"Gürzə-1" sözünə uyğun 11 nəticə tapıldı!

Keçmişdən gələcəyə doğru: Azərbaycan MSN-nin regional liderliyi

2017/10/22894631_10212911513158069_857510341_n_15091740150.jpg
Oxunub: 10098     14:54     28 Oktyabr 2017    
Azərbaycan Respublikası müstəqilliyini əldə etdiyi gündən hazırkı dövrə qədər dövlət maraqlarımızın təmin olunması, ölkənin müdafiə qüdrətinin möhkəmləndirilməsi və ordunun hərbi-texniki bazasının artırılması istiqamətində böyük uğurlara nail olub. Silahlı Qüvvələrimizin texniki tələbatının milli istehsal yolu ilə ödənilməsi ən vacib məsələlərdən biri hesab olunur.

Bu mühüm vəzifələrin icrası isə, Azərbaycan Respublikasının Müdafiə Sənayesi Nazirliyinə həvalə edilib. Müdafiə Sənayesi Nazirliyi müstəqillik illərində böyük inkişaf yolu keçərək Silahlı qüvvələri döyüş texnikası və silahlarla təmin etməyə qadir olan bir qurum səviyyəsinə yüksəldilib. Lakin, bu nailiyyətlər qısa bir müddət ərzində ərsəyə gəlməyib, birdən-birə yaranmayıb. Uğurlarımızın arxasında təbii ki, ilk öncə Dahi Öndər Heydər Əliyevin, hazırda isə, Azərbaycan Respublikasının Prezidenti Silahlı Qüvvələrin Ali Baş Komandanı cənab İlham Əliyevin qətiyyətli və uzaqgörən siyasəti, tapşırıq və göstərişlərinin dəqiq yerinə yetirilməsi durur.

Müdafiə Sənayesi Nazirliyinin yaranma tarixinə nəzər salarsaq görərik ki, hələ ötən əsrin 70-80-cı illərində sovet rejiminin qadağalarına baxmayaraq, Ulu öndər Heydər Əliyevin təşəbbüsü ilə, Azərbaycanda bir neçə hərbi sənaye müəssisələri yaradıldı. Məhz, həmin müəssisələr ikinci müstəqillik dövründə, ölkəmizin müdafiə sənayesinin inkişafı üçün əsas baza rolunu oynadı.

Sovetlər birliyi dağıldıqdan sonra, müstəqilliyin ilk dövrlərində, SSRİ-nin Hərbi Sənaye Kompleksi üçün fəaliyyət göstərən, hazırda Azərbaycan Respublikası Müdafiə Sənayesi Nazirliyinin tabeliyində olan müəssisələr bir sıra ciddi problemlərlə qarşılaşdı. Əsasən, müdafiə təyinatlı məmulatların istehsalı üzrə ixtisaslaşan həmin müəssisələrin fəaliyyətlərini bərpa etmək və yenicə müstəqillik qazanan respublikada müdafiə sənayesi kompleksinin inkişafına nail olmaq məqsədilə, 1993-cü ildə Dövlət Xüsusi Maşınqayırma və Konversiya Komitəsi yaradıldı.

2003-cü ildə ordunun hərbi-texniki bazasını gücləndirmək və bu sahədə digər dövlətlərdən asılılığı azaltmaq məqsədilə, Ümummilli Lider Heydər Əliyev tərəfindən “Azərbaycan Respublikası müdafiə sənayesi müəssisələrinin 2003-2005-ci illərdə inkişafına dair Dövlət Proqramı” təsdiq edildi. Həmin tarixdən etibarən respublikada müdafiə sənayesinin inkişafının yeni mərhələsinə qədəm qoyuldu.



Bu istiqamətdə aparılan məqsədyönlü siyasətin davamı olaraq, 16 dekabr 2005-ci ildə Azərbaycan Respublikasının Prezidenti Silahlı Qüvvələrin Ali Baş Komandanı cənab İlham Əliyev tərəfindən, Dövlət Xüsusi Maşınqayırma və Konversiya Komitəsinin bazasında Azərbaycan Respublikası Müdafiə Sənayesi Nazirliyinin yaradılmasına dair sərəncam imzalandı. Həmin dövrün tələbinə uyğun olaraq, Müdafiə Sənayesi Nazirliyinin fəaliyyətinin inkişaf tempini artırmaq üçün, ilk növbədə fəaliyyətləri tamamilə dayanma təhlükəsi ilə üzləşən müəssisələrin bərpasına başlanıldı. Eyni zamanda, müəssisələrin avadanlıq parklarının yenilənməsi, maliyyə sabitliyi üzrə tədbirlərin görülməsi, Dövlət Müdafiə Sifarişi Proqramı və digər istehsal proqnozlarının tərtibi, sosial sahələrin bərpası və s. işlər həyata keçirildi.

Azərbaycan Respublikasının Müdafiə Sənayesi Nazirliyi artıq, demək olar ki, 12 ildir fəaliyyət göstərir. Fəaliyyətə başladığı gündən etibarən, ölkənin müdafiə qüdrətinin möhkəmləndirilməsi məqsədilə nazirlikdə yeni növ müdafiə təyinatlı məmulatların layihələndirilməsi və istehsalı istiqamətində intensiv işləri aparılaraq müsbət nəticələr əldə edilib. Bu illər ərzində, nazirlik ölkə başçısının müvafiq tapşırığı və hərtərəfli dəstəyi ilə, Azərbaycan Respublikası Silahlı Qüvvələrini müasir tələblərə cavab verən müdafiə təyinatlı məmulatlarla, xalq təsərüfatını maşınqayırma, cihazqayırma, elektrotexnika, rabitə sahələrində istifadə olunan avadanlıq və ehtiyyat hissələri ilə təmin etmək məqsədilə dünyanın inkişaf etmiş aparıcı şirkətlərindən alınan müasir texnologiya və avadanlıqlarla təchiz olunan 58 yeni istehsalat sahəsi yaradılıb.



Yeni yaradılan istehsalat müəssisə və sahələrində ümumi sahəsi 283,5 min kv. metrlik tikinti, yenidənqurma işləri görülüb, 500 min kv. metr sahədə isə abadlaşdırma işləri aparılıb. Yaradılan istehsal sahələrində müasir tələblərə cavab verən və insan amilini minimuma endirən rəqəmsal, proqram təminatlı 25-dən çox mürəkkəb texnoloji xətt və avadanlıq dəstləri, 2200-dən çox müxtəlif təyinatlı dəzgah, 10 minlərlə cihaz, alət və tərtibatlar alınaraq quraşdırılıb. Azərbaycan Respublikasının Prezidenti cənab İlham Əliyevin uzaqgörən siyasəti nəticəsində, bu gün Müdafiə Sənayesi Nazirliyinin tabeliyində olan zavodların sayı artırılaraq, 18-dən 28-ə çatdırılıb. 2007-ci illə müqayisədə 2017-ci ildə ümumi məhsul istehsalının həcmi 6,7 dəfə, müdafiə təyinatli məmulatların həcmi isə, 42 dəfə artırılıb. Ümumilikdə, müdafiə təyinatlı məhsulların çeşid sayı artırılaraq, 213-dən 1200-ə çatdırılıb.

Müdafiə Sənayesi Nazirliyinin fəaliyyəti ərzində istehsalı mənimsənilən məmulatlardan “Mübariz”, “İstiqlal”, "Yalquzaq", "Yırtıcı" snayper tüfənglərini, AK-74 və NATO standartlarına uyğun avtomatları, müxtəlif növ tapançaları, minaatanları, qumbaraatanları və onların atəş yığımlarını, optik cihazları, aviasiya bombaları, ”Matador” və ”Marauder” tipli zirehli maşınları, “Gürzə”, “Əqrəb” və ”Bəbir” kəşfiyyat-patrul maşınlarını, “Orbiter-2M, 2B, 3B” və “Orbiter-4”, “Aerostar-BP” və “Zərbə” tipli pilotsuz uçuş aparatlarını və s. göstərmək olar.

İriçaplı "İstiqlal" yarımavtomat snayper tüfəngi
- çapı: 14,5x114 mm
-döyüş atış tezliyi: 15 atəş/dəqiqə
- atış məsafəsi: yüngül zirehli hədəflərə qarşı - 1000 m
zirehsiz hədəfləri- 2000 m



İriçaplı "Mübariz" yarımavtomat snayper tüfəngi
- çapı: 12,7x108 mm
- döyüş atış tezliyi: 15 atəş/dəqiqə
- atış məsafəsi: yüngül zirehli hədəflərə qarşı - 1000 m
zirehsiz hədəflərə qarşı - 1800 m



"Yırtıcı" snayper tüfəngi - çapı: 7,62x54 mm
- döyüş atış tezliyi: 30 atəş/dəqiqə
- atış məsafəsi: 1000 m




"Yalquzaq" snayper tufəngi
- çapı: 7,62x51 mm
- döyüş atış tezliyi: 8-10 atəş/dəqiqə
- atış məsafəsi: 1000 m



"Matador" zirehli maşın - çəkisi: 15300 kq
- ekipaj: 2+12 sərnişin



"Marauder" zirehli maşın
- çəkisi: 15000 kq
- ekipaj: 2+8 sərnişin



"Gürzə" patrul maşını
- yük götürmə qabiliyyəti: 2500 kq
- ekipaj: 5 nəfər



Bu gün Müdafiə Sənayesi Nazirliyinin müəssisələri rəqabətədavamlı, yüksək dəqiqliyə malik ən müasir silah, sursat, optik vasitələr və s. məhsullar istehsal etməklə, həm Milli Ordunun, həm də qanunvericilikdə nəzərdə tutulan digər silahlı birləşmələrin sifarişlərini yerinə yetirmək iqtidarındadır.

Ötən müddət ərzində nazirliyin müəssisələrində aparılan elmi-tədqiqat və təcrübi-konstruktor işləri nəticəsində, 354 adda müdafiə təyinatlı məmulatın yaradılması başa çatdırılıb və seriyalı istehsalı təmin edilib. Silahlı Qüvvələrin tələbatına uyğun olaraq məmulatların yaradılması zamanı, 300-dən çox müxtəlif sınaqlar keçirilib. Hazırda, 136 adda müdafiə təyinatlı məmulatların yaradılması istiqamətində təcrübi-konstruktor işləri uğurla davam etdirilir.



Yeni nəsil silah növlərinin istehsalı ilə bağlı Silahlı Qüvvələrin Ali Baş Komandanı tərəfindən verilən tapşırıqların icrası istiqamətində məqsədyönlü işlər davam etdirilir. Belə ki, təsir gücü artırılan, yeni nəsil “Zərbə-KM” (qəlpəli-fuqaslı) pilotsuz uçuş aparatının sınaqları uğurla başa çatdırılıb və məmulat istehsal edilərək sifarışçilərə təhvil verilib. Eləcə də, sözügedən silahın daha da modernləşdilmiş modeli “Zərbə-KH” (kumulyativ başlıqlı) pilotsuz uçuş aparatının yaradılması istiqamətində də intensiv işlər davam etdirilir. Azərbaycanın milli məhsulu olan “Tufan” zirehli maşını üzrə işlər də uğurla başa çatdırılaraq, mütəxəssislərin iştirakı ilə təqdimatı keçirilib.



Hazırda, zirehli maşının seriyalı istehsalı üçün hazırlıq işləri aparılır. Bunlarla yanaşı, yüksək güclü elektromaqnit impuls şüalanma layihəsi üzrə işlər də uğurla davam etdirilir.

Bu müddət ərzində, Müdafiə Sənayesi Nazirliyinin (MSN) müəssisələrində peşəkar kadr potensialı formalaşdırılıb. Müdafiə sənayesi sahəsinin yüksək ixtisaslı kadrlara olan təlabatının təmin edilməsi məqsədilə, Müdafiə Sənayesi Nazirliyinin sifarişi ilə Azərbaycan Texniki Universitetində “Xüsusi texnika və texnologiya” fakültəsi yaradılıb. Nazirliyin sifariş verdiyi 5 müdafiə təyinatlı ixtisas üzrə bakalavr və magistr pillələrində 2012/2013 tədris ilindən kadr hazırlığına başlanılıb. Fakultədə təhsil alan tələbələrə praktik məşğələlərin keçirilməsi üçün, MSN-in müəssisələrində əyani vasitələrlə təmin olunmuş auditoriyalar yaradılıb. Fakultəni bitirən məzunlar MSN-in müəssisələrində ixtisaslı kadr kimi fəaliyyətlərini davam etdirir və təhsil illərində əldə etdikləri bilikləri daha müasir silah və texnikanın istehsal edilməsində tətbiq edirlər.



Müdafiə Sənayesi Nazirliyi respublikanın elm ocaqlarından olan Azərbaycan Milli Elmlər Akademiyası, Milli Aviasiya Akademiyası və digərləri ilə sıx əməkdaşlıq edir. Hazırda Milli Elmlər Akademiyası və Milli Aviasiya Akademiyası arasıda əldə olunmuş birgə razılıq əsasında bir sıra tədqiqat işləri aparılır. Vaxtilə, hərbi sənaye sahəsində beynəlxalq təcrübənin öyrənilməsi və təlim məqsədilə nazirliyin mütəxəssislərinin inkişaf edən ölkələrə səfərləri təşkil edilirdisə, bu gün müdafiə sənayesi sahəsi üzrə Azərbaycan təcrübəsinin öyrənilməsi istiqamətində bir sıra ölkələrdən Müdafiə Sənayesi Nazirliyinə müraciətlər daxil olur.

Hərbi-texniki əməkdaşlıq sahələrində də, bir sıra mühüm işlər həyata keçirilib. Belə ki, Müdafiə Sənayesi Nazirliyi yaradıldığı zaman respublikamız hərbi sahədə yalnız qardaş ölkə Türkiyə ilə əməkdaşlıq edirdisə, hazırda bu gün aviasiya, naviqasiya, cihazqayırma və digər istiqamətlər üzrə dünyanın inkişaf etmiş 50-dən çox dövlətinin qabaqcıl firma və şirkəti ilə sıx əməkdaşlıq aparılır. Ali Baş Komandanının tapşırığına əsasən ilk dəfə 2009-cu ildə Türkiyənin İstanbul şəhərində keçirilən “İDEF” sərgisinə qatılan Müdafiə Sənayesi Nazirliyi, bu günə qədər Azərbaycanda istehsal olunan müdafiə təyinatlı məhsulların xarici bazarlara çıxarılması istiqamətində 35-dən çox beynəlxalq sərgidə iştirak edib.



İlk dəfə iştirak etdiyi sərgidə, 27 adda müdafiə təyinatlı məmulatı ilə təmsil olunan MSN, sonuncu dəfə, cari ilin mayında Türkiyənin İstanbul şəhərində keçirilən “İDEF-2017” XIII Beynəlxalq müdafiə sərgisində 260 adda məmulatını nümayiş etdirib. ABŞ, İngiltərə, Almaniya, İtaliya, Rusiya, Fransa, Türkiyə və digər inkişaf etmiş ölkələrin qabaqcıl firma və şirkətlərinin də qatıldığı sərgilərdə Azərbaycan istehsalı olan məmulatlar, xüsusilə müxtəlif növ döyüş sursatları, pilotsuz uçuş aparatları, müxtəlif çaplı snayper tüfəngləri, tapançalar iştirakçı dövlət və izləyicilər tərəfindən böyük maraqla qarşılanır.



Müdafiə Sənayesi Nazirliyi xarici ölkələrdə keçirilən sərgilərdə iştirak etməklə yanaşı, 2014 və 2016-cı illərdə “ADEX” adlı Bakıda keçirilən Beynəlxalq müdafiə sərigilərinin təşkilatçısı olub. Sərgi zaman, Azərbaycan istehsalı olan müdafiə təyinatlı məmulatlar milli paviliyonda nümayiş etdirilib. “ADEX-2016” II Azərbaycan Beynəlxalq müdafiə sərgisində nümayiş etdirilən məmulatlardan mina əleyhinə “İldırım” və “Qasırğa” zirehli maşınları, pilotsuz uçuş aparatlarının ən yeni tipli modernləşdirilmiş variantları, yeni növ atıcı silahlar, tank əleyhinə idarə olunan raketlə təchiz edilmiş “Gürzə” nəzarət patrul maşını, “Tufan” milli zirehli maşını, müxtəlif növ döyüş sursatları və digər məmulatlar böyük maraqla qarşılanıb. Ötən ilin sentyabrında, Bakıda keçirilən “ADEX-2016” sərgisində dünyanın 44 ölkəsindən 250-yə yaxın şirkət və rəsmi nümayəndə heyəti iştirak etdi. Belə bir nüfuzlu tədbirin regionda ilk dəfə Bakıda təşkil edilməsi isə, digər sahələrlə yanaşı, bu sahədə də Azərbaycanın regionda lider dövlət olduğunu göstərir.

Beynəlxalq müdafiə sərgilərində iştirak Müdafiə Sənayesi Nazirliyinin ixrac sahəsində də uğurlar qazanmasına imkan yaradıb. Ölkə başçısının tapşırığı ilə ixrac potensialının genişləndirilməsi və idxalın yerli istehsalla əvəzlənməsi ilə bağlı nazirlikdə məqsədyönlü işlər aparılır. Bu gün, istehsal olunan məhsullardan döyüş sursatlarının, müasir atıcı və artilleriya silahlarının, pilotsuz uçuş aparatlarının, zirehli texnikaların və s. ixracı həyata keçirilir. Göründüyü kimi, Müdafiə Sənayesi Nazirliyi Azərbaycan Silahlı Qüvvələrinin müdafiə təyinatlı məmulatlara olan təlabatının əsas hissəsini təmin etməklə yanaşı, xarici bazarlara da məhsul çıxarmaq iqtidarına malikdir.



Bu gün Azərbaycan Ordusu regionun ən güclü ordularından birinə çevrilib. Bunu ötən ilin aprel döyüşləri bir daha sübut etdi. Həmin döyüşlərdə, Müdafiə Sənayesi Nazirliyinin müəssisələrində yaradılan və istehsal olunan bir sıra müdafiə təyinatlı məmulatlardan geniş istifadə olundu. Düşmənin canlı qüvvəsinin və döyüş texnikalarının yerinin müəyyən edilərək məhv edilməsində yeni növ milli müdafiə təyinatlı məhsullar mühüm rol oynadı. Bu ilin iyun ayında, Silahlı Qüvvələr günü ərəfəsində Müdafiə Sənayesi Nazirliyinin Şirvan şəhərində yerləşən iki yeni istehsal zavodunun açılış mərasimində, Silahlı Qüvvələrin Ali Baş Komandanı cənab İlham Əliyev iştirak edərək öz tapşırıq və tövsiyyələrini verdi.

Həqiqətən, Milli Müdafiə Sənayesi istiqamətində prezident İlham Əliyev tərəfindən atılan addımlar olduqca qürurvericidir. Məhz, İlham Əliyevin Ali Baş Komandanlığı və uzaqgörən siyasəti nəticəsində, Müdafiə Sənayesi Nazirliyi Silahlı Qüvvələrimizin möhkəmlənməsində, onun qüdrətinin artırılmasında və müdafiə səhəsində kənardan asılılığın aradan qaldırılmasında mühüm nəaliyyətlər əldə edib.

Ordu.az

© Materiallardan istifadə edərkən hiperlinklə istinad olunmalıdır


Teqlər: MSN   İlham-Əliyev