Qranadadakı 5 tərəfli görüşdən öncə təxribat| Makronun açıqlaması nəyə hesablanıb?

2023/09/38421-1695731843.jpg
Oxunub: 29970     19:32     26 Sentyabr 2023    
Cənubi Qafqazla bağlı həyata keçirdiyi bütün siyasəti darmadağın edilən Emmanuel Makron indi də Ermənistana qarşı mümkün hərbi hücumdan narahat olduğunu qeyd edib. O, bu barədə Fransa telekanallarından birinə verdiyi müsahibəsində bildirib. Onun sözlərinə görə, Fransa Ermənistanın ərazi bütövlüyünün qorunub saxlanmasına çox diqqətlə yanaşır və guya təhdidlər Rusiyanın Türkiyə və Azərbaycanla razılaşmalarından qaynaqlanır.

Şübhəsiz ki, Ermənistanın ərazi bütövlüyünün qorunması ilə bağlı Fransanın diqqətli yanaşması İrəvanda müsbət qəbul edilir. Təbii ki, məsələn, Fransanın Afrikanın bir sıra mühüm ölkələrində bir-birinin ardınca sıradan çıxan mövqeyini nə dərəcədə qoruyub saxlaya bildiyini nəzərə alsaq, bu "diqqətin" özünün hansı potensiala malik olması ayrı sualdır.

Fransa prezidentinin təxribat xarakterli bəyanatı bəlkə də başqa bir vəziyyət fonunda nəzərdən keçirilməlidir. Yaxın günlərdə Fransanın təşəbbüsü ilə Avropa Siyasi Birliyinin üçüncü assambleyasının keçiriləcəyi İspaniyanın Qranada şəhərində gözlənilən yeni beştərəfli görüş - İlham Əliyev-Paşinyan-Makron-Şolts-Mişel - gözlənilir. Əvvəlki iki assambleya zamanı ilk olaraq 6 oktyabr 2022-ci ildə Praqada dördtərəfli görüşlər, sonra isə 1 iyun 2023-cü ildə Kişinyovda beştərəfli görüşlər keçirilib.

Praqa görüşü və məşhur razılaşmaların dönüş nöqtəsi yaratdığı, hansı mənanı kəsb etdiyi göz qabağındadır. Məhz bu görüş və ondan sonra Brüsseldə Azərbaycan və Ermənistan qarşılıqlı olaraq ərazi bütövlüyünün tanınmasını ifadə ediblər, Paşinyan Qarabağın Azərbaycanın bir hissəsi olduğunu ifadə edib. İndi isə Qranadada baş tutması gözlənilən mümkün görüşdən bir neçə gün əvvəl, həmin formatın təşəbbüskarı olan Fransa prezidenti Makron Qarabağdakı terrorçu ünsürlərin təmizlənməsindən narahat olaraq Ermənistana dəstək ifadə edir.

Üstəlik, qeyd etmək yerinə düşər ki, Fransa prezidenti Ermənistanın ərazi bütövlüyünə qarşı hər hansı iddia və ya təhdid üçün heç bir əsas və ya səbəbin olmadığı zaman danışır. Bu baxımdan, Fransa prezidentinin Qranadada mümkün görüş öncəsi bəyanatı kifayət qədər qeyri-müəyyən, təxribatçı və narahatedici təəssürat yaradır.

Asif Cəfərov
Ordu.az

© Materiallardan istifadə edərkən hiperlinklə istinad olunmalıdır


Teqlər: Qranada   Görüş   Təxribat  


Bizi "telegram"da izləyin