"Zatulin" sözünə uyğun 16 nəticə tapıldı!

Qarabağda ilin yekunları: 6 müşahidəçi əvəzinə 13 müşahidəçi

2017/12/4123493534324_1514743500.jpg
Oxunub: 2033     01:53     01 Yanvar 2018    
2017-ci ildə Qarabağ münaqişəsinin nizamlanmasında 10 illik müddətə özünəməxsus yekun vurulur. Bu il "Madrid prinsipləri"nə əsaslanmış qarşılıqlı güzəşt konsepsiyası üzərində iş aparılıb.

10 il keçdikdən sonra məlum oldu ki, qarşılıqlı güzəşt deyə bir şey yoxdur. Bunu prezidentlərin oktyabrın 16-da Cenevrədə keçirilən görüşündən sonra Sarkisyanın səsləndirdiyi bəyanatlar da sübut etdi. Düşmən hazırki anda Dağlıq Qarabağ münaqişəsinin sağlam əsaslarla həllinə tərəfdar deyil və bunu dövlət başçısı səviyyəsində bir daha vurğuladı.

Hazırda ATƏT Minsk qrupunun tərəfləri qarşılıqlı güzəştlərə getmə barədə çağırışları, "kiçik addımlar" diplomatiyası ilə əvəz olunub.

İlk addım olaraq, ATƏT müşahidəçilərinin mandatının genişləndirilməsi, ikinci isə cəbhə xəttində müşahidə mexanizmlərinin tətbiq edilməsi (əsasən Ermənistan tərəfi səsləndirir) nəzərdə tutulur.

Azərbaycan beynəlxalq əsaslarla heç bir zaman irəli sürülən təkliflərdən imtina etməyib. Bu baxımdan 2018-ci ildə ilk addımın həyata keçirilməsi mümkündür. "Azərbaycan ATƏT-in monitorinq missiyasının üzvlərinin sayının artırılması ideyasını müsbət dəyərləndirir. Amma bu, Dağlıq Qarabağ münaqişəsiylə bağlı substantiv danışıqlarla paralel aparılmalıdır və ATƏT-in Minsk qrupunun səylərinə töhfə verməlidir", - deyə Hikmət Hacıyev bildirib.

İkinci prosesin həyata keçirilməsi isə Ermənistan qoşunlarının Azərbaycanın işğal altında olan ərazilərindən tam və qeyd-şərtsiz çıxarılmasından sonra baş verə bilər. Aprel döyüşlərindən sonra, əsasən Ermənistan tərəfindən səsləndirilən bu "istək" Vyana və Sankt-Peterburq danışıqlarında da bildirilib. Lakin, işğal altında olan ərazilərimizin azad edilməməsi fonunda bu prosesin aparılması qanunauyğun deyil. Çünki, istər müşahidə, istərsə də insidentlərin araşdırılması kimi məsələlər Ermənistan qoşunlarının Azərbaycanın işğal olunmuş ərazilərindən çıxarılması prosesinin tərkib hissəsi kimi nəzərdən keçirilməlidir. Ermənistan münaqişənin həllinin substantiv məsələlərindən yayınmaq üçün qəsdən diqqəti müşahidə mexanizmlərinin tətbiq edilməsi, insidentlərin araşdırılması kimi məsələlərə yönəldir.

ATƏT saytına verdiyi müsahibədə ATƏT sədrinin Cənubi Qafqaz üzrə xüsusi nümayəndəsi Günter Bahler, ATƏT-in münaqişənin nizamlanmasında yekun prinsipləri müzakirə etdiyini bildirib.

"Qarabağ münaqişəsinə gəldikdə isə, 2016-cı ilin aprel ayındakı hadisələrdən sonra mövcud olan kiçik etimad da şübhə altına düşüb" - deyə Bahler bəyan edib.

Onun sözlərinə görə, 2014-cü ildə ATƏT-də İsveçrənin sədrliyi dövründə danışıqlar prosesinin elementləri və detalları haqqında tam qeyri-rəsmi sənəd hazırlanıb. Sənəd növbəti sədr olacaq ölkəyə təqdim edilib. Ola bilər ki, bir gün həyata keçirilsin.

Behler qeyd edib ki, keçən il Almaniyanın sədr olduğu zaman ATƏT sədrinin şəxsi nümayəndəsinin missiyasının gücləndirilməsinə çox zaman sərf edilib. Onun sözlərinə görə, məqsəd müşahidəçilərin sayını 6 nəfərdən 13 nəfərə qədər artırmaqdır.

"Biz həmçinin atəşkəsin pozulması hallarının araşdırılması mexanizmləri haqqında qeyri-rəsmi sənəd tərtib etmişik. Bu etimadın artırılması üçün həyata keçirilməli olan daha bir vasitədir", - deyə o vurğulayıb.

Rusiya Dövlət Dumasının deputatı Konstantin Zatulin isə deyib ki, yaxın gələcəkdə Qarabağ münaqişəsinin nizamlanması prosesində irəliləyiş görmür. O, qeyd edib ki, onun ekspert dostları və özü yeni hərbi əməliyyatların olacağını ehtimal etmirlər.

Ümumiyyətlə, baş verən proseslər bizə Ermənistanın danışıqlar yolu ilə kompromislərə gedəcəyini göstərmir. Növbəti il münaqişənin həlli üzrə aparılan danışıqların bu şəkildə təxribatçı bəyanatlarla davam edəcəyi təqdirdə, cəbhədə aprel döyüşlərindən daha geniş toqquşmanın baş verməsi qaçılmaz olacaq. Zatulin hərbi əməliyyatların keçirilmə ehtimalının olmamasını yəqin, 2018-ci il aprel ayına qədər olan müddətlə nəzərdə tutur...

Alpər Mövludoğlu
Ordu.az

© Materiallardan istifadə edərkən hiperlinklə istinad olunmalıdır


Teqlər: Qarabağ   Atəşkəs   Təxribat