Ordu.az xəbər verir ki, bu barədə İranın “Fars” agentliyi məlumat yayıb.
SEPAH-ın açıqlamasına görə, yerli vaxtla gecə saat 01:30 radələrində dörd neft tankeri İran hakimiyyət orqanları ilə razılaşdırılmadan Hörmüz boğazını tərk etməyə cəhd edib. Tehran iddia edir ki, həmin gəmilər ABŞ hərbçilərinin dəstəyi ilə hərəkət edib və SEPAH Hərbi Dəniz Qüvvələrinin çoxsaylı xəbərdarlıqlarına məhəl qoymayıblar.
İran tərəfinin versiyasına əsasən, həyata keçirilən əməliyyatdan sonra tankerlərdən biri dayandırılıb, digərləri isə geri dönərək əvvəlki istiqamətə qayıdıblar.
SEPAH bildirir ki, təxminən bir saat sonra ABŞ-yə məxsus Pilotsuz Uçuş Aparatları (PUA) İranın cənubunda yerləşən iki rabitə obyektinə, Qeşm adası və Sirik şəhərindəki hədəflərə zərbələr endirib.
Bunun cavabında SEPAH-ın Aerokosmik Qüvvələri Küveytdə yerləşən Əli əl-Salem aviabazası və Bəhreyndəki ABŞ Hərbi Dəniz Qüvvələrinin Beşinci Donanmasına məxsus obyektlər istiqamətində ballistik raketlər buraxıb.
İran tərəfi bu addımları ABŞ hücumuna cavab kimi qiymətləndirib və bölgədə vəziyyətin daha da gərginləşə biləcəyi barədə xəbərdarlıq edib.
Bəyanatda vurğulanıb ki, oxşar hadisələrin təkrarlanacağı təqdirdə cavab tədbirləri məhdud xarakter daşımayacaq.
SEPAH eyni zamanda Hörmüz boğazını tamamilə bağlamaqla bağlı əvvəlki təhdidlərini yenidən səsləndirib. İran rəsmiləri dünya neft və qaz ixracının ən mühüm marşrutlarından biri hesab olunan boğaz vasitəsilə enerji daşıyıcılarının nəqlinin dayandırılması halında məsuliyyətin ABŞ-nin üzərinə düşəcəyini bildiriblər.
Bu arada ABŞ Silahlı Qüvvələrinin Mərkəzi Komandanlığı da İranın Küveyt və Bəhreyn istiqamətində yeddi ballistik raket buraxdığını təsdiqləyib. CENTCOM-un məlumatına görə, hadisə ABŞ qüvvələrinin Hörmüz boğazı istiqamətində uçan İran zərbə PUA-larını vurmasından və İranın radiolokasiya obyektlərinə zərbələr endirməsindən bir neçə saat sonra baş verib.
Komandanlığın açıqlamasında qeyd olunub ki, ilkin məlumatlara əsasən, buraxılan yeddi raketdən altısı zərərsizləşdirilib, yeddinci raket isə təyin olunmuş hədəfə çatmayıb.
Hazırda tərəflərin açıqlamalarında bir sıra ziddiyyətli məqamlar qalmaqdadır və hadisələrin detalları ilə bağlı müstəqil təsdiq mövcud deyil.
Sevinc Əliyeva
Ordu.az
