"KTMT" sözünə uyğun 243 nəticə tapıldı!

Paşinyan məğlubiyyətlə barışmalıdır: Ermənistanın KTMT Baş katibliyinə namizədi rütbədən məhrum edilib

2018/11/BKAye-1541655101.jpg
Oxunub: 3379     09:25     08 Noyabr 2018    
Ermənistanın KTMT-nin Baş katibi vəzifəsinə namizədi olan Vağarşak Harutyunyan vaxtilə ali hərbi rütbədən mərhum edilib.

Ordu.az erməni KİV-lərinə istinadən xəbər verir ki, bu gün Astanada keçiriləcək KTMT-nin zirvə toplantısının əsas müzakirə mövzularından biri Baş katibin müəyyən olunması məsələsidir.

Məlum olduğu kimi son dövrlərədək KTMT-nin Baş katibi vəzifəsini, Ermənistanda konstitutsiya quruluşunu dəyişməyə cəhd edilməsi üzrə 2008-ci il 1 mart hadisələri ilə əlaqədar ittiham olunan Yuri Xaçaturov tuturdu. Həmin vaxt Xaçaturov İrəvan qarnizonun rəisi olub. Ermənistanda 1 mart hadisələri ilə əlaqədar saxlanılan Xaçaturov daha sonra 5 milyon dram girov müqabilində azadlığa buraxılıb və Moskvaya qayıdaraq, avqust ayının əvvəlindən etibarən təşkilatın Baş katibi vəzifələrinin icra olunmasını davam etdirib. Lakin bir neçə gün əvvəl o, Ermənistan tərəfinin müraciəti əsasında tutduğu vəzifəsindən geri çağırılıb.


Xaçaturovun geri çağırılmasına baxmayaraq, Ermənistan tərəfi yeni namizədini irəli sürüb. Məlum olub ki, KTMT-nin Baş katibi vəzifəsinə Ermənistanın yeni namizədi Müdafiə nazirinin sabiq müavini Vağarşak Harutyunyandır. Onun namizədliyi barədə Ermənistan tərəfi artıq siyasi qərar qəbul edib. Hazırda Ermənistan 2020-ci ilədək KTMT-nin baş katibi vəzifəsini özündə saxlamaq üçün hər şey etməyə hazırdır. Lakin Ermənistanın bu vəzifəni qoruyub saxlaya biləcəyi hələ məlum deyil.

Təşkilatın rəsmi səhifəsində Ermənistan tərəfindən Yuri Xaçaturovun geri çağırılması prosesinin başa çatdığı qeyd olunsa da, KTMT-nin nizamnaməsində vaxtından əvvəl səlahiyyət müddəti dayandırılan sədrin təmsil etdiyi ölkə yeni namizədini verə bilərmi, deyə qaydalar müəyyən edilməyib.

İstənilən halda əlifba sırasına görə növbəti ölkə olan Belarus sədrlik səlahiyyətini öz üzərinə götürmək niyyətindədir. Hətta artıq mətbuatda Belarusun Baş katib vəzifəsinə namizədinin adı da açıqlanıb. Qeyd olunur ki, bu vəzifəni 2015-ci il 4 noyabr tarixindən etibarən Belarusun Təhlükəsizlik Şurasının rəhbəri, Stanislav Zas tuta bilər. Xatırladaq ki, Yuri Xaçaturov da Baş katib vəzifəsinə seçilməzdən öncə Ermənistan Təhlükəsizlik Şurasının rəhbəri olub.

Ermənistan və Belarus Xarici İşlər Nazirlikləri KTMT-nin yeni Baş katibi vəzifəsinə namizədlər barədə dəqiq heç bir məlumat verməyərək, 8 noyabr görüşünün nəticələrini izləməyi məsləhət görüblər.

Rusiyalı politoloq Modest Kolerov hesab edir ki, bu vəzifəni itirdiyinə görə Ermənistan sədrliyini davam etdirə bilməz, rotasiya qaydalarına uyğun olaraq sədrlik əlifba sırası ilə Belarusa keçməlidir.


Onun sözlərinə görə istənilən halda Ermənistan nümayəndəsinin təkrar seçilməsi, yalnız Ermənistan tərəfindən təşkilata siyasi vədlər verildiyi halda mümkün ola bilər. Politoloq, baş katib vəzifəsində şəxsin yox, ölkənin rol oynadığını qeyd edib.

Yuri Xaçaturovla bağlı baş verənlərdən sonra təşkilata dəqiq zəmanətlər verilməsi zərurəti yaranıb. Ermənistan bu məsələdə yaxşı davranmadı, buna görə də baş verənlərə Belarus və Qazaxstan o qədər də yaxşı münasibət göstərmir. Ona görə də Ermənistanın namizədinin kimliyi rol oynamır və heç nə dəyişə bilməz.

Lakin bəzi məlumatlara görə KTMT daxilində Vağarşak Harutyunyanın namizədliyi birmənalı qəbul olunmayıb. Buna səbəblərdən biri də Baş katib vəzifəsinə Ermənistanın namizədi olan Vağarşak Harutyunyanın 2002-ci ildə rütbədən mərhum edilməsi məqamı olub.

Xatırladaq ki, Vağarşak Harutyunyan 2002-ci ildə vəzifədən çıxarıldıqdan sonra uzun illər Aram Sarkisyanın rəhbərlik etdiyi “Respublika” partiyasının üzvü olub. O, qəti müxalifət mövqeyi ilə Koçaryan rejiminə qarşı mübarizə aparmaqda seçilib. Elə həmin dövrdə müxalif fəaliyyətinə görə Koçaryan 18 iyun 2002-ci il tarixli əmri ilə Harutyunyanı “general-leytenant” ali hərbi rütbəsindən mərhum edib.

Alpər Mövludoğlu
Ordu.az


Teqlər: KTMT   Ermənistan