“Bu gün o yerə çatmışıq ki, dünyanın 22 ölkəsi İrandan PUA-lar almasını tələb edir”, - oktyabrın 18-də İran general-mayoru Yəhya Rəhim Səfəvi elan edib. Onun adını çəkdiyi ölkələr arasında Serbiya və Ermənistan da olub.
“Defense News” nəşri qeyd edir ki, bu ölkələrə İran PUA-larının kütləvi şəkildə tədarükü Balkanlar və Cənubi Qafqaz üçün mühüm strateji təsirlərə malik ola bilər. Məsələn, Serbiya İran PUA-larını alarsa, Belqradı Balkanlarda hərbi pilotsuz təyyarələrin ən böyük operatoruna çevirə bilər.
Bununla belə, analitiklər arasında Belqradın İran PUA-ları ilə maraqlandığına dair güclü şübhə var, bir serb nəzəriyyəçisi qeyd edir ki, Serbiyanın öz ehtiyaclarını ödəmək üçün əhəmiyyətli potensialı var və İranın həm hazır PUA məhsulları, həm də “nou-hau” baxımından təklif edəcəyi çox az şey var.
“İran öz PUA-ları üçün güclü bazar yaradır”, - deyə New Lines Institute”nin strategiya və innovasiyalar üzrə direktoru Nikolas Heras bildirib.
Onun sözlərinə görə, İran PUA-larına artan qlobal maraq Türkiyənin PUA-ları üçün beynəlxalq bazarını necə inkişaf etdirdiyinə cavabdır.
“Türklər yenidən istifadə oluna bilən, davamlı və həm dövlət, həm də qeyri-dövlət aktorlarına qarşı təsirli ola bilən orta mənzilli PUA-ya diqqət yetiriblər. İran döyüş meydanında, xüsusilə quru qoşunlarına qarşı dağıdıcı təsir göstərə biləcək ən dəqiq və uzaq mənzilli artilleriya mərmiləri bazarını inhisara almaq qərarına gəlib. Həm ermənilərə, həm də serblərə daha güclü rəqiblərə tez əhəmiyyətli itkilər vurmaq bacarığı lazımdır. Serbiya halında hədəf NATO, Ermənistan halında Azərbaycandır. İranın PUA-ları bu fürsəti təmin edərdi”, - deyə Heras qeyd edib.
İranın bir neçə belə PUA-sı var ki, bu da Belqrad və İrəvan üçün maraqlı ola bilər.
“İranın Ermənistan və Serbiyaya hansı PUA-ları sata biləcəyinə gəlincə, “Şahed”, “Əbabil”, digər modellər də daxil olmaqla bir sıra variantlar var, çünki hər iki model İranın Yaxın Şərqdəki müvəkkilləri tərəfindən istifadə edilib və indi “Şahed” öz məhdud imkanlarını nümayiş etdirib, lakin əsas potensial Ukraynadadır”, - deyə hərbi dəniz üzrə analitik mərkəzinin analitiki Semyuel Bendet bildirib.
Bendet qeyd edib ki, İran da Türkiyə-Azərbaycan müttəfiqliyindən narahatdır.
Alpər Mövludoğlu
Ordu.az
