" Təxribat " sözünə uyğun nəticə tapıldı!

"Təxribat" - (433 )

Ermənistan ordusunda itki, yaralanma, qəza və korrupsiya hadisələri – AYLIQ HESABAT

2019/06/fed88-1561786573.jpg
Oxunub: 1927     10:38     29 Fevral 2020    
Ordu.az 2020-ci ilin fevralın 1-dən 29-na kimi Ermənistan ordusunda qeydə alınan itki, yaralanma, qəza və oğurluq faktı ilə bağlı hadisələrin hesabatını təqdim edir.

Fevral ayının nəticələrinə görə, Ermənistan ordusunda 8 ölüm hadisəsi (3-ü qar uçqunu, 2-si intihar, 2-si naməlum, 1-i təxribata cəhd) qeydə alınıb.

Düşmən ordusunda bu ayın rəsmi və qeyri-rəsmi statistikasına əsasən, 15 düşmən hərbçisi (11-i qəza, 2-si təxribata cəhd, 1-i qar uçqunu, 1-i silahla davranış qaydalarının pozulması nəticəsində) yaralanıb.

Həmçinin 4 korrupsiya və 2 fərarilik faktı da aşklarlanıb.

2 fevral

Saat 10:40 radələrində Ermənistanın Kotayk vilayətində İrəvan-Sevan avtomobil yolunda, Şimal avtovağzalı yaxınlığında Kotayk vilayəti sakinləri, 23 yaşlı C. Sergeyin idarə etdiyi “QAZ 24” markalı “43 SS 560” nömrəli və 29 yaşlı Q. Razmikin idarə etdiyi “Mercedes” markalı “35 CM 223” nömrəli avtomobillər toqquşub.

Hadisə nəticəsində 2 sürücü və “Mercedes” markalı avtomobilin sərnişini, Kotayk vilayəti sakini, 35 yaşlı M. Karen bədən xəsarətləri alaraq “Abovyan” tibb mərkəzinə yerləşdiriliblər.

Qeyd olunur ki, xəstəxanaya yerləşdirilmiş “Mercedes” markalı avtomobilin sürücüsü və onun sərnişini Ermənistan Müdafiə Nazirliyinin “N” saylı hərbi hissəsində müqaviləli hərbi qulluqçu kimi xidmət edir.

*****

Xankəndi-Əsgəran magistral yolunun 16-cı kilometrliyində 1993-cü il təvəllüdlü Şuşa sakininin idarə etdiyi "Opel Vectra" markalı avtomobil qəzaya düşüb.

Yol buz bağladığından hərəkətdə olan avtomobil idarəetmədən çıxaraq aşıb.

Qəza nəticəsində xəsarət alan sürücü Xankəndində yerləşən hərbi xəstəxanaya aparılıb. Onun nəqliyyat vasitəsini sürücülük vəsiqəsi olmadan idarə etdiyi məlum olub.

Qəza törədən şəxs hərbçi olsa da, Ermənistan tərəfi bunu gizlətməyə çalışır.

3 fevral

Saat 07:35 radələrində işğal altında olan Qarabağın cənub-şərq istiqamətində yerləşən hərbi hissələrdən birinin döyüş mövqeyində, ilkin versiyaya görə, silah istifadəsi qaydalarının pozulması nəticəsində erməni hərbi qulluqçulardan biri yaralanıb.

Yaralanan erməni hərbi qulluqçu 2000-ci il təvəllüdlü Artur Tiqran Dalakyan olub.

4 fevral

Ermənistan Milli Təhlükəsizlik Xidməti böyük məbləğdə rüşvət alınması hadisəsini aşkara çıxarıb.

Əldə olunmuş fakiki məlumatlara əsasən, 2 nömrəli Nevroloji Tibb Birliyinin nevrologiya şöbəsinin baş nevroloqu 2019-cu ilin noyabr-dekabr aylarında 4 hərbi çağırışçının yaxınlarından ümumilikdə 8.500 ABŞ doları rüşvət alıb.

Həmçinin faktiki məlumatlar əldə olunub ki, yuxarıda qeyd edilmiş şəxs 2019-cu il ərzində hərbi qulluqçular üçün məcburi müddətli hərbi xidmətdən möhlət alınması və hərbi qulluqçuları müddətli hərbi xidmətdən vaxtından əvvəl tərxis edilməsi məqsədilə hərbi qulluqçuların yaxınlarından vasitəçi olaraq müvafiq orqanlara rüşvət verilməsi üçün ümumilikdə 45.000 ABŞ dolları pul alıb.

7 fevral

Saat 16:50 radələrində Ermənistanın Sünik vilayətində “N” saylı hərbi hissəsinin döyüş mövqeyində dörd müqaviləli erməni hərbi qulluqçu qar uçqununa düşüb. Hərbi qulluqçulardan 3-ü ölüb, 4-cü isə bədən xəsarətləri alıb.

Məlumat Ermənistan Müdafiə Nazirliyinin mətbuat katibi Artsrun Hovhannisyan tərəfindən təsdiqlənib.

8 fevral

Saat 18:45 radələrində Ermənistanın Armavir vilayətinin Merdzavan kəndində yol-nəqliyyat hadisəsi baş verib.

Hadisə nəticəsində “Mercedes” markalı avtomobil hərbi hissənin divarına çırpılıb.

Qeyd olunur ki, qəza nəticəsində xasarət alan şəxsin olması barədə xəbər daxil olsa da, hadisə yerində zərərçəkən tapılmayıb.

*****

Saat 06:50 radələrində Ermənistanın Qeğarkunik vilayətində Sevan (Yelenovka) - Martuni (Aşağı Qaranlıq) - Qetap (Qoytur) avtomobil yolunun 57 km hissəsində, Tsakkar (Dəlikdaş) kəndinin inzibati ərazisində "Mercedes" markalı "87 OQ 008" nömrəli avtomobillə "Opel Vectra" markalı "36 AT 621" nömrəli avtomobil toqquşub.

Baş vermiş hadisə nəticəsində 8 nəfər müxtəlif bədən xəsarətləri alaraq xəstəxanaya yerləşdirilib.

Məlumata görə, hadisəyə səbəb kimi yolun buzlu olması göstərilir.

Qeyd olunur ki, sürücü və yaralılar hərbi andiçməyə, daha dəqiq desək, “Opel” markalı avtomobilin sürücü və sərnişinləri İcevan hərbi hissəsinə, “Mercedes” markalı avtomobilin sürücü və sərnişinləri isə Avrdenis hərbi hissəsinə gedirdilər.

*****

Saat 21:00 radələrində işğal altında olan Qarabağdan qayıdan Ermənistan sakini Ağdərə-Vardenis avtomobil yolunun 115-ci km hissəsində qəza törədib.

Qəza nəticəsində Ermənistanın Kotayk vilayətinin Hrazdan şəhər sakini 49 yaşlı Hrant Hovhannisyan ölüb.

Qeyd olunur ki, ölmüş şəxs Qarabağda hərbi "andiçmə mərasimi"ndə iştirak edib və hadisə qayıdarkən baş verib.

Məlumata görə, yolun buzlu olmasına görə avtomobillər hərəkətə edə bilməyib, bir neçə şəxs avtomobilləri itələyərək yolun buzlu hissəsindən çıxmağa çalışıb, bu zaman sözügedən şəxsin halı pisləşib və nəticədə ölüb.

9 fevral

İşğal altında olan Qarabağda qanunsuz dislokasiya olunan Ermənistan ordusunun hərbi hissələrindən birinin döyüş mövqelərində ölüm faktı qeydə alınıb.

Saat 07:45 radələrində işğal altında olan Qarabağın cənub istiqamətindəki döyüş mövqelərindən birində erməni hərbi qulluqçu, 2001-ci il təvəllüdlü hərbi qulluqçu Valeri Petrosyan ölü tapılıb.

10 fevral

Saat 13:30 radələrində Ermənistanın Lori vilayətində Stepanavan (Cəlaloğlu) şəhər sakini, 32 yaşlı Sayad Abovyan idarə etdiyi “QAZ 31105” markalı “36 OV 039” nömrəli avtomobillə Bazum (Bozabdal) kəndi yaxınlığında yerləşən “N” saylı hərbi hissənin nəzarət-keçid məntəqəsinə çatmamış qəzaya uğrayaraq aşıb.

Qəzaya uğramış sürücü, 32 yaşlı Ermənistan ordusunun müqaviləli hərbi qulluqçusu Sayad Abovyan müayinə məqsədilə Vanadzor hərbi hospitalına müraciət edib.

Qeyd olunur ki, yol buzlu olub, məsul şəxslər yolun duz və qumla örtülməsi istiqamətində heç bir tədbir görməyiblər.

12 fevral

İşğal edilmiş yaşayış məntəqələrimizdə yerləşdirilən Ermənistan silahlı qüvvələrinin bölmələrində baş verən nizamnamədənkənar davranış nəticəsində daha bir əsgər özünə qəsd edib.

İşğalçı ordunun Xocəvənd yaşayış məntəqəmizdə yerləşdirilən bölmələrindən birinin əsgəri, 2019-cu ildə hərbi xidmətə çağırılan, 2000-ci il təvəllüdlü Tiqran Mxoyan ona təhkim edilən silahla özünə qəsd edib.

Xidmət yoldaşları tərəfindən təhqirlərə dözməyən T. Mxoyan başından atəş açaraq intihar edib. O, İrəvanın Malatia-Sebastia inzibati rayonundan idi, 2018-ci ilin payızında orduya çağırılıb.

Daha sonra, Ermənistan Müdafiə Nazirliyinin mətbuat xidmətinin rəhbəri iki erməni hərbi qulluqçunun ölməsi barədə məlumat verib. O qeyd edib ki, hadisənin detalları barədə məlumat verə bilməz.

Qeyd edək ki, ölən ikinci erməni hərbi qulluqçu 2000-ci il təvəllüdlü Tiqran Manvelyandır. O, Lori bölgəsinin Taşir şəhərindən idi və 2019-cu ilin payızında ordu sıralarına çağırılıb. O, Qarabağın cənub-şərq hissəsində yerləşən hərbi hissələrdən birində, saat 11:30 radələrində ölüb.

Məlumata görə, Tiqran Manvelyan mütəmadi olaraq hərbi xidmətindən şikayət edib, hərbi hissədə problemlər yaşayıb, bu barədə yaxınlarını da məlumatlandırıb. Öncəki gün Manvelyan döyüş mövqelərinə aparılıb. Onun iki böyük qardaşı da işğal altında olan Qarabağdakı hərbi hissələrdə qulluq edib, o, ailənin kiçik oğlu olub.

Cəsədlərdən birini 12 fevral tarxində saat 11 radələrində, digərini isə 2 saat sonra yenə də odlu silah yaralanması nəticəsində baş verən ölüm hadisəsi olaraq başqa bir hərbi hissədə aşkar ediblər.

13 fevral

Ermənsitanda “Muratsan” hərbi hospitalından Sisiana hərbi qulluqçuları aparan avtomobil yoldakı qar və çovğuna görə aşıb.

Qəza nəticəsində əsgərlərdən 3-ü ağır vəziyyətdə “Muratsan” hərbi hospitalına yerləşdirilib.

Məlumata görə, avtomobildə 6 hərbi qulluqçu olub.

14 fevral

Fevralın 14-də, saat 19:00 radələrində işğal altında olan Qarabağın şərq hissəsindəki hərbi hissələrdən birində naməlum şəraitdə erməni hərbi qulluqçunun meyiti tapılıb.

Ölümün hansı şəraitdə baş verməsi ilə bağlı müvafiq qurumlar araşdırma aparır.

Məlumata görə, ölmüş şəxs Ermənistanın Sünik vilayəti sakini, 23 yaşlı hərbi qulluqçu, 1997-ci il təvəllüdlü Hayk Nerses Asryandır.

15 fevral

Münhen Təhlükəsizlik Konfransı çərçivəsində Ermənistan Baş naziri Nikol Paşinyan bildirib ki, Ermənistan-Azərbaycan sərhədində - Tavuş-Qazax istiqamətində Ermənistanın hərbi qulluqçusu yaralanıb.

Qeyd edək ki, həmin gün Paşinyanın qeyd etdiyi yaralı erməni hərbi qulluqçu barədə nə erməni KİV-ləri, nə də Ermənistan Müdafiə Nazirliyi məlumat yayıb.

Məlumat bir neçə gün sonra Ermənistan Müdafiə Nazirliyinin mətbuat xidmətinin rəhbəri Artsrun Hovhannisyan tərəfindən təsdiqlənib.

20 fevral

Ermənistan Milli Təhlükəsizlik Xidməti əməliyyatları nəticəsində hərbi komissarlıq əməkdaşı tərəfindən rüşvət alınması hadisəsini aşkara çıxarıb.

Məlumata görə, Ermənistan vilayətlərindən birinin hərbi komissarlığının hərbi çağırış şöbəsinin rəisi dövlət xidmətini həyata keçirən şəxs olaraq və hakimiyyət nümayəndəsi funksiyalarını həyata keçirərək 2019-cu ildə eyni hərbi komissarlığın keçmiş işçi ilə rüşvət qarşılığında onun (eyni hərbi komissarlığın keçmiş işçisi - red.) təqdim etdiyi hərbi çağırışçılara müddətli hərbi xidmətdən möhlət alınması və ya hərbi çağırışçıların xidmətdən azad olunması məsələsində tanıdığı vəzifəli şəxs vasitəsilə yardım etmək ətrafında əvvəlcədən razılığa gəlib.

Hərbi çağırış şöbəsinin rəisi vəzifəsindən sui-istifadə edərək, hərbi masa müfəttişi ilə razılığa gələrək 2019-cu ilin qış hərbi çağırışı zamanı yuxarıda qeyd edilən əməliyyatların səlahiyyətli şəxslərin vasitəsilə həyata keçirilməsində 4 hərbi çağırışçının lehinə töhfə verib.

Nəticədə hərbi çağırışçılardan ikisi möhlət hüququndan istifadə edib, digər ikisi isə müddətli hərbi xidmət üçün yarasız hesab edilib və qeydiyyata alınıb.

Bu əməliyyatların həyata keçirilməsi üçün hərbi çağırış şöbəsinin rəisi hərbi çağırışçıların yaxınlarından ümumilikdə 13.700 ABŞ dolları pul alıb. Sözügedən qanun pozuntusunu həyata keçirmiş şəxslər nəzarət altına alınıb.

*****

Ermənistan Milli Təhlükəsizlik Xidməti 2019-cu ilin qış hərbi çağırışı zamanı rüşvət qarşılığında müddətli hərbi xidmətdən möhlət verməklə bağlı növbəti cinayət hadisənin üstünü açıb.

Məlumata görə, “Elmi Travmatologiya və Ortopediya Mərkəzi” QSC-nin cərrahı 2019-cu ilin dekabr ayında tanış vəzifəli şəxs vasitəsilə hərbi çağırış yaşına çatmış gəncin məcburi hərbi xidmətdən 3 illik müddətə möhlət alınması prosesinin təşkil olunmasına məcbur edilib, proses üçün qeyd edilən gəncin anasından 10.000 ABŞ dolları tələb edib və alıb, daha sonra aldığı pulu səlahiyyətli vəzifəli şəxsə ötürüb, vəzifəli şəxs isə hərbi çağırışçının müddətli hərbi xidmətdən 3 illik möhlət alması məsələsini həll edib.

Kifayət qədər faktiki məlumatların əldə olunması nəticəsində rüşvət alınmasına kömək edən cərrah həbs edilib.

22 fevral

Ermənistanın Lori vilayətində hakimiyyət nümayəndələrinə qarşı zorakılıq hadisəsi baş verib.

Saat 00:10 radələrində, Stepanavan şəhərində Stepanavan polis bölməsinin cinayət axtarış şöbəsinin vəzifəli şəxsi P. Tiqran və eyni bölmənin icma polis şöbəsinin müfəttişi Q. Artur Stepanavan polis bölməsindən çıxarkən görüb ki, Stepanavan şəhər sakini, 24 yaşlı Frunzik Şahumyan idarə etdiyi “VAZ 21703” markalı “35 PT 060” nömrəli avtomobillə Sarkisyan və Şaumyan küçələrinin kəsişməsində yüksək sürətlə manevr edir və onlara tərəf gəlir.

Qısa müddət sonra Stepanavan polis bölməsinin əməkdaşları həbs etmək məqsədilə təşkil edilən tədbirlər sayəsində F. Şahumyanı Teryan küçəsi 7 ünvanında avtomobilsiz tapıblar.

Qeyd olunur ki, F. Şahumyan həbs olunan zaman qeyri-ayıq vəziyyətdə olaraq polis əməkdaşlarının tələblərinə tabe olmayıb, əl və ayaqları ilə polislərin müxtəlif bədən hissələrinə zərbələr endirib, daha sonra polis əməkdaşların birinin rütbəsini qoparıb.

Məlumata görə, F. Şahumyan Ermənistan Müdafiə Nazirliyinin xidmətçisidir.

*****

Ermənistan İstintaq Komitəsinin Armavir vilayəti istintaq idarəsi rəisi Samvel Tonoyanın qərarı ilə yaradılmış istintaq qrupunun rəhbəri, eyni istintaq idarəsinin baş müstəntiqi Mheryanın qərarı ilə Şirak vilayətinin Aşotsk kəndində qeydiyyata alınmış, 62 yaşlı Mesrop Kyureğyan həbs olunub.

Kyureğyan fevralın 22-də üzərində olan “AK-47” tipli 7.62 mm çaplı avtomatla 36 yaşlı Gevorq Xalatyanı öldürmək, bundan sonra öldürülmüş şəxsin yaxınları və evi istiqamətində atəş açmaq, daha sonra isə cinayət aləti olan avtomatı hadisə yerində qoyaraq qaçmaq işində şübhəli bilinir.

Əldə olunan məlumatlara görə, qətl səhər saatlarında baş verib, şübhəli bilinən M. Kyureğyan isə qətl zamanı hərbi geyimdə olub. Həbs olunduqdan sonra Kyureğyan özü də hüquq-mühafizə orqanlarına keçmiş hərbçi, rütbəcə polkovnik-leytenant olduğunu bildirib.

Qeyd olunur ki, Mesrop Kyureğyan Gevorq Xalatyanı öldürüb, bundan sonra onun ailə üzvlərinə, eləcə də həyat yoldaşı və azyaşlı uşaqları istiqamətində atəş açıb.

24 fevral

Ermənistan silahlı qüvvələrinin bölmələri Azərbaycan-Ermənistan dövlət sərhədindəki təmas xəttində növbəti dəfə atəşkəs rejimini kobud şəkildə pozmaqla təxribat törədib.

Saat 07:00 radələrində Ermənistan silahlı qüvvələrinin Noyemberyan rayonunun Koti kəndi yaxınlığında yerləşən bölmələrindən Qazax rayo­nunun Quşçu Ayrım kəndi istiqamətin­dəki sərhəd döyüş məntə­qəsinə diversiya cəhdinin qarşısı alınmış, ciddi itkilər verməyə məcbur olmuş düşmənin bir zabiti ağır yaralanıb, digər hərbi qulluqçusu öldürülüb.

26 fevral

Saat 08:30 radələrində Qeğarkunik vilayəti sakini, 23 yaşlı P. Arman idarə etdiyi "Mercedes" markalı "AG 019" nömrəli vatomobillə Tsovaqyuğ-Şorja-Vardenis avtomobil yolunun 80 km hissəsində hələlik naməlum şəraitdə yolun hərəkət zolağından çıxaraq taxta elektrik dirəyinə çırpılıb və aşaraq yandakı sahəyə düşüb.

Qəza nəticəsində sürücü P. Arman müxtəlif bədən xəsarətləri alaraq Qeğarkunik hərbi hospitalına yerləşdirilib.

Məlumata görə, sürücü P. Arman Ermənistan Müdafiə Nazirliyinin "N" saylı hərbi hissəsində müqaviləli hərbi qulluqçu kimi xidmət edir.

27 fevral

İşğal edilmiş yaşayış məntəqələrimizdə yerləşdirilən Ermənistan silahlı qüvvələrinin bölmələrindən birində növbəti rüşvətalma faktı üzə çıxıb.

İşğalçı ordunun Madagiz yaşayış məntəqəmizdə yerləşdirilən bölmələrindən birində xidmət edən əsgər Robert Simonyandan məzuniyyətə göndərilməsi üçün rüşvət tələb olunub.

Hadisə ilə bağlı rəsmi məlumat verilməsə də, əsgərin valideynlərinin prokurorluğa müraciətindən sonra faktla bağlı araşdırmalara başlanılıb.

*****

İşğal edilmiş yaşayış məntəqələrimizdə yerləşdirilən Ermənistan silahlı qüvvələrinin bölmələrindən birində növbəti fövqəladə hadisə baş verib.

Ağdərə istiqamətində xidmət edən əsgərlər Karen Rafaelyan və Davtak Sahakyan hərbi hissəni özbaşına tərk ediblər.

Hərbi polis və yerli hüquq-mühafizə orqanları əsgərlərin tapılaraq geri qaytarılması ilə bağlı təbdirlər həyata keçirir.

Qeyd: Ermənistan Silahlı Qüvvələrinin Baş Qərargah rəisi Artak Davtyan bu ay verdiyi açıqlamasında son 9 ay ərzində 8 intihara cəhd hadisəsinin qarşısının alındığını bildirib.

Bununla yanaşı, ay çərçivəsində “Razm.info” nəşrinin Ermənistan prokurorluğuna göndərdiyi sorğusuna cavabda 2020-ci il yanvarın 1-dən 31-nə qədər Ermənistan ordusunun 6 hərbi qulluqçusunun təxribata cəhd nəticəsində yaralandığı qeyd olunub.


Ordu.az

© Materiallardan istifadə edərkən hiperlinklə istinad olunmalıdır


Teqlər: Ermənistan-ordusu   Korrupsiya   İtki   Yaralı