"Tender" sözünə uyğun 158 nəticə tapıldı!

Ukraynada keçirilən "Silahlar və Təhlükəsizlik - 2019" beynəlxalq sərgisi nə ilə yadda qaldı? - HƏRBİ EKSPERT

2019/10/345-1570863439.jpg
Oxunub: 1396     14:12     14 Oktyabr 2019    
Ukraynanın paytaxtı Kiyev şəhərindəki Brovarski beynəlxalq sərgi mərkəzində oktyabrın 8-dən 12-nə qədər "Silahlar və Təhlükəsizlik - 2019" XVI Beynəlxalq ixtisaslaşdırılmış sərgi keçirildi.

Sərgidə 370-dən çox nümayəndə heyəti və şirkət iştirak etdi. Onlardan 48-i ümumilikdə 16 xarici ölkəni - ABŞ, Polşa, Danimarka, Finlandiya, Belçika, Belarus, Avstriya, Çexiya, Türkiyə, Almaniya, İtaliya, Latviya, Xorvatiya, İsrail, Çin və Qazaxıstanı təmsil etdi. Milli pavilyonlarda Türkiyə 14 şirkətlə, ABŞ 9 şirkətlə, Polşa 5 şirkətlə, Çexiya isə 3 şirkətlə təmsil olundu. Türkiyənin qonaqlar arasında ən böyük Milli pavilyonla təmsil olunması, Ankaranın Ukrayna silah bazarında əsas oyunçu mövqeyinə yiyələnmək iddiaları ilə birbaşa əlaqəlidir.


Ukrayna iştirakçıları arasında "Ukroboronprom" Dövlət Korporasiyasının 36 müəssisəsi, Ukrayna Müdafiə Müəssisələri Liqasının 23 müəssisəsi, Ukrayna Dövlət Kosmik Agentliyinin 2 müəssisəsi, həmçinin hərbi-sənaye kompleksinin 130-dan çox dövlət və özəl müəssisələri yer aldı.

Sərgi zamanı aşağıdakı seqmentlər üzrə məhsullar ziyarətçilərə təqdim olundu:

- Döyüş sahəsindəki əsgərin fərdi silah və vasitələri;
- Quru Qoşunlarının texnika və silahları;
- Arxa cəbhə təminat vasitələri;
- Hüquq-mühafizə orqanlarının silah və avadanlıqları;
- Sərhəd mühafizəsi və sərhəd nəzarətinin təmin edilməsi vasitələri;
- Hərbi təyyarələr və hava limanları texnikası.
- Mülki insanlar üçün ovçuluq, idman, soyuq silahlar və digər avadanlıqlar da təqdim edildi.



"Ukroboronprom" dövlət konserninin tərkibinə daxil olan "Luç" dövlət konstruktor bürosunun hazırladığı və "Artyom" Dövlət Səhmdar Holdinq Kompaniyasının istehsal etdiyi "Neptun" yerüstü qanadlı raketlər kompleksi ilə bərabər onun gəmiləri məhv etmək üçün P-360 qanadlı raketləri sərginin əsas diqqət çəkən eksponatlarından oldu. Sərgidə kompleks bütün elementlərinin nümunəsi ilə təqdim edildi.

"Neptun" divizionun tərkibinə daxildir:

- 6 ədəd USPU-360 atıcı qurğusu;
- 6 ədəd nəqliyyat yükləmə maşını TZM-360;
- 6 ədəd nəqliyyat vasitəsi TM-360;
- RCP-360 tipli divizionun mobil idarəetmə məntəqəsi;
- 72 ədəd R-360 raketi (4 ədəd atıcı qurğuda, 4 ədəd nəqliyyat yükləmə maşınında, 4 ədəd isə nəqliyyat vasitəsində).


Kompleks bu il silahlanmaya qəbul edilməlidir.


"Motor Siç" şirkətinin Mi-8MSB və Mi-2MSB helikopterləri, eləcə də Fransadan Milli Polis, Fövqəladə Hallar Dövlət Xidməti, Dövlət Sərhəd Xidməti və Milli Qvardiyanın ehtiyacları üçün alınan "Airbus" helikopteri də sərgidəki eksponatlar arasında yer alırdı.



"Ukroboronprom" tərkibinə daxil olan "İskra" Elmi Tədqiqat Dövlət Müəssisəsi aşağı, orta və yüksək hündürlüklərdə uçan hədəfləri aşkar etmək üçün hazırlanan səyyar 90K6E tipli 3D müşahidə RLS-ini, "Luç" isə özünün "Stuqna-P" və "Korsar" tank əleyhinə raket komlekslərini, "Skif" və "Baryer" daşınan tank əleyhinə raket sistemlərini təkrar təqdim etdi.

"Ukrayna Zirehli Texnika" Dizayn və İstehsalat Müəssisəsi, sərgidə bir sıra maraqlı nəqliyyat vasitələri nümayiş etdirdi. Onlardan biri də "Ford F-550" (4x4) şassisində modernləşdirilən "Novator" zirehli avtomobili oldu. Avtomobil təkər təzyiqini tənzimləyən mərkəzləşdirilmiş sistem, termal kamera, ön və arxa görüntü kameraları əldə edib. Zirehli avtomobil avtomatik yanğınsöndürmə sistemi ilə təchiz edilir. Daşınan şəxsi heyət əl qumbaralarından, qəlpələrdən və artilleriya mərmilərindən qorunur. 6845 kq kütləyə malik ərazi vasitəsi 2000 kq yük daşıyır. 300 at gücünə malik 6.7 litrlik turbodizel mühərrik 6 pilləli avtomatik transmissiya ilə çalışır.


"Ukrayna Zirehli Texnikaları" MMC-nin stendində VARTA və NOVATOR ixtisaslaşdırılmış avtomobilləri, həmçinin yaralıların daşınması üçün nəqliyyat vasitəsi də nümayiş olundu.

"Praktika" şirkətinin hazırladığı "Kozak" və "Otaman-2" zirehli personal daşıyıcıları da marağa səbəb olan vasitələr arasında idi.

Bundan başqa "Ukroboronprom" müəssisələri BMP-M1 və BMP-IT, ZTR "Plovets" döyüş maşınlarının modernləşdirilən versiyalarını, "Kozak” texniki kəşfiyyat maşınını, "Xortisiya-P" REM kompleksini, "Xortisiya-M" Radiokəşfiyyat kompleksini, TRM-80D təmir emalatxanasını, PKU-150 generator qurğusunu, pikap bazasında PUA-lara qarşı mübarizə vasitələrini, mühəndis texnikalarını, zirehli gödəkçə və dəbilqələrini təqdim etdilər. Bunların arasında 650 kq kütləli və 350 kq yük daşıya bilən, 6x6 təkər formulasına, TƏİRK və 12.7 mm pulemyota malik "Fantom" pilotsuz zirehli vasitəsi də mövcud idi.


Yüksək keyfiyyətli odlu silah və aksesuarların beynəlxalq distribütoru olan "İntersec" MMC sərgidə "Stag Arms" istehsalı olan 5.56x45 mm və 7.62x39 mm çaplı 5 müxtəlif AR15 tüfənginin modellərini təqdim etdi.

Keçən ildən bəri sərgidə iştirak etmək üçün xarici tərəfdaşlarını cəlb edən yerli "Europe Arm Sport" MMC bu il də ənənəsinə sadiq qaldı. Ziyarətçilərdən hər biri HS PRODUKT (Xorvatiya), MKEK (Türkiyə), Canik (Türkiyə) və GLOCK (Avstriya) şirkətlərinin birgə stendini ziyarət etmək imkanı əldə etdilər.

Yerli IBIS şirkətinin stendində isə üç yüzdən çox çeşiddə silah və aksesuar təqdim edildi. Yeni məhsullar arasında "Tayfun" hamar lüləli silahları, onların "Tayfun XII Light Sabit Stok" sabit və "Typhoon XII Light Carbine Stock" teleskopik qundaqlı modelləri də yer aldı.

Bundan əlavə, şirkətin stendində hər kəsin dünyaca məşhur optik cihaz istehsalçısı "NightForce" nümayəndələrini görməsi və müsahibə verməsi diqqətləri çəkdi.


"Taktik Sistemlər" şirkəti Avropa və ABŞ-ın aparıcı istehsalçılarının mallarını satan və "SigSauer", "DeserTech", "Aimpoint", "Haix", "Carinthia", "NFM Group", "Orijinal SWAT", "Thorogood Shoes", "Revision" və digərləri də daxil olmaqla 20-dən çox xarici şirkətin Ukraynadakı rəsmi nümayəndəsidir. Yüksək keyfiyyətli malların tədarükündə ixtisaslaşmış şirkət bu dəfə də ziyarətçilərə və müştərilərinə yüksək dəqiqlikli silah, aksesuar və digər avadanlıqların geniş seçimini təklif etdi.

Bu il yerli "Zbroyar" şirkətinin stendində sərgilənən milli istehsal olan Z-15 "Sport SS 18" və Z-008 "Gen 3 Precision 26" tüfəngləri atıcı silah həvəskarlarının və mütəxəssislər də daxil olmaqla bir çox ziyarətçilərin diqqətini cəlb etdi.

Silahlara qulluq məhsulları ilə tanınan XADO konserni son inkişafını - çaxmağı tətik arxasında yerləşən "bull-pap" sxemi ilə hazırlanan və modernləşdirilən "Snipex M" snayper tüfəngini təqdim etdi.


Yeni və təkmilləşdirilən silah nümunələrini təqdim edən "Fort" Elmi-İstehsalat Birliyinin stendi ənənəvi olaraq ziyarətçilərin böyük diqqətini cəlb edir. Əsas yeniliklərdən biri lüləsi dəyişdirilə bilən "Fort 250" tüfəngi oldu. Tüfəng üç növ mərmidən- yerli, NATO və ABŞ-ın bəzi nadir mərmiləri ilə atəş aça bilir. Bunun üçün sadəcə lülə, çaxmaq və xəzinə dəyişdirilməlidir.

Ukraynanın "Tor Legenda Plus" şirkəti THOR unikal ərazi maşını ilə yadda qaldı. Bu maşın davamlı yolsuzluq şəraitində 68 km/saat sürət inkişaf etdirən dünyada ilk ərazi avtomobilidir.

"Brunswick Corporation", ТМ "Mercury", "Motorguide", "Mercury Mercruiser", "Quicksilver" və s. kimi şirkətlərin mühərrik və avadanlıqlarla təchiz edilən gəmilərinin Ukraynada rəsmi nümayəndəsi olan COLIBRY gəmiqayırma şirkəti hərbi, polis və xilasetmə qrupları tərəfindən peşəkar istifadə üçün nəzərdə tutulan qayıqları nümayiş etdirdi.


BRP (Bombardier Recreational Products) Korporasiyası və onun Ukraynadakı rəsmi dileri, ovçuluq və aktiv istirahət üçün nəzərdə tutulan "Can-Am" kvadrosikllərini, "Flarm" şirkəti isə istehsal etdiyi travmatik qeyri-döyüş silahlarını təqdim etdi.

Xarkov Padioelektronika və Xmelnitski Milli Universitetlərinin tələbə və müəllim heyətlərinin sərgidə öz məhsullarını təqdim etməsi təqdirəlayiq hal hesab olunmalıdır.

Xatırlayırsınızsa, Belarusun paytaxtı Minskdə də bu ilin mayında keçirilən MILEX-2019 sərgisində müddətli xidmətdə olan hərbi qulluqçulardan formalaşdırılan "informasiya texnologiyası bölüyü" və onların ixtiralarının təqdim edildiyi barədə xəbər vermişdik. Hesab edirəm ki, bu yeniliklər bizim ölkəmiz üçün də faydalı ola bilər və onların tətbiq edilməsi mümkündür.

Türkiyə

Türkiyə sərgidə "BAYKAR Defense and Technologies", ASELSAN və ROKETSAN, MKEK, "Asyay", "2G Aviasiya Elektronik"," Ariteks", "Menatek", "C4 Defence", DLG "Tactical", "Ostim", RST "Texnoloji", STM, "Suprobox", "Transvaro", ZSR şirkətləri ilə geniş təmsil olundu.


Ukrayna ilə Türkiyənin hərbi texniki sahədə əməkdaşlığının sürətlə inkişaf etdiyi sirr deyil. "BAYKAR Defense and Technologies" tərəfindən istehsal edilən və sərgidə nümayiş etdirilən yeganə silahlı PUA olan "Bayraktar TB 2" pilotsuz uçuş aparatları Ukraynada ölkə rəhbərliyinin də marağına səbəb oldu. 6 ədəd "Bayraktar TB 2" pilotsuz hava vasitəsi oktyabrın sonunda Ukrayna Ordusunun silahlanmasına təhvil veriləcək. Bu PUA-ları istifadə edəcək ukraynalı operator və texniki personal artıq Türkiyədə təlimlərini başa vurub.


ASELSAN isə 16-cı dəfə keçirilən bu sərginin hamısında iştirak edib. Hazırda Ukrayna ilə ortaq layihələr həyata keçirir. Bunlardan biri də ASELSAN ilə "Ukroboronprom"a daxil olan "Luç" və "SpetsTechnoExport" şirkətlərinin birgə hazırladığı və bu sərgidə təqdim edilən "Serdar" tank əleyhinə idarə olunan raket kompleksidir. Bu mobil kompleksin Ukraynanın "Skif" komplekslərinin bir variantı olduğu ehtimal edilir.

Bundan başqa Ukrayna Silahlı Qüvvələri ASELSAN radiostansiyalarından illərdir ki, istifadə edir. Həmin avadanlıqların əksəriyyəti Ukrayna ərazisində istehsal edilir. Bu yazı hazırlanarkən ASELSAN Ukraynada yeni istehsal sahəsinin yaradıldığı barədə növbəti məlumatı çatdırdı.


ASELSAN-ın kürəkdə daşınan və zirehli vasitələr üzərinə quraşdırılan dron əleyhinə sistemləri, həmçinin güllə izinə görə snayperlərin mövqeyini müəyyənləşdirən və onları zərərsizləşdirən yeni silah sistemləri də Ukrayna Ordusunun maraq dairəsindədir.


ROKETSAN bu dəfə də ənənəvi olaraq özünün son istehsal etdiyi müxtəlif çaplı sursat və idarəolunan raketlərini təqdim etdi.

Digər ölkələr

ABŞ-ın "Aero Precision" şirkətinin nümayəndələri sərgiyə M5E1 və M4E1 tüfənglərinin modifikasiyaları və AR15 tüfənginin xüsusi versiyasının daxil olduğu 10-a yaxın silah nümunəsi təqdim etdi.


"Czechoslovak Group"un törəmə şirkəti olan "Excalibur Army" şirkəti 152 mm-lik DANA M2 özüyeriyən artilleriya qurğusunu sərgidə ziyarətçilərə təqdim etdi.

BƏƏ-nin "International Armored Group" şirkətinin nümayəndələri isə bu il hərbçilərlə bərabər mülki şəxsləri də maraqlandıracaq "Toyota Land Cruiser 200" ərazi avtomobilinin zirehli versiyasını təqdim etdilər.

Nəticə

1. Ukraynanın Kiyev şəhərindəki Brovarski beynəlxalq sərgi mərkəzində oktyabrın 8-dən 12-nə qədər keçirilən "Silahlar və Təhlükəsizlik - 2019" XVI Beynəlxalq ixtisaslaşdırılmış sərgisinin miqyası Ukraynanın hərbi avadanlıqlara olan tələbatına uyğun deyildi. Sərgidə həm şirkətlərin, həm də ziyarətçilərin iştirak səviyyəsi kifayət qədər aşağı idi.

İştirakçı şirkətlər arasında Avropa, NATO və keçmiş SSRİ ölkələri demək olar ki, görünməyəcək qədər passiv iştirak etdilər. 16 ölkədən 48 şirkətin iştirak etdiyi sərgidə ABŞ və Türkiyənin şirkətlərini çıxsaq, yerdə qalan 14 ölkə üçün cəmisi 25 şirkət qalır.

2. Sərgiyə girişin ödənişli olması, silah ixrac etməyi planlaşdıran, yüksək gəliri olmayan ölkələr üçün müsbət nəticələr vəd etmir.

3. Xarici şirkətlərin sərgiyə zəif maraq göstərməsi, onların silah satınalmaları üzrə tenderlərdə iştirakı zamanı yerli şirkətlərə üstünlük verilməsi və ya tenderə qatılan zaman qarşılaşdıqları süni problemlərlə əlaqələndirilə bilər.

4. Yerli müdafiə sənayesində özəl şirkətlərin məhsullarının sayı artan xətlə inkişaf edir.

5. Universitetlərin və tələbələrin sərgidə iştirakı müsbət ənənədir və təqdir olunmalıdır.


Mənbələr:

https://www.ukrinform.ru/rubric-kyiv/2795213-v-kieve-prohodit-mezdunarodnaa-vystavka-oruzie-i-bezopasnost2019.html
https://www.iec-expo.com.ua/ru/oruzh-2019.html
https://lb.ua/news/2019/10/09/439339_zelenskiy_posetil_voennuyu_vistavku.html
https://www.ukrhaber.com/blog/kievde-uluslararasi-silah-ve-guvenlik-fuari-basladi-foto/#.XZ7a_FUzaM8
https://www.cnnturk.com/dunya/turk-savunma-sanayisine-ukraynada-buyuk-ilgi?page=26


Hərbi ekspert Ədalət Verdiyev
Ordu.az

© Materiallardan istifadə edərkən hiperlinklə istinad olunmalıdır


Teqlər: