Ordu.az bu gecə Yaxın Şərqdə baş vermiş əsas hadisələrin qısa icmalını təqdim edir.
Eyni zamanda İsrail elan olunmuş atəşkəsə baxmayaraq Livan ərazisinə zərbələr endirməyə davam edir ki, bu da atəşkəs rejiminin faktiki olaraq pozulduğunu göstərir. Ümumilikdə region uzunmüddətli eskalasiya vəziyyətində qalır və gərginliyin daha da artması riski mövcuddur.
İran Silahlı Qüvvələrinin “Xatəm əl-Ənbiya” Mərkəzi Qərargahı bəyan edib ki, Hörmüz boğazında gəmiçiliyin idarə olunması İran İslam Respublikasının silahlı qüvvələri tərəfindən “tam qətiyyət və tam nəzarət” altında həyata keçirilir.
Bəyanatda vurğulanıb ki, bütün ticarət gəmiləri, mülki gəmilər və neft tankerləri yalnız müəyyən edilmiş marşrutlarla hərəkət etməli və keçid üçün İslam İnqilabı Keşikçiləri Korpusunun Hərbi Dəniz Qüvvələrindən icazə almalıdırlar.
Livanın baş naziri Nəvaf Salam İsrailin ölkənin cənubunda hərbi fəaliyyətini artırmasını pisləyərək baş verənləri “təhlükəli və misli görünməmiş eskalasiya” adlandırıb.
O, dərhal atəşkəsə çağırıb və bildirib ki, “yandırılmış torpaq” siyasəti İsrail üçün təhlükəsizliyi təmin edə bilməz.
Amerika mətbuatı ABŞ Prezidenti Donald Trampın İrana qarşı tələblərini sərtləşdirdiyini yazıb. Bildirilir ki, o, nümayəndələri tərəfindən İranla razılaşdırılmış sazişə bir neçə düzəlişin edilməsini istəyib.
Ağ Ev nümayəndəsi jurnalistlərə görüşdən sonra bildirib ki, Tramp “yalnız Amerikanın xeyrinə olan, onun tələblərini ödəyən və İranın heç vaxt nüvə silahına sahib ola bilməyəcəyinə təminat verən razılaşmanı imzalayacaq”.
Sevinc Əliyeva
Ordu.az
