi isə yaranmış imkanlardan vətəndaşların problemlərinin həlli üçün istifadə etməkdir.

O həmçinin vurğulayıb ki, iranlı diplomatlar rəqiblərin bəyanat və vədlərinə etibar etmirlər.

“İran öz öhdəliklərini yalnız konkret nəticələr müqabilində yerinə yetirəcək və İran xalqının hüquq və maraqlarının qorunacağına tam əminlik yaranmadan heç bir saziş təsdiqlənməyəcək”, - deyə Qalibaf bildirib.

Sevinc Əliyeva
Ordu.az