Yükdaşımaları həyata keçirən fiziki və hüquqi şəxslərə məhdudiyyətlər qoyulacaq, ikili təyinatlı məhsulların Belarus ərazisindən üçüncü ölkələrə ixracı qadağandır. Bundan əvvəl Aİ Belarus kənd təsərrüfatı məhsullarının idxal kvotalarını minimuma endirib. Sanksiyalar, şübhəsiz ki, siyasidir.

İllərlə Aİ ilə Rusiya arasında yayınmağı, ikisindən də siyasi və iqtisadi dividentlər qoparmağı bacaran Lukaşenko Rusiyanın taktiki nüvə silahlarını ölkə ərazisində yerləşdirdikdən, onun birgə hərbi təlimlərdə istifadəsinin texniki parametrlərini dəqiqləşdirdikdən və Silahlı Qüvvələri döyüş hazırlığı rejiminə gətirdikdən sonra Aİ-nin gözündə inamı tamamilə itirib.

Bunu Belarus Müdafiə Nazirliyinin açıqlaması sübut edir. Həmin açıqlamaya əsasən, Ukrayna tərəfi sərhədə xüsusi təyinatlı qoşun yeridib, pilotsuz uçuş aparatlarının kəşfiyyat uçuşlarını aktivləşdirib və Jitomir vilayətində hava hücumundan müdafiə sistemləri yerləşdirib. Bu açıqlama sanki Belarusun müharibəyə hazırlığını əks etdirir. Ukraynada, xüsusilə Xarkov istiqamətində Rusiyanın hücumu strateji mənada dayandırılıb.

İki həftədən sonra NATO Vaşinqtonda sammit çağırır. Alyansa üzv olan 20 ölkənin Ukrayna ilə ikitərəfli təhlükəsizlik sazişi imzalaması gözlənilir. Belarus Müdafiə Nazirliyinin açıqlaması yəqin ki, Moskvadan müharibədə iştirak etmək, Ukraynaya qarşı şimaldan ikinci cəbhə açmaq barədə göstəriş alındığını sübut edir. Ukrayna tərəfində minlərlə belaruslu Rusiyaya qarşı vuruşur, prezidentliyə namizəd Tixanovskaya bir sıra Qərb ölkələri tərəfindən “seçilmiş prezident” kimi tanınır.

İqtisadi sanksiyalar adi vətəndaşa, eləcə də biznes elitasının maraqlarına zərbə vuracaq. Lukaşenko təcrübəli siyasətçidir və Ukraynaya qarşı hər hansı hərbi əməliyyatın onu da Beynəlxalq Cinayət Məhkəməsinə çıxaracağını hesablamaya bilməz. Məntiqli görünür ki, o, Ukrayna müharibəsinə qarışmamaq üçün əlindən gələni edəcək, “slavyan qardaşlığını bərpa etmək” üçün populist çağırışlar edəcək, Moskva ilə Kiyev arasında “qərəzsiz vasitəçi” kimi görünməyə çalışacaq.

Onun Şanxay Əməkdaşlıq Təşkilatının Astanada keçiriləcək sammitində “Avrasiya Təhlükəsizlik Xartiyası”nı yayımlamayacağını güman etmək olar. Geosiyasi vəziyyət dəyişib və hətta Qırğızıstan prezidenti Sadır Japarov da Belçikada alternativ axtarır. Məsələ burasındadır ki, Lukaşenko hansı vəziyyətdə mövqeyini dəyişəcək, NATO-nun sammitindən dərhal sonra mövqeyini dəyişəcək, yoxsa Birləşmiş Ştatlarda prezident seçkilərinin başa çatmasına qədər fasilə verəcək?

Bəs Rusiyanın hansı əks-tədbiri var?

Asif Cəfərov
Ordu.az